គេហទំព័រ CTwant នៅថ្ងៃទី២០ ខែតុលា ឆ្នាំ ២០២២ បានបង្ហាញឱ្យដឹងថា ពិធីមង្គលការមួយនៅទីក្រុង Suzhou ខេត្ត Anhui ប្រទេសចិន បានក្លាយជាប្រធានបទក្តៅនៅក្នុងប្រព័ន្ធផ្សព្វផ្សាយសង្គម ដោយសារតែ «កូនកំលោះ» បានបង្ហាញខ្លួនបែរជានារីម្នាក់ស្លៀកឈុតដូចជាបុរសអ៊ីចឹង ដែលធ្វើឲ្យផ្អើលដល់មហាជនឆ្ងល់ថាមានរឿងអ្វីកើតឡើង។
យោងតាមសារព័ត៌មានក្នុងស្រុក នៅថ្ងៃទី១៦ ខែតុលា ឆ្នាំ២០២២ មុនថ្ងៃរៀបការមកដល់ ស្រាប់តែកូនកំលោះកើតជំងឺឆ្លងដ៏មិននឹកស្មានដល់។ នៅពេលនោះ ពួកគេត្រូវដាក់ឱ្យនៅដាច់ដោយពីគ្នា ដើម្បីគ្រប់គ្រងការរីករាលដាលនៃ COVID-19 ដោយមិនអាចចូលរួមក្នុងពិធីរៀបការបានទេ។ ប៉ុន្តែ ដោយសារតែវាជាប្រពៃណី ហេតុនេះ គឺមិនអាចលើកពេលថ្ងៃរៀបការបានទេ។
ដូច្នេះហើយ ទើបក្រុមគ្រួសារសម្រេចចិត្តបញ្ជូន “ប្អូនស្រី” របស់កូនកំលោះ មករៀបការធ្វើជាកូនកំលោះជំនួសវិញ។ កូនក្រមុំបានទទួលជោគវាសនារបស់នាង ដោយមិនអាចបដិសេធបានទេ ហើយនាងក៏បានយល់អំពីស្ថានភាពជាក់ស្តែងផងដែរ។
តាមរយៈវីដេអូឃ្លីបដែលត្រូវបានគេបញ្ចេញ បានបង្ហាញថា បរិយាកាសក្នុងពិធីនេះមានភាពសប្បាយរីករាយជាខ្លាំង ថ្វីត្បិតតែកូនកំលោះមានភាពខ្មាសអៀន និងប្រព្រឹត្តខុសក៏ពិតមែន ប៉ុន្តែមិត្តភ័ក្តិ និងសាច់ញាតិ បានមកធ្វើជាសាក្សី និងជូនពរក្នុងពិធីបុណ្យនេះ រហូតដល់ពិធីមង្គលការត្រូវបានបញ្ចប់។
បន្ទាប់ពីរឿងនេះត្រូវបានចែករំលែកនៅលើបណ្តាញសង្គម អ្នកនិយមលេងអ៊ីនធឺណិតបានសម្ដែងការចាប់អារម្មណ៍ និងការបញ្ចេញមតិលេងសើចថា៖ «បទពិសោធន៍បែបនេះគឺកម្រណាស់ រៀបការជាមួយប្អូនថ្លៃស្រីមិនស្រួលទេណា៎!, ថ្ងៃនេះយើងរៀបការហើយ ប៉ុន្តែកូនកំលោះមិនមែនខ្ញុំទេ ហាសហា,…»៕ រក្សាសិទ្ធិដោយ៖ លឹម ហុង
