ពិតណាស់ ការជួបគ្រោះថ្នាក់អ្វីមួយ នោះមនុស្សភាគច្រើន មិនមានពេលវេលា ដើម្បីបង្ហាញអារម្មណ៍សប្បាយរីករាយទេ គឺមានតែការកើតទុក្ខប៉ុណ្ណោះ។ ប៉ុន្តែ ផ្ទុយទៅវិញ យុវជនម្នាក់ដែលគេជឿថា ជានិស្សិតនៅសកលវិទ្យាល័យមួយកន្លែង នៅក្នុងប្រទេសម៉ាឡេស៊ី បែរជាថតរូបយ៉ាងឡូយ នៅកន្លែងកើតហេតុ ដែលហាក់ដូចគ្មានរឿងអ្វីកើតឡើង។
ជាក់ស្តែង តាមរយៈរូបភាពដែលត្រូវបានបញ្ចេញដោយ Kosmo បានបង្ហាញបុរសវ័យក្មេងម្នាក់ ថតរូបអង្គុយយ៉ាងសង្ហា នៅក្បាលរថយន្តទំនើបរបស់ខ្លួនម៉ាក Perodua Myvi ដែលក្រឡាប់ផ្ងារជើង ជាមួយដៃលើកជាសញ្ញា ប្រៀបដូចឈ្នះរង្វាន់អ៊ីចឹង។
ជាមួយគ្នានេះ អ្នកលេងបណ្តាញសង្គម បានចូលខមិនសូមសរសើរថា «ក្នុងចំណោមឧបទ្ទវហេតុជាច្រើន មានតែករណីមួយនេះគត់ ដែលមើលទៅពិតជាមានសោភ័ណភាពណាស់ គាត់នៅអាចញញឹមបាន សូម្បីតែរូបភាពក៏មើលទៅគួរឲ្យទាក់ទាញ, ទោះបីជា Myvi ត្រូវបានក្រឡាប់ក៏ដោយ តែគាត់នៅតែអាចស្ងប់ស្ងាត់ និងអាចធ្វើបែបនេះបានទៀត។ មិនដូចខ្ញុំទេ បើកឡាន Navara ទើបតែជួបឧបទ្ទវហេតុថ្ងៃមុន បាក់ម្រាមជើងអស់មួយ»។
រីឯអ្នកខ្លះទៀត ក៏បានសរសើរពីគុណភាពរថយន្តថា «Myvi តែងតែមានសុវត្ថិភាព និងអាចជួយសង្គ្រោះម្ចាស់បាន»៕ រក្សាសិទ្ធិដោយ៖ លឹម ហុង
