ទាំងអស់គ្នាប្រហែលជាបានដឹងច្បាស់ហើយថា បើចង់មានសុខភាពរឹងមាំល្អ និងចង់សម្រកទម្ងន់ ឱ្យរាងរៅស្គមស្វែលស្អាត ស្លៀកពាក់ខោអាវលេខ M ឬលេខ S បាននោះ ត្រូវតែចេះតម ឬកាត់បន្ថយការទទួលទានអាហារខ្លាញ់ៗ តែ មុននឹងតាំងចិត្ត ខំប្រឹងប្រែងតមពួកអាហារខ្លាញ់ៗយ៉ាងម៉ឺងម៉ាត់នោះ យើងគួរតែនាំគ្នាមកដឹងពីដំបូន្មានល្អៗជាមុនសិនប្រសើរជាងថា តើយើងគួរត្រៀមខ្លួនយ៉ាងណា និងត្រូវតមអាហារខ្លាញ់យ៉ាងត្រឹមត្រូវយ៉ាងណាខ្លះ?
រឿងដែលត្រូវដឹងមុនតមអាហារខ្លាញ់ដោយសារតែមានមិត្តភក្តិម្នាក់ បានលើកប្រធានបទមួយមកជជែកគ្នាថា តើយើងត្រូវប្រើវិធីណាល្អ ក្នុងការឈប់ញ៉ាំអាហារខ្លាញ់ៗនោះ ទើបយើងត្រូវលើកយកចំណុចគួរដឹង សម្រាប់ណែនាំដល់អ្នកដែលចង់សម្រកទម្ងន់ និងចង់មានសុខភាពរឹងមាំ មកជម្រាបជូនដូចតទៅ…
១.រកមូលហេតុឱ្យឃើញជាមុនសិនថា តើយើងចង់កាត់បន្ថយ និងឈប់ញ៉ាំអាហារខ្លាញ់ៗនេះ ដើម្បីអ្វី?
គឺដើម្បីសុខភាពល្អ! រឿងហ្នឹងអ្នកណាក៏គេដឹងដែរ តែគោលដៅក្នុងការកាត់បន្ថយរបស់យើងហ្នឹង គឺដើម្បីសុខភាព លើផ្នែកណាមួយ?
-រូបរាង?
-ទម្ងន់ខ្លួន?
-ខ្លាចជំងឺដែលមកជាមួយភាពធាត់?
ឬខ្លាចជាតិស្ករនៅក្នុងឈាម ឡើងខ្ពស់ខុសប្រក្រតី?
អ្វីដែលត្រូវតែដឹងជាមុននោះ គឺដោយសារតែថា ហេតុនីមួយៗនោះ មានការកាត់បន្ថយ ឬតម មិនដូចគ្នាទេ និងជួនកាលការកត់បន្ថយអាហារខ្លាញ់ អាចនឹងមិនមែនជាការកែសម្រួលហេតុ ឬបញ្ហាទាំងនោះទៀតផង។ ឧទាហរណ៍…
-ដូចអ្នកខ្លះ កាត់បន្ថយអាហារខ្លាញ់ ដើម្បីសម្រកទម្ងន់…តែខ្លួនឯងមិនទាំងបានញ៉ាំអាហារខ្លាញ់ច្រើន និងមិនបានពិនិត្យមើលថា តើខ្លួនឯងឡើងទម្ងន់ដោយសារអ្វីផង?
-អ្នកខ្លះ ត្រូវការកែសម្រួលរូបរាង តែអាផ្នែកដែលត្រូវការកែសម្រួលនោះ វាមិនបានពាក់ព័ន្ធនឹងអាហារខ្លាញ់សោះ ដូចជា ចង់ឱ្យសាច់ដុំដៃមាំមួន ក៏តម លែងញ៉ាំអាហារខ្លាញ់…តែអត់ព្រមទៅហាត់ប្រាណ លើកដុំដែក ហើយអ៊ីចឹង សួរថា តើនឹងមានសាច់ដុំដៃបានដែរឬ?
-អ្នកខ្លះត្រូវការបញ្ចុះជាតិខ្លាញ់ ដើម្បីសម្រកទម្ងន់ ទាំងដែលបច្ចុប្បន្នដឹងច្បាស់ហើយថា បើសម្រកខ្លាញ់ តែមិនបន្ថយជាតិស្ករ ទោះសម្រកយូរប៉ុនណា ក៏មិនបានលទ្ធផលដែរ។
២.គោលការណ៍ពេទ្យសម័យទំនើប មិនបានឱ្យអត់ ឬតមអាហារខ្លាញ់ទេ
-ដោយសារខ្លាញ់ គឺជាវត្ថុចាំបាច់ចំពោះរាងកាយ តែទទួលបានច្រើនពេក ក៏មិនល្អ ទទួលបានតិចពេក ក៏មិនល្អដែរ
-បច្ចុប្បន្ននេះ វេជ្ជសាស្រ្តសម័យថ្មី គេសង្កត់ធ្ងន់លើការញ៉ាំអាហារយ៉ាងមានតុល្យភាព គ្រប់ប្រភេទក្រុមអាហារ មិនមែនសង្កត់ធ្ងន់ ឬតម្រង់ទៅលើតែគុណប្រយោជន៍ ឬគុណវិបត្តិរបស់សារធាតុអាហារប្រភេទណាមួយនោះទេ។
៣.តើយើងត្រូវញ៉ាំអាហារខ្លាញ់ច្រើន-តិចប៉ុនណា?
អ្នកខ្លះចង់បន្ថយខ្លាញ់ តែមិនដឹងថា ខ្លួនឯងបានញ៉ាំខ្លាញ់ច្រើន ឬតិចប៉ុនណាហើយទេ? ដល់ពេលមិនដឹងថា ពីដំបូងខ្លួនឯងបានញ៉ាំវាច្រើន ឬតិចប៉ុនណាទេនោះ ធ្វើឱ្យពេលកាត់បន្ថយ ឬតមទៅហើយ វាធ្វើឱ្យពិបាកវាយតម្លៃ និងមិនអាចកំណត់គោលដៅបាន។
៤.បន្ថយអាហារខ្លាញ់ តែត្រូវប្រយ័ត្ន ការបន្ថយខ្លាំងជ្រុលពេក
-គោលការណ៍នៃការតមអាហារខ្លាញ់ គឺត្រូវមិនតមរហូតដល់អត់ញ៉ាំសោះនោះទេ…ព្រោះជាតិខ្លាញ់ ក៏ជាវត្ថុមួយ ដែលរាងកាយត្រូវប្រើប្រាស់ដែរ
-បើបន្ថយជាតិខ្លាញ់ខ្លាំង និងកំណត់លើតែកម្លាំងថាមពល រាងកាយនឹងសម្រួលខ្លួន ចូលទៅនៅក្នុងក្រុមមនុស្សខ្វះអាហារបរិភោគ សាច់ដុំនឹងបាត់អស់ ហើយយូរទៅ រាងកាយងាយនឹងត្រឡប់មកធាត់ជាថ្មីម្ដងទៀត។
៥-ជាតិខ្លាញ់ដែលគួរបញ្ឈប់មែនទែននោះគឺ ខ្លាញ់ថ្រានស៍ ហ្វ៊ែត( Trans Fat)
ចំណែកខ្លាញ់ផ្សេងទៀត ដូចជា ខ្លាញ់សត្វ ខ្លាញ់ត្រី ប្រេងដូង ប្រេងរុក្ខជាតិផ្សេងៗ អាចញ៉ាំបាន តែត្រូវគ្រប់គ្រងបរិមាណយ៉ាងសមរម្យ៕
