បុរសម្នាក់បានចែករំលែកនៅលើ Twitter ទាក់ទងករណីដែលគាត់គ្រាន់តែទុកសម្លៀកបំពាក់ និងថង់ទឹកដោះគោរបស់កូនប្រុសអាយុ ១ ឆ្នាំ នៅកៅអីខាងក្រោយរថយន្ត តែមិននឹកស្មានសោះថា វាបានធ្វើឲ្យកញ្ចក់ទ្វារថយន្តរបស់គាត់ត្រូវបានវាយបំបែកខ្ទេច ដោយសារចោរគិតថាក្នុងនោះមានរបស់មានតម្លៃ។
បុរសជាជនរងគ្រោះខាងលើ ដែលមានឈ្មោះ Irfan បានប្រាប់ថា ហេតុការណ៍ដ៏ហួសចិត្តនេះ បានកើតឡើងនៅថ្ងៃទី២៩ ខែតុលា ចន្លោះម៉ោង ៨ ដល់ ១០ យប់ ស្ថិតនៅក្នុងផ្សារទំនើបមួយកន្លែង នៅក្នុងប្រទេសម៉ាឡេស៊ី។
ជាក់ស្តែង កញ្ចក់ទ្វាចំហៀងកៅអីខាងក្រោយ ត្រូវបានវាតបំបែកខ្ទេចខ្ទី ហើយកាបូបទារកត្រូវបានបើកឡើង ប៉ុន្តែដោយសារតែមិនមានរបស់អ្វីដែលមានតម្លៃនៅក្នុងកាបូបនោះ ចោរក៏បានទុកវាចោលនៅទីនោះ។
Irfan ក៏បានឲ្យដឹងថា នៅយប់នោះ ក៏មានជនរងគ្រោះជាប្តីប្រពន្ធ បានមកប្រាប់គាត់ថា កញ្ចក់រថយន្តរបស់ពួកគេត្រូវបានវាយកម្ទេចផងដែរ។ ពួកគេបានប្រាប់គាត់ ពួកគេមិនមានសំណាងដូចគាត់ទេ គឺ Laptop របស់ក្រុមហ៊ុនទុកនៅក្នុងឡាន ត្រូវចោរលួចយកទៅបាត់។
Irfan បានឲ្យដឹងថា គាត់បានជូនដំណឹងដល់អ្នកគ្រប់គ្រងផ្សារទំនើប អំពីអ្វីដែលបានកើតឡើង ប៉ុន្តែគាត់មិនបានរាយការណ៍ករណីនេះទៅប៉ូលីសទេ ព្រោះមិនមានការបាត់បង់ទ្រព្យសម្បត្តិ។
តែទោះជាយ៉ាងណា ដោយសារ Irfan មិនចង់ឲ្យអ្នកដទៃរងគ្រោះ គាត់បានដាស់តឿនអ្នករាល់គ្នា “សូមប្រយ័ត្ន កុំទុករបស់របរថ្លៃៗក្នុងឡាន។ ខ្ញុំសង្ឃឹមថា អ្នកដទៃនឹងមិនរងគ្រោះចំពោះរឿងនេះទេ»។
Irfan ក៏បានបញ្ជាក់ឲ្យដឹងថា ករណីនេះ គាត់ត្រូវចំណាយប្រាក់ ៤២ ដុល្លារ ដើម្បីប្តូរកញ្ចក់ទ្វារថយន្តរបស់គាត់។ ហើយគាត់ក៏សង្ឃឹមថា ជនល្មើសនឹងត្រូវចាប់ខ្លួនក្នុងពេលឆាប់ៗនេះ៕ រក្សាសិទ្ធិដោយ៖ លឹម ហុង
