ស្រ្តីដែលវាយបំបែកកញ្ចក់រថយន្ត និងខាំស្លឹកត្រចៀកនារីវ័យក្មេងម្នាក់ ជាស្រីស្នេហ៍ប្តី នៅក្នុងឃ្លីប បង្កការភ្ញាក់ផ្អើលនៅនៅ ថាញ់ហ័រ បាននិយាយថា នាងបានរកឃើញប្តីដោយចៃដន្យ ខណៈកំពុងធ្វើដំណើរជាមួយអ្នកផ្សេងនៅក្នុងរថយន្ត ទើបនាងប្រញាប់ចេញមកបិទផ្លូវ និងធ្វើសកម្មភាព…។
កាលពីថ្ងៃទី២៤ ខែតុលា នគរបាលក្រុង Nong Cong (Thanh Hoa) បានឲ្យដឹងថា ក្រោយហេតុការណ៍ប្រច័ណ្ឌខាំត្រចៀកនារីវ័យក្មេងម្នាក់ ស្ត្រីជាប្រពន្ធដែលប្រព្រឹត្តបទល្មើស បានទៅរាយការណ៍ប្រាប់ប៉ូលិសនៅល្ងាចថ្ងៃទី២៣ ខែតុលា ឆ្នាំ២០២២។ ស្ត្រីរូបនោះ មានឈ្មោះ NNH (អាយុ៣០ឆ្នាំ រស់នៅភូមិបិនស៊ុង ស្រុកញូថាញ់)។ អ្នកស្រី H បន្តថា រឿងរ៉ាវបានកើតឡើងលើកនេះ គឺផ្តើមចេញពីជម្លោះផ្លូវចិត្តក្នុងគ្រួសារ ពេលនាងសង្ស័យថាប្តីមានអ្នកថ្មី។
ជាក់ស្តែង នៅរសៀលថ្ងៃទី២២ ខែតុលា ពេលដែលនាងទៅផ្សារទំនើប ស្រាប់តែប្រទះឃើញប្តីរបស់នាងកំពុងដឹកស្រីក្មេង។ ដោយខឹងខ្លាំងពេក នាងក៏បានឡើងលើរថយន្តវាយបំបែកកញ្ចក់មុខ ហើយប្រញាប់ចូលក្នុងរថយន្ត ប៉ះទង្គិចជាមួយនារីក្មេងនោះដែលអង្គុយនៅខាងក្នុង ។ ជាលទ្ធផល នារីក្មេងនោះត្រូវបានខាំដាច់ត្រចៀកខាងឆ្វេងយ៉ាងដំណំ។
ដោយយល់ឃើញថា ករណីនេះបង្ហាញពីការខូចខាតទ្រព្យសម្បត្តិ និងបង្ករបួសស្នាម ប៉ូលិសមូលដ្ឋានបានបញ្ជូនសំណុំរឿងនេះទៅកាន់អធិការដ្ឋានស្រុក ដើម្បីធ្វើការស៊ើបអង្កេត និងចាត់ការតាមច្បាប់។ ដោយឡែកចំពោះនារីវ័យក្មេងរងគ្រោះដែលត្រូវបានត្រចៀកខាំ ប៉ូលិសមិនអាចចោទប្រកាន់បានទេ ដោយបានបញ្ជូននាងទៅព្យាបាលនៅទីក្រុងហាណូយ។
គួររម្លឹកថា នៅរសៀលថ្ងៃទី២២ ខែតុលា ឃ្លីបមួយបានលេចឡើងនៅលើបណ្តាញសង្គម ដែលបង្ហាញពីទិដ្ឋភាពស្រ្តីម្នាក់បានឡើងលើក្បាលរថយន្ត៤កៅអី ហើយយកជើងទទេធាក់បែកកញ្ចក់ រួចចូលក្នុងឡាន ខាំត្រចៀកនារីក្មេងម្នាក់ ដែលគេជឿថាជាស្រីស្នេហ៍ប្តីរបស់នាង។
ក្រោយទទួលបានករណីនេះ ប៉ូលិសបានកំណត់ថា បុរសបើករថយន្ត និងស្ត្រីដែលវាយបែកកញ្ចក់ គឺជាប្តី និងប្រពន្ធ (មកពីស្រុកញូថាញ់) មានទំនាស់ផ្លូវចិត្ត ដោយសារភ្លើងប្រច័ណ្ឌប្តីមានទំនាក់ទំនងស្នេហាថ្មី ខណៈពួកគេកំពុងដំណើរការលែងលះគ្នា។ ហេតុការណ៍បានកើតឡើង គឺនៅពេលប្តីយករថយន្តទៅយកស្រីស្នេហ៍ ពីព្រលានយន្តហោះ Tho Xuan ប្រពន្ធរកឃើញក៏បញ្ឈប់រថយន្ត ផ្ទុះជម្លោះផ្អើលដងផ្លូវតែម្តង៕ រក្សាសិទ្ធិដោយ៖ លឹម ហុង
