នេះជារូបភាពដ៏គួរហួសចិត្តខ្លាំងតែម្តង ខណៈដែលបានឃើញរូបភាពទាំងនេះ បង្ហាញមនុស្សម្នាដែលភាគច្រើនជាយុវវ័យប្រុសស្រី នាំគ្នាជ្រួលជ្រឺមទៅពពាក់ពពួនពេញប្រៀបនៅលើស្ពានឈើដ៏តូច ដើម្បីទស្សនាពិធីអុំប្រណាំងទូក ដែលហាក់ពុំមានការភ័យខ្លាចអាចនឹងបាក់ស្ពានសោះឡើយ។
យ៉ាងណាមិញ ទិដ្ឋភាពថ្ងៃអុំទូកនេះផងដែរ ត្រូវបានធ្វើឡើងនៅ «ស្ពានភ្ជាប់និស្ស័យបារាយណ៍មេបុណ្យ» ដែលមានទីតាំងស្ថិតនៅភូមិបន្ទាយឆ្មារកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ កាលពីថ្ងៃទី៣០ ខែតុលា ឆ្នាំ២០២២។
តាមរយៈរូបភាពបានបង្ហាញហ្វូងមនុស្សជាយុវវ័យប្រុសស្រី បានឈរឡើងណែនតាន់តាប់ នៅលើស្ពានឈើដែលត្រូវបានឃើញលេចចេញឡឹមៗប៉ប្រាសនឹងផ្ទៃទឹក ដែលឃើញហើយពិតជាគួរឲ្យភ័យខ្លាចជំនួសជាខ្លាំង ព្រោះថា ប្រសិនបើមានឧបទ្ទវហេតុកើតឡើង តើនរណាជួយយើងទាន់ ខណៈស្ពានឈើនេះ ដែលត្រូវបានដឹងថាមានប្រវែងជិត១គីឡូម៉ែត្រ មានកម្ពស់លេចក្បាលមនុស្ស។
អ្វីដែលធ្វើឲ្យគ្រប់គ្នាមានការព្រួយបារម្ភខ្លាំងនោះ គឺខ្លាចក្រែងអាចកើតមានហេតុការណ៍បាក់ស្ពានដូចនៅប្រទេសឥណ្ឌា ដែលបានកើតឡើងកាលពីពេលថ្មីៗនេះ ដែលបណ្តាលឲ្យមនុស្សយ៉ាងតិច ១៤១ នាក់ ស្លាប់៕ រក្សាសិទ្ធិដោយ៖ លឹម ហុង
