នេះជាខណៈពេលមួយដ៏ស្លុតរន្ធត់ ដែលស្រ្តីម្នាក់ ខណៈកំពុងឈប់រង់ចាំភ្លើងក្រហមសុខៗ ស្រាប់តែបង្គោលភ្លើងស្តុប រលំសង្កត់លើទាំងកម្រោល បណ្តាលឲ្យធ្លាក់ចេញពីម៉ូតូ ដេកដួលទៅនឹងថ្នល់ស្តូកស្តឹងគួរឲ្យអាសូរយ៉ាងខ្លាំង។
ហេតុការណ៍នេះ ត្រូវបានដឹងថា បានកើតឡើងនៅចំណុចភ្លើងស្តុបមួយកន្លែង នៃទីក្រុង Yuanlin ភាគខាងកើតស្រុក Changhua (តៃវ៉ាន់) វេលាម៉ោង 11:00 ព្រឹកថ្ងៃទី២ ខែកញ្ញា ឆ្នាំ២០២២ កន្លងទៅ។
បើតាមសាច់ញាតិ និងមិត្តភក្តិស្រ្តីរងគ្រោះ បានឲ្យដឹងថា ជាលទ្ធផលនៃគ្រោះថ្នាក់នេះ នាងបានបាក់ឆ្អឹងខ្នង និងឆ្អឹងជំនីជាច្រើន។ ហើយដោយសារបានជំនួយពីចៅក្រមស្រុក និងក្រុមប្រឹក្សា Mindai ជនរងគ្រោះ ក៏ត្រូវបានបញ្ជូនទៅវះកាត់នៅរសៀលថ្ងៃទី៣ កញ្ញា ដើម្បីរុញឆ្អឹងខ្នងមកវិញ និងក៏ដូចឱ្យសរសៃប្រសាទជួសជុលឡើងវិញផងដែរ។
តែទោះជាយ៉ាងណា សាច់ញាតិបាននិយាយថា នាងអាចប្រឈមនឹងការខ្វិន នៃផ្នែកខាងក្រោម នាពេលអនាគត និងសូមឲ្យមនុស្សជាទីស្រឡាញ់របស់ពួកគេមានឱកាសបានជាសះស្បើយ!។
ជាមួយគ្នានេះផងដែរ សាច់ញាតិ ក៏បានបង្ហោះសារនៅលើបណ្តាញសង្គម សំណូមពរ ដល់ផ្នែកពាក់ព័ន្ធទាំងអស់ មេត្តាជួយពួកគេផង ព្រោះជនរងគ្រោះត្រូវការជំនួយ ពីហេតុការណ៍នេះ និងស្នើឲ្យមានវិធានការទទួលខុសត្រូវខ្ពស់ ព្រោះថានេះ គឺជាគ្រោះថ្នាក់ដល់សាធារណជន…។
បើតាមពិនិត្យមើលជាក់ស្តែង បង្គោលភ្លើងស្តុបនេះ គឺស្ថិតក្នុងស្ថានភាពពុកផុយខ្លាំងទៅហើយ។ ហេតុនេះ បើមិនមានខ្យល់បោកបក់ ក៏គង់ថ្ងៃណាមួយនឹងបាក់រលំឯកឯងមិនខានឡើយ៕ រក្សាសិទ្ធិដោយ៖ លឹម ហុង
