ស្នេហា តែងតែកើតឡើងព្រមជាមួយនឹងក្ដីនឹករំពឹង ដូចជា យើងរំពឹងឱ្យគេម្នាក់នោះធ្វើអ្វីម្យ៉ាង រំពឹងឱ្យមានរឿងអ្វីម្យ៉ាងកើតឡើង ឬរំពឹងឱ្យវាល្អប្រសើរឡើង ជាដើម។ តាមរយៈការសាកសួរ មនុស្សជាច្រើនបានទទួលស្គាល់ថា ពួកគេតែងនឹករំពឹងពីរឿងអ្វីម្យ៉ាងជាមួយមនុស្សម្នាក់ទៀតនោះជានិច្ច។ ដូច្នេះហើយទើបទាំងអស់នោះ បានក្លាយជាប្រភពដើមរបស់រឿង ៥យ៉ាង ដែលយើងមានសិទ្ធិនឹករំពឹងពីសេចក្ដីស្នេហា ជារឿងមូលដ្ឋានគ្រឹះធម្មតាៗ ដែលអ្នកនឹករំពឹងបាន និងសមល្មមនឹងបានទទួលក្នុងសម្ព័ន្ធភាពជាមួយគូសង្សារ។
១-រំពឹងថា ស្នេហានៅតែផ្អែមល្ហែម
ភាពផ្អែមល្ហែម ការសាងភាពភ្ញាក់ផ្អើលតិចៗ រហូតទៅដល់កិច្ចការងារលើគ្រែ ការយកចិត្តទុកដាក់បន្ថែមភាពផ្អែមល្ហែម ភាពឈ្ងុយឆ្ងាញ់ជាប់ចិត្ត ក៏ជារឿងមួយដែលគ្រប់គ្នាតែងនឹករំពឹងក្នុងសម្ព័ន្ធភាពស្នេហ៍ ហើយជឿចុះថា វានឹងធ្វើឱ្យសេចក្ដីស្នេហាកាន់តែស្ថិតស្ថេរយូរអង្វែងខ្លាំងឡើង។
២-រំពឹងមានការយល់ចិត្តអាណិតមេត្តា
ក្នុងថ្ងៃដែលមានអារម្មណ៍ថាយ៉ាប់យ៉ឺនខ្លាំង យើងត្រូវការពាក្យលួងលោម និងមានអ្នកចាំស្ដាប់ នូវអ្វីដែលយើងចង់បរិយាយ។ យើងគ្រប់គ្នា នឹករំពឹងឱ្យគូស្នេហ៍របស់យើងជួយលួងលោម ទន់ភ្លន់ជាមួយយើង និងដឹកនាំយើង ឆ្លងផុតថ្ងៃយ៉ាប់ៗទាំងនោះទៅបាន។
៣-រំពឹងមានការគោរព
ការគោរព ត្រូវតែមានឱ្យគ្នាជានិច្ច ដូចជា មិនក្បត់ចិត្ត គោរពចំពោះពេលវេលាផ្ទាល់ខ្លួន គោរពនូវអ្វីដែលគេជឿ ឬចូលចិត្ត ហើយយើងក៏មានសិទ្ធិក្នុងការនឹករំពឹងថា គូស្នេហ៍របស់យើង នឹងគោរពយើងដូចគ្នាដែរ។
៤-មានពេលវេលានៅជាមួយគ្នា
ទោះច្រើន ឬតិច ក៏សូមឱ្យមានពេលវេលាបាននិយាយគ្នា បានចែករំលែករឿងរ៉ាវ បានជួបមុខគ្នាខ្លះផង ព្រោះប្រាកដណាស់ថា ជួនកាលស្ថានការណ៍អាចនឹងធ្វើឱ្យមិនបានជួបគ្នា តែយ៉ាងហោចណាស់ ក៏បានទូរស័ព្ទរកគ្នាបន្តិច ក៏ល្អដែរ។
៥-រំពឹងថា ត្រូវតែប្រសើរជាងនៅម្នាក់ឯង
វាត្រូវតែមានអ្វីៗខ្លះហើយ ទោះជាតិចតួចក៏ដោយ តែក៏ត្រូវធ្វើឱ្យមានអារម្មណ៍ថា សម្ព័ន្ធភាពនេះ ត្រូវតែល្អប្រសើរជាងការនៅម្នាក់ឯង ព្រោះពេលសេចក្ដីស្នេហាធំធាត់ឡើង វាសមល្មមហើយ ដែលយើងនឹងទទួលបានរឿងល្អៗ។
ប្រាកដណាស់ថា យើងមានសិទ្ធិក្នុងការនឹករំពឹងលើរឿងទាំងអស់នោះ តែក៏មិនមែនមានន័យថា យើងនឹងបានទទួលជានិច្ចនោះដែរ។ អ្វីដែលគួរធ្វើ ពេលខកបំណង ឬមិនសប្បាយចិត្ត គឺការជជែកពិភាក្សាគ្នា ដើម្បីឱ្យបានយល់គ្នាកាន់តែច្រើនឡើង៕
