Joleen Diaz អាយុ ៤៥ ឆ្នាំ រស់នៅក្នុងរដ្ឋកាលីហ្វ័រញ៉ា សហរដ្ឋអាមេរិក គឺធ្លាប់ក្លាយជាប្រធានបទនៃការពិភាក្សាដ៏ក្តៅគគុករួចមកហើយ នៅពេលនាងបង្ហោះរូបភាពជាមួយកូនស្រីអាយុ ២៣ ឆ្នាំ កាលពី ៩ ឆ្នាំ មុន។
Joleen Diaz គឺជាគ្រូបង្រៀនថ្នាក់ទី៣ និងទី៤ នៅក្នុងសាលាបឋមសិក្សាមួយកន្លែង ដែលមានទីតាំងនៅភាគខាងជើងរដ្ឋកាលីហ្វ័រញ៉ា។ នាងបានទទួលពានរង្វាន់ជា “អ្នកអប់រំប្រចាំឆ្នាំ” ក្នុងឆ្នាំ២០២០។
ទោះជាយ៉ាងណាក៏ដោយ មនុស្សជាច្រើនស្គាល់នាងជាមួយនឹងរហស្សនាមថា “ម្តាយដែលក្តៅបំផុតក្នុងពិភពលោក” ដោយសារតែរូបរាងក្មេងជាងវ័យដ៏អស្ចារ្យរបស់នាង។ គ្រូស្រីជនជាតិអាមេរិករូបនេះ បានល្បីឈ្មោះ គឺបន្ទាប់ពីបានបង្ហោះរូបថតជាមួយនឹងកូនស្រី Meilani កាលពីឆ្នាំ២០១៣។
តែវេលាចេះតែរំកិលទៅមុខ រីឯកូនស្រីរបស់នាង Meilani ក៏កាន់តែមានភាពចាស់ទុំ ហេតុនេះ រូបថតរបស់ម្តាយកូនទាំងពីរ ក៏ធ្វើឱ្យគ្រប់គ្នាភ្ញាក់ផ្អើល សូម្បីតែយល់ច្រលំផងដែរ ព្រោះមិនដឹងថាជាម្តាយ និងកូនស្រី។ មនុស្សភាគច្រើនបានគិតថា អ្នកទាំងពីរគឺបងប្អូនស្រីនឹងគ្នា ដោយសារតែរូបរាងរបស់ Joleen ប្រហាក់ប្រហែលនឹងកូនស្រី។
Joleen និងកូនស្រី Meilani មានភាពស្និទ្ធស្នាលគ្នាខ្លាំង រហូតពួកគេទាំងពីរចូលចិត្តដើរលេងជាមួយគ្នា ទោះបីជាមានគម្លាតអាយុរហូតដល់ទៅ ២៣ ឆ្នាំក៏ដោយ។ ម្ដាយរូបនេះបាននិយាយថា៖ «ពេលយើងទាំងពីរចេញក្រៅ យើងតែងទៅលេងប៊ូលីង ទៅមើលកុន និងទៅដើរលេងទៅឆ្នេរ»។
ស្ត្រីជាម្តាយកើតក្នុងឆ្នាំ ១៩៧៧ រូបនេះ ក៏បានបង្ហើបឲ្យដឹងថា សព្វថ្ងៃនេះ នាងនៅលីវ គឺចាប់តាំងពីបែកបាក់ជាមួយអតីតកាលពី១៤ឆ្នាំមុន។ Joleen នៅតែបើកចំហចំពោះស្នេហាថ្មី ប៉ុន្តែការណាត់ជួបតាមអនឡាញ មិនមានភាពរលូនសម្រាប់នាងឡើយ។
ដោយសារតែរូបរាង ខុសឆ្ងាយពីអាយុខ្លាំង, Joleen ជារឿយៗបាត់បង់គណនីរបស់នាង ដោយសារតែអ្នកប្រើប្រាស់ដែលមានការសង្ស័យ បានរាយការណ៍ថា នាងនិយាយកុហកអំពីអាយុរបស់នាង ឬប្រើប្រាស់រូបថតក្លែងក្លាយ។
ទោះជាយ៉ាងណា ទន្ទឹមនឹងបញ្ហាខាងលើ អ្នកម្តាយដ៏ស្រស់ស្អាតរូបនេះ ក៏ទទួលបានសារសុំស្គាល់ និងស្នើរសុំស្នេហ៍ពីប្រុសក្មេងជាច្រើននាក់ផងដែរ។ Joleen ក៏បានបង្ហើបថា “មានបុរសវ័យក្មេងជាច្រើន បានផ្ញើសារមកខ្ញុំនៅលើប្រព័ន្ធផ្សព្វផ្សាយសង្គម។ សារភាគច្រើន គឺគួរសម ល្អ និងវិជ្ជមាន” ។
តែយ៉ាងណាមិញ នាងថា នាងមិនមានបញ្ហាអ្វីជាមួយគម្លាតអាយុនោះទេ ប៉ុន្តែទន្ទឹមនឹងនេះ នាងមិនស្វែងរកទំនាក់ទំនងលេងសើចពេញផ្លូវនោះទេ។ ខ្ញុំក៏មិនដែលគិតថា ចង់ទៅណាត់ជួបគ្នាជាមួយមនុស្សវ័យក្មេង ដែលសមធ្វើជាមិត្តនឹងកូនស្រីរបស់ខ្ញុំទេ”។
ដោយឡែក នៅពេលសួរអំពីរបៀបថែរក្សាភាពក្មេងជាងវ័យបែបនេះ Joleen បាននិយាយថា «ខ្ញុំតែងតែរក្សារបៀបរស់នៅដែលមានសុខភាពល្អ និងមានសកម្មភាពលំហាត់ប្រាណ។ លើសពីនេះ ខ្ញុំកម្រផឹកស្រា សម្រាកឱ្យបានគ្រប់គ្រាន់ និងញ៉ាំអាហារដែលមានជីវជាតិ និងមានតុល្យភាព»៕ រក្សាសិទ្ធិដោយ៖ លឹម ហុង
