កាលពីថ្ងៃទី៩ ខែវិច្ឆិកា ឆ្នាំ២០២២ គេហទំព័រ Daily Mail បានបង្ហាញថា Rosie Moore ជាតារាម៉ូដែលជនជាតិអាមេរិកអាយុ ២៦ ឆ្នាំ និងក៏ជាអ្នកភូមិសាស្ត្រផងដែរ បានចែករំលែកវីដេអូឃ្លីប និងរៀបរាប់ឲ្យដឹងថា ក្រុមអ្នកវិទ្យាសាស្ត្រមួយក្រុមនៅរដ្ឋផ្លរីដា (សហរដ្ឋអាមេរិក) បានវះកាត់ពស់ថ្លាន់ប្រវែង ៥.៤ ម៉ែត្រ បន្ទាប់ពីវាលេបចំណីមួយដ៏ធំចម្លែកមួយ។
តាមរយៈវីដេអូឃ្លីប គេអាចមើលឃើញថា សាកសពសត្វក្រពើមួយក្បាលមានប្រវែង ១.៥ ម៉ែត្រ ហើយវានៅមានសភាពល្អ។ តែយ៉ាងណាមិញ បន្ទាប់វីដេអូឃ្លីបនេះត្រូវបានគេបង្ហោះ ឃើញថាទទួលបានការចាប់អារម្មណ៍ និងភ្ញាក់ផ្អើលយ៉ាងខ្លាំង ដោយមានទស្សនាជាង ១០ លានដង។
Moore បាននិយាយថា នេះគឺជាពស់ថ្លាន់ភូមា (Python molurus bivittatus) ត្រូវបានកម្មករកសិដ្ឋានចាប់បាន មុនពេលជូនដំណឹងដល់អាជ្ញាធរ ខណៈឃើញមាន “វត្ថុធំនៅក្នុងពោះ” របស់វា។ នាង និងបុគ្គលិកនៅក្នុងមន្ទីរពិសោធន៍ស្រាវជ្រាវ ដែលបានចុះទៅត្រួតពិនិត្យ ដំបូងឡើយ បានយល់ថា វាប្រហែលជាសត្វក្តាន់ ប៉ុន្តែ មិននឹកស្មានថាវាជាក្រពើសោះ។
Moore បាននិយាយបន្ថែមថា «វាពិតជាគួរឱ្យភ្ញាក់ផ្អើល និងជាលើកទីមួយហើយ ដែលខ្ញុំបានឃើញរឿងបែបនេះ»។
ទោះជាយ៉ាងណា នេះជាករណីកំពុងធ្វើឲ្យពលរដ្ឋក្នុងតំបន់ បង្ហាញការព្រួយបារម្ភអំពីការលុកលុយរបស់ពស់ថ្លាន់នៅក្នុងតំបន់ Florida ដោយពួកគេបាននិយាយថា នេះជាការគំរាមកំហែងដល់សត្វព្រៃជាច្រើនប្រភេទ ព្រោះវាស៊ីគ្រប់យ៉ាងពីថនិកសត្វ រហូតដល់សត្វល្មូនតូចៗ ហើយថ្មីៗនេះ វាបានលេបត្របាក់ក្រពើមួយក្បាលដ៏កម្រ។
Moore និយាយថា ពស់ថ្លាន់បន្តពូជយ៉ាងឆាប់រហ័ស និងអាចលាក់បាំងបានយ៉ាងល្អនៅក្នុងបរិយាកាសរបស់វា។ ដូច្នេះហើយអ្នកណាក៏មិនអាចដឹងដែរថា តើពួកគេនៅទីណា ឬមានចំនួនប៉ុន្មាន? នេះជាបញ្ហាគួរឲ្យព្រួយបារម្ភណាស់ ហើយខ្ញុំជឿថា វាមិនអាចដោះស្រាយបានដោយងាយនោះទេ៕ រក្សាសិទ្ធិដោយ៖ លឹម ហុង
វីដេអូ=> Clip