ទំព័រហ្វេសប៊ុក Node នៅថ្ងៃទី២២ ខែវិច្ឆិកា ឆ្នាំ២០២២ បានរាយការណ៍ថា មន្រ្តីប៉ូលីសនៅប៉ុស្តិ៍ Bang Yi Khan រួមជាមួយអ្នកស្ម័គ្រចិត្ត បានជួយសង្គ្រោះមានស្រ្តីមានផ្ទៃពោះម្នាក់ ដែលប៉ុនប៉ងលោតទឹកសម្លាប់ខ្លួនជាមួយកូនស្រីអាយុ ៤ ឆ្នាំ។ ហេតុការណ៍នេះ បានកើតឡើងនៅស្ពាន Somdet Phra Pinklao (ឆ្លងកាត់ពី Phra Nakhon ឆ្ពោះទៅខាង Thonburi) នៃទន្លេ Chao Phraya ប្រទេសថៃ។
នៅពេលមកដល់ ប៉ូលិស និងក្រុមសង្គ្រោះ បានក៏ប្រទះឃើញស្ត្រីម្នាក់ កាន់កូនស្រីអាយុ៤ឆ្នាំ ឈរនៅមាត់ស្ពាន ដោយស្រ្តីជាម្តាយឈរនៅខាងក្រៅបង្កាន់ដៃការពារស្ពាន ខណៈកំពុងស្រែកទ្រហោយំយ៉ាងខ្លាំង។ ពេលសួរនាំដំបូង ស្ត្រីរូបនោះ បានប្រាប់ថា នាងមានភាពតានតឹងផ្លូវចិត្តយ៉ាងខ្លាំង ដោយសារបាត់បង់ការងារធ្វើ និងគ្មានលុយសម្រាប់ទិញអាហារឲ្យកូនហូប។
តែយ៉ាងណា បន្ទាប់ព្យាយាមលួងលោមអស់រយៈពេលជាង១ម៉ោង ប៉ូលិស និងក្រុមសង្គ្រោះជំនាញ បានជួយលើកស្រ្តីមានផ្ទៃពោះ និងកូនស្រីរបស់នាង ចូលមកលើស្ពានវិញដោយសុវត្ថិភាព មុននឹងនាំយកទៅនៅប៉ុស្តិ៍ប៉ូលិស Bang Yi Khan ដើម្បីរង់ចាំទាក់ទងទៅគ្រួសារសាច់ញាតិ មកទទួលយកត្រឡប់វិញ។
នៅប៉ុស្តិ៍ប៉ូលិស ស្រ្តីមានអាយុ ២១ ឆ្នាំ រូបនេះ បានរៀបរាប់ទាំងទឹកភ្នែកថា នាងបានបែកពីប្តី ត្រូវរកស៊ីចិញ្ចឹមកូនស្រីតែម្នាក់ឯង អស់មួយរយៈហើយ ហេតុនេះ នាងមានអារម្មណ៍នឿយហត់ និងបាក់ទឹកចិត្តយ៉ាងខ្លាំង រកគិតអ្វីមិនចេញនោះទេ។
នាងបន្តថា ដោយសារមានផ្ទៃពោះ៣ខែ ស្របពេលជួបបញ្ហាហរិញ្ចវត្ថុ លក់ដូរខាតអស់ដើមអស់ចុង ហើយថែមទាំងប្តីទៅមានអ្នកថ្មីទៀត ជាហេតុធ្វើឲ្យនាងតានតឹងផ្លូវចិត្តខ្លាំង ទើបគិតចង់ធ្វើអត្តឃាតជាមួយកូនស្រីតែម្តងទៅ៕ រក្សាសិទ្ធិដោយ៖ លឹម ហុង
