ថ្មីៗនេះ ដោយឃើញឆ្កែមួយក្បាលមកដេកលើផ្លូវដែលត្រូវគេចាក់កៅស៊ូ ក្រុមកម្មករឥណ្ឌានេះមិនបានដេញវាចេញឡើយ ហើយពួកគេបានចាក់កៅស៊ូពីលើវាយ៉ាងព្រៃផ្សៃ ។
កាសែត Daily Mail ឲ្យដឹងថា កម្មករធ្វើផ្លូវមួយក្រុម គួរណាស់ដាស់ ឬដេញឆ្កែនោះចេញ ដើម្បីពួកគេចាក់កៅស៊ូធ្វើថ្នល់ ប៉ុន្តែពួកគេបែរជាចាក់កៅស៊ូពីលើវា ធ្វើឲ្យក្តៅប្រកាច់រហូតដល់ងាប់ ។
មិនត្រឹមតែប៉ុណ្ណោះ ក្រោយពេលកំណាត់ផ្លូវគេចាក់ពង្រាបហើយ ក៏បន្សល់ខ្មោចឆ្កែនេះនៅលើផ្លូវតែម្តង ។
ប្រជាជនជននៅក្នុងតំបន់ពិតជាតក់ស្លុតចំពោះទស្សនីយភាពបន្សល់ទុករបស់ក្រុមកម្មករលែងមានចិត្តជាមនុស្សទាំងនោះ ។
ក្រោយមកក្រុមប្រជាជនបានប្រមូលគ្នា ហើយទៅប្តឹងនៅមន្ទីរគមនាគមន៍តំបន់នោះ ប៉ុន្តែមន្ទីរនេះធ្វើព្រងើយ ហើយប្រាប់ថាវាជារឿងរបស់ក្រុមហ៊ុនម៉ៅការ ។
ដោយខឹងសម្បារខ្លាំងពេក ពួកគេក៏នាំគ្នាទៅបង្ខាំងមិនឲ្យក្រុមហ៊ុននោះធ្វើការបាន រហូតទាល់តែតំណាងក្រុមហ៊ុនមកចរចា នឹងធ្វើការសុំទោសជំនួសឲ្យពួកកម្មករ “គ្មានចិត្តគ្មានថ្លើម” ទាំងនោះ ហើយសន្យានឹងកាយខ្មោចឆ្កែយកចេញពីថ្នល់ទៅកប់៕ ចន្ទ្រា
