ដូចដែលប្រិយមិត្តជាច្រើនបានទទួលជ្រាបហើយ វត្តមានរបស់ព្រះអង្គម្ចាស់ Adul Mateen ព្រះរាជបុត្ររបស់ស្តេចព្រុយណេ ជាពិសេសរូបភាពរត់ហាត់ប្រាណកណ្តាលភ្លៀង ឃើញថាបានក្លាយជាប្រធានបទក្តៅគគុក នៅលើបណ្តាញទំនាក់ទំនងសង្គម ខណៈគេបានឃើញនារីសម័យថ្មីមួយចំនួនធំ ហាក់ជ្រួលច្រឺមលង់ស្នេហ៍ ទៅនឹងរូបរាងដ៏ស្រស់សង្ហារបស់ទ្រង់ជាខ្លាំង។
តែទន្ទឹមនឹងនេះ ក៏មានមនុស្សប្រុសស្រីខ្មែរមួយចំនួនខ្លះ ដែលហាក់មានការច្រណែន បែរជានាំគ្នារិះគន់ចំអកប្រមាថក្នុងន័យមិនល្អផ្សេងៗ និងថា គ្មានអ្វីគួរឲ្យចាប់អារម្មណ៍ផងជាដើម។ ប៉ុន្តែ អ្វីដែលមិននឹកស្មានដល់នោះ គឺក្នុងចំណោមនោះ គេក៏បានឃើញក្រុមពិធីករប្រុសស្រី២នាក់ គឺអ្នកនាង គង់ ចាន់ស្រីមុំ និងលោក ដេវីត បាននាំគ្នានិយាយលេងសើចឆាតទៅព្រះអង្គម្ចាស់ព្រុយណេ ដោយប្រើប្រាស់ពាក្យសំដីដ៏មិនសមរម្យ ទៅកាន់ព្រះអង្គ ប្រៀបដូចមនុស្សបាតផ្សារអ៊ីចឹង។
ពិតណាស់ វីដេអូរបស់ពួកគេ ត្រូវបានចែករំលែកដូចទឹកបាក់ទំនប់ ជាមួយមតិមហាជនផ្ទុះកំហឹងយ៉ាងខ្លាំង ក្នុងគេបានដាក់ឲ្យធ្ងន់ៗថា ពួកអាតាណើប មីតាណើប ខ្លួនជាតារាលេងសើចមិនចេះគិត, មិនដឹងជាតារាប៉ាកាច់យ៎អីទេ និយាយសើចជំទាលចំអកដល់គេជាស្តេច សមតែដាក់គុកម្តងបានត្រូវ។
ថាមិនខុសមែន! ក្រោយពីបានឃើញមហាជនជាច្រើនបានសម្ដែងការខឹងសម្បារ និងប្រតិកម្មខ្លាំងៗ មានឯណា ស្រាប់តែថ្ងៃទី១៦ ខែវិច្ឆិកា ឆ្នាំ២០២២ ទាំងលោក ដេវីត និងអ្នកនាង គង់ ចាន់ស្រីមុំ បានចេញមុខសុំទោសមហាជនជាសារធារណៈ និងទទូចសុំឲ្យផ្ដល់ឱកាសដល់ពួកគេពីរ ដើម្បីជាការកែខ្លួនជាថ្មីផង។
ក្នុងនោះ លោក ដេវីត ដែលបានប្រើប្រាស់សំដីបាតផ្សារ បានចេញមុខសុំទោសថា៖ «ខ្ញុំបាទ ពិតជាសូមទោសនូវរាល់ទង្វើគ្រប់យ៉ាងដែលបានកើតឡើង ដូចដែលអ្នកទាំងអស់គ្នាបានឃើញនៅក្នុងវីដីអូ។ ខ្ញុំបាទ ពិតជាសោកស្តាយណាស់ ដែលមានរឿងនេះកើតឡើង ហើយធ្វើអោយប៉ះពាល់ដល់អ្នកទាំងអស់គ្នាយ៉ាងធ្ងន់ធ្ងរ។ ដោយហេតុតែខ្ញុំបាទ លេងសើចជ្រុលជ្រួសលើសដែនកំណត់ ពុំបានគិតដិតដល់ ហើយក៏មិននឹកស្មានថា វីដេអូនេះ ត្រូវបានផុសជាសាធារណៈដែរ។ បន្ទាប់ពីបានបង្ហោះប្រមាណ១០នាទី ខ្ញុំបាទ បានភ្ញាក់រលឹកក៏លុបចោលភ្លាមៗ តែមិននឹកស្មានថា រឿងនេះបានធ្វើអោយបងប្អូនប្រតិកម្មយ៉ាងខ្លាំង។ នេះជាមេរៀនធំមួយសម្រាប់ខ្ញុំបាទ ហើយខ្ញុំបាទ ដឹងថា កំហុសនេះពិតជាមិនអាចលើកលែងអោយបាន តែសូមចិត្តបងប្អូនទាំងអស់យោគយល់ និងអនុគ្រោះ ព្រោះខ្ញុំបាទ ពុំដែលមានគំនិតមាក់ងា.យ បន្ទោសបន្ទាប ជាតិសាសន៍ ឬទៅលើបុគ្គលណាមួយឡើយ។ អាស្រ័យហេតុនេះ សង្ឃឹមថា បងប្អូនទាំងអស់គ្នា លើកលែងទោស និងផ្តល់ឱកាសអោយខ្ញុំបាទផងចុះ»។
រីឯអ្នកនាង អ្នកនា ងគង់ ចាន់ស្រីមុំ វិញ ក៏បានធ្វើការស៊ែរផុសលោកដេវីត ដោយភ្ជាប់ជាមួយសំណេរលើកឡើងថា «សុំទោស រាល់កំហុសគ្រប់យ៉ាងដែលពួកយើងលេងដោយអចេតនា និងមិនបានគិត សង្ឃឹមថាគ្រប់គ្នានឹងលើកលែង ហើយផ្តល់ឱកាសម្តងទៀត»។
តែបើទោះជាអ្នកទាំងពីរបានធ្វើការសុំទោសយ៉ាងណា តែមហាជនជាច្រើនហាក់មិនចង់ទទួលយក ដោយថា គួរចាប់ដាក់គុកឲ្យរៀងម្តងបានត្រូវ អាក្មេងឈ្លើយអាងអីសុំទោស បើនៅ Korea ខាងត្បូងវិញ ហេងស៊យ១៥ឆ្នាំក្នុងគុកបាត់, នេះក៏ព្រោះតែប្រទេសខ្មែរយើងឥឡូវ យកទម្លាប់វប្បធម៌សុំទោស យោគយល់ អាធ្យាស្រ័យ មកអនុវត្តជំនួសដោយច្បាប់ជាតិ ដែលបានបង្កើតឡើងឥតន័យ ទើបបានជាពួកអស់ទាំងនេះនៅតែគគ្លើន៕ រក្សាសិទ្ធិដោយ៖ លឹម ហុង
