ខេត្តស្វាយរៀង៖ ដោយមានការចង្អុលបង្ហាញពីសំណាក់ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសនិងក្រោមការបញ្ជាផ្ទាល់ពីឯកឧត្តមឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង ព្រមទាំងមានការសម្របសម្រួលដោយលោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀងដឹកនាំដោយលោកវរៈសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀងធ្វើការឃាត់ខ្លួនជនជាតិវៀតណាមប្រុសស្រី៥នាក់ និងជនជាតិខ្មែរម្នាក់ជាបន្តបន្ទាប់រួមនិងថ្នាំញៀនជាង៤គីឡូក្រាម ព្រមទាំងសម្ភារៈប្រើប្រាស់មួយចំនួនផ្សេងទៀតចំនួន២លើក។
បើតាមប្រសាសន៍របស់លោកលោកវរៈសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀងបានមានប្រសាសន៍ឲ្យដឹងនាសៀលថ្ងៃទី៩ ខែវិច្ឆិកា ឆ្នាំ២០១៧នេះថា៖ នៅវេលាម៉ោង២៣និង៥៥នាទី ថ្ងៃទី៧ ខែវិច្ឆកា ឆ្នាំ២០១៧ កម្លាំមន្ទីរយុត្តិធម៌កងរាជអាវុធហត្ថខេត្តបានធ្វើប្រតិបត្តិការបង្ក្រាបនិងឃាត់ខ្លួនមុខសញ្ញារក្សាឬជួញដូរដោយខុសច្បាប់នូវសារធាតុញៀន ស្ថិតនៅភូមិ បាវិតកណ្តាល សង្កាត់ បាវិត ក្រុងបាវិត ខេត្តស្វាយរៀង បានជនសង្ស័យចំនួន២នាក់៖ទី១.មានឈ្មោះ យូ យាំងហ៊ុង ភេទប្រុស អាយុ៤៣ឆ្នាំ មុខរបរជាងកាត់សក់មានទីលំនៅបច្ចុប្បន្នសង្កាត់អូរឬស្សី១ ខណ្ឌ៧មករា រាជធានីភ្នំពេញ។ ទី២.ឈ្មោះ ប៉ែន ដារ៉ា ភេទប្រុស អាយុ ៤៥ឆ្នាំ ជនជាតិវៀតណាម មុខរបរជាងសំណង់មានទីលំនៅបច្ចុប្បន្ន សង្កាត់ បឹងសាឡាង ខណ្ឌទួលគោក រាជធានីភ្នំពេញ។ វត្ថុតាងរួមមាន៖ ទី១.ម្សៅក្រាមពណ៌សថ្លាចំនួន១កញ្ចប់ធំទម្ងន់៦៦៥.១ក្រាម ទី២.ថ្នាំគ្រាប់ពណ៌ផ្ទៃមេឃចំនួន១កញ្ចប់ធំទម្ងន់ ៦៣៦.៨ក្រាម ទី៣. ទូរស័ព្ទដៃចំនួន៥គ្រឿង ទី៤.ប្រាក់រៀលចំនួន៥៧,៥០០រៀល ទី៥.អត្តសញ្ញាណប័ណ្ណសញ្ជាតិខ្មែរចំនួន១សន្លឹក ទី៦.សម្ភារៈប្រើប្រាស់គ្រឿងញៀនមួយចំនួន។
