ថ្មីៗនេះ គូស្នេហ៍មួយគូដែលមានគម្លាតអាយុខុសគ្នា ៣៧ឆ្នាំ បានធ្វើឱ្យមានការចាប់អារម្មណ៍ខ្លាំងតែម្តង នៅលើពិភពអនឡាញ ព្រោះថាខាងប្រុសឈ្មោះ Wuthichai Chantaraj អាយុ ១៩ ឆ្នាំ រីឯខាងស្រីឈ្មោះ Janla Namuangrak អាយុ ៥៦ ឆ្នាំ ។ អ្នកទាំងពីរមកពីខេត្ត Sakhon Nakhon ភាគឦសានប្រទេសថៃ។
គូស្នេហ៍នេះបានជួបគ្នានៅពេលដែល Wuthichai មានអាយុ ១០ ឆ្នាំ ស្របពេលដែល Janla ជាស្រ្តីមេម៉ាយកូន ៣ នាក់ បានពឹងពាក់ Wuthichai ជួយការងារមួយចំនួននៅជុំវិញផ្ទះ។ បន្ទាប់ពី Wuthichai បានជួយរើផើងផ្កា និងសម្អាតផ្ទះរបស់គាត់ជាច្រើនដងរួចមក ពួកគេក៏បានបង្កើតមិត្តភាព។
ទំនាក់ទំនងស្នេហារបស់ពួកគេបានចាប់ផ្តើមប្រហែល ២ ឆ្នាំមុន ហើយពួកគេរីករាយ នឹងណាត់ជួបនៅក្នុងភោជនីយដ្ឋាន និងនៅក្នុងទីក្រុង។ ពួកគេក៏មិនខ្មាសអៀនក្នុងការកាន់ដៃគ្នា ឬថើបគ្នាទៅវិញទៅមកនោះទេ។
Wuthichai បាននិយាយថា «ខ្ញុំបាននៅជាមួយ Janla អស់រយៈពេល ២ ឆ្នាំមកហើយ។ វាជាលើកទីមួយហើយក្នុងជីវិតរបស់ខ្ញុំ ដែលខ្ញុំមានអារម្មណ៍ថាចង់ធ្វើឱ្យប្រាកដថា អ្នកណាម្នាក់រស់នៅបានសុខស្រួល»។
Wuthichai បានរៀបរាប់យ៉ាងលម្អិតថា «ខ្ញុំបានឃើញផ្ទះដ៏រអាក់រអួលរបស់នាង ហើយបានរកឃើញថា ខ្លួនឯងគិតពីវិធីជួយនាងឱ្យរស់នៅក្នុងស្ថានភាពប្រសើរជាងមុន ។ នាងជាស្ត្រីដែលឧស្សាហ៍ព្យាយាម ហើយក៏ស្មោះត្រង់ដែរ។ ខ្ញុំសរសើរនាង»។
រហូតមកដល់ដើមឆ្នាំនេះ អ្នកទាំងពីរបានរក្សាទំនាក់ទំនងរបស់ពួកគេយ៉ាងស្អិតរមួត ខណៈ Janla បាននិយាយថា «នៅពេលយើងប្រាប់មនុស្សថា យើងមានស្នេហា ពួកគេគិតថាយើងឆ្កួត កូនៗរបស់ខ្ញុំភ្ញាក់ផ្អើល»។
យ៉ាងណាមិញ ការរិះគន់មិនបានរារាំងគូស្នេហ៍នេះទេ ហើយ Janla បានបន្ថែមថា មិត្តប្រុសរបស់គាត់ធ្វើឲ្យគាត់នៅក្មេងម្ដងទៀត។
ជាក់ស្តែង Janla បាននិយាយថា «Wuthichai ប្រៀបដូចជាកំពូលវីរបុរសសម្រាប់ខ្ញុំ។ គាត់ជួយខ្ញុំរាល់ថ្ងៃ។ ពេលគាត់មានអាយុកាន់តែចាស់គំនិត យើងចាប់ផ្ដើមមានអារម្មណ៍ចំពោះគ្នា។ ខ្ញុំភ្ញាក់ផ្អើល ព្រោះខ្ញុំស្គាល់គាត់តាំងពីនៅក្មេង»។
ស្រ្តីរូបនេះបានបន្ថែមថា «ប៉ុន្តែគាត់ធ្វើឲ្យខ្ញុំមានអារម្មណ៍ក្មេងឡើងវិញ ហើយយើងបាននៅជាមួយគ្នា យើងសប្បាយចិត្ត យើងនឹងរៀបការ»។
គូស្នេហ៍មួយគូនេះបានភ្ជាប់ពាក្យរួចហើយ ប៉ុន្តែមិនមានព័ត៌មានច្រើនដឹងថា ពួកគេចង់ធ្វើពិធីបែបណានោះទេ៕ រក្សាសិទ្ធិដោយ៖ លឹម ហុង
