នេះជាហេតុការណ៍មួយដ៏រន្ធត់ ប៉ុន្តែ អ្វីដែលសំណាងបំផុតនោះ គឺមនុស្ស ៦ នាក់ បានរងរបួសស្រាលប៉ុណ្ណោះ បន្ទាប់ពីដើមឈើដ៏ធំមួយដើម បាក់រលំសង្កត់លើរថយន្តរបស់ពួកគេ នៅតាមបណ្តោយផ្លូវ Jalan Mahkota ក្នុងតំបន់ Taman Maluri, ជាយក្រុង និងស្រុក Cheras ប្រទេសម៉ាឡេស៊ី កាលពីថ្ងៃទី៦ ខែវិច្ឆិកា អំឡុងពេលភ្លៀងធ្លាក់ខ្លាំង។
លោក Mazuri Mat Zain មេបញ្ជាការប្រតិបត្តិការនៃនាយកដ្ឋានពន្លត់អគ្គីភ័យ និងសង្គ្រោះ បាននិយាយថា ឧបទ្ទវហេតុនេះ ពាក់ព័ន្ធនឹងរថយន្តចំនួន ៣ គ្រឿង និងម៉ូតូមួយគ្រឿង ដែលកំពុងធ្វើដំណើរឆ្លងកាត់តំបន់នោះ នៅពេលដែលដើមឈើដ៏ធំមួយដើម ត្រូវបានបាក់រលំដោយសារខ្យល់បោកបក់ខ្លាំង។
បន្ទាប់ពីទទួលបានដំណឹងពីហេតុការណ៍នេះ នៅវេលាម៉ោង ៤ និង ០៧ នាទីរសៀល នាយកដ្ឋានបានបញ្ជូនរថយន្តពន្លត់អគ្គីភ័យចំនួន ១៨ គ្រឿង ចេញពីស្ថានីយ៍ពន្លត់អគ្គីភ័យ Hang Tuah និង Bandar Tun Razak និងព្រមទាំងអង្គភាពជំនួយសេវាសង្គ្រោះបន្ទាន់ទៅកាន់កន្លែងកើតហេតុ។
ជនរងគ្រោះទាំង៦នាក់ មានបុរស២នាក់ ស្រី២នាក់ និងកុមារ២នាក់ ដែលមានអាយុចន្លោះពី២ឆ្នាំ ទៅ៧០ឆ្នាំ បានរងរបួសស្រាល និងត្រូវបានបញ្ជូនទៅព្យាបាលនៅមន្ទីរពេទ្យ Ampang។
លោក Mazuri បានបន្តថា៖ «ការកាប់ និងស្ទួចដើមឈើដែលរលំលើរថយន្តចេញពីផ្លូវ ត្រូវបានអនុវត្តជាបន្ទាន់ផងដែរ ដើម្បីជួយសង្គ្រោះជនរងគ្រោះ និងកុំឲ្យកកស្ទះចរាចរណ៍។ លោកបាននិយាយនៅក្នុងសេចក្តីថ្លែងការណ៍មួយថា កងកម្លាំងការពារជនស៊ីវិល និងសាលាក្រុង Kuala Lumpur បានចូលរួមជួយសង្គ្រោះនៅក្នុងប្រតិបត្តិការនេះ។
រូបភាព និងវីដេអូ ត្រូវបានគេចែកចាយពេញបណ្ដាញសង្គម ខណៈដែលអ្នកទស្សនាបានបញ្ចេញមតិផ្សេងៗគ្នា ជុំវិញហេតុការណ៍ដ៏រន្ធត់នេះ៕ រក្សាសិទ្ធិដោយ៖ លឹម ហុង
— Lucifer (@Crynaux) November 6, 2022