លោកវរៈសេនីយ៍ឯក ស្រី វុត្ថា បានឲ្យដឹងទៀតថា៖យោងតាមការសារភាពរបស់ជនសង្ស័យខាងលើកម្លាំងអាវុធហត្ថខេត្តបានសហការជាមួយកម្លាំងកងរាជអាវុធហត្ថរាជធានីភ្នំពេញបានចុះប្រតិបត្តិការនិងបង្ក្រាបជាបន្តបន្ទាបនូវមុខសញ្ញាជួញដូរគ្រឿងញៀននៅចំនុចបន្ទប់ខុនដូរមួយកន្លែងលេខ៨០២ជាន់ទី៨ក្រុមទី៧៨ សង្កាត់ ទន្លេបាសាក់ ខណ្ឌចំការមន រាធានីភ្នំពេញ បានធ្វើការឃាត់ខ្លួនជនសង្ស័យបានចំនួន៤នាក់ក្នុងនោះស្រី២នាក់រួមនិងថ្នាំញៀនជាច្រើននិងសម្ភារៈប្រើប្រាស់ផងដែរ។
លោវរៈសេនីយ៍ឯកបានបន្តឲ្យដឹងទៀតថា៖ជនសង្ស័យដែលសមត្ថកិច្ចយើងឃាត់ខ្លួនបានទាំង៤នាក់នោះ។ទី១.មានឈ្មោះ ចឹង ង៉ុកថាន់ ភេទស្រី អាយុ ៣៧ឆ្នាំជនជាតិវៀតណាមមុខរបរអាជីវករមានទីលំនៅសង្កាត់ ទួលសង្កែ ខណ្ឌឬស្សីកែវ រាជធានីភ្នំពេញ ទី២.ឈ្មោះ ទិន ធីង៉ុកធី ភេទស្រី អាយុ ៣០ឆ្នាំ មុខរបររ៉ូលិញមានទីលំនៅភូមិ កាំបិុញ ឃុំ កាំយ៉ាង ស្រុក ហ្គាវយ៉ាវ ខេត្ត តៃនិញ ប្រទេសវៀតណាម ទី៣. ង ត្រឹងអាន់ ភេទប្រុស អាយុ ៣០ឆ្នាំ ជនជាតិវៀតណាម មុខរបរមិនពិតប្រាកដមានទីលំនៅភូមិ ជាងថាំង ឃុំ ធីត្រឹងវិញហឹង ស្រុក វិញហឹង ខេត្តឡុងអាន ប្រទេសវៀតណាម ទី៤.ឈ្មោះ សុខ សុភ័ក្រ ភេទប្រុស អាយុ ៣៥ឆ្នាំជនជាតិខ្មែរ មុខរបរជាងតុទូមានទីលំនៅបច្ចុប្បន្នសង្កាត់ ផ្សារដើមថ្កូវ ខណ្ឌចំកាមន រាធានីភ្នំពេញ។
វត្ថុតាងដកហូតរួមមាន៖១.ម្សៅម៉ត់ពណ៌ស(សង្ស័យថាថ្នាំញៀន)៦កញ្ចប់ទម្ងន់២,៥៧៧.៩ក្រាម។ ២.ថ្នាំគ្រាប់ពណ៌ផ្ទៃមេឃចំនួន១កញ្ចប់ទម្ងន់៣២២,១ក្រាម ៣.ជញ្ជីសម្រាប់ថ្លឹងគ្រឿងញៀន១។ ៤.ទូរស័ព្ទដៃចំនួន៣គ្រឿង។ ៥.ប្រាក់រៀលចំនួន៣០.០០០រៀល។ ៦.ប្រាក់ដុល្លារចំនួន៦០០$។ ៧.លុយដុង ចំនួន២០០.០០០ដុង។ ៨.ខ្សែករលោហៈសាធាតុពណ៌លឿងចំនួន១ខ្សែនិងបន្តោង១។ ៩.នាឡិកាដៃ១គ្រឿង។ ១០.សម្ភារៈប្រើប្រាស់គ្រឿងញៀនមួយចំនួន។ បច្ចុប្បន្នជនសង្ស័យនិងវត្ថុតាងកំពុងឃាត់ខ្លួននិងរក្សាទុកនៅមន្ទីរយុត្តិធម៌នៃទីបញ្ជាការដ្ឋានកងរាជអាវុធហត្ថខេត្តស្វាយរៀង ដើម្បីកសាងសំណុំរឿងបញ្ចួនទៅតុលាការដើម្បីចាត់ការតាមនីតិវិធីច្បាប់៕វ៉ៃកូ
