ការសម្រេចចិត្តរបស់និស្សិតស្រីចិនម្នាក់ ដែលបញ្ចប់ការសិក្សានៅសកលវិទ្យាល័យ ចូលធ្វើការនៅក្នុងទីបញ្ចុះសព បានធ្វើឱ្យមនុស្សជាច្រើនមានការភ្ញាក់ផ្អើល និងបង្កឱ្យមានការជជែកដេញដោល តាមអ៊ីនធឺណិត ចំពោះចំណូលចិត្តដ៏មិននឹកស្មានរបស់នាង។
និស្សិតនោះមានឈ្មោះថា Tan អាយុ ២២ ឆ្នាំ បានកំពុងទទួលការចាប់អារម្មណ៍ខ្លាំង នៅលើប្រព័ន្ធផ្សព្វផ្សាយសង្គមដីគោក បន្ទាប់ពីការចែករំលែករូបភាពវីដេអូនៃកន្លែងធ្វើការ “សន្តិភាព” របស់នាង នៅទីបញ្ចុះសពនៅលើភ្នំ នៃទីក្រុង Chongqing ភាគខាងលិចប្រទេសចិន។
Tan ដែលស្នាក់នៅក្នុងអន្តេវាសិកដ្ឋាន ជាមួយមិត្តរួមការងាររបស់នាង បាននិយាយថា «ខ្ញុំសូមបង្ហាញអ្នកទាំងអស់គ្នា ពីបរិយាកាសការងាររបស់ខ្ញុំជាអ្នកចាំទីផ្នូរ Generation Z ។ វាជាការងារសាមញ្ញ និងក៏មិនស្រួលនោះដែរ»។ ប៉ុន្តែ នាងនិយាយថា «ការងារនេះផ្តល់នូវពេលទំនេរច្រើន ជាមួយទិដ្ឋភាពដ៏ស្រស់ត្រកាល មានឆ្កែ មានឆ្មា និងអ៊ីនធើរណែតផងដែរ»។ នាងក៏ពណ៌នាអំពីមុខតំណែងនេះថាជា «ជីវិតនៃការចូលនិវត្តន៍មុនអាយុ»។ ភារកិច្ចរបស់នាងរួមមាន ការទទួលភ្ញៀវ លក់ផ្នូរ និងការបោសសម្អាតផ្នូរ ក្នុងនាមតំណាងឲ្យសាច់ញាតិនៃអ្នកស្លាប់។
Tan ទទួលបានប្រាក់ខែប្រហែល ៤០០០ យន់ (៥៦០ ដុល្លារ)។ នាងធ្វើការ៦ថ្ងៃក្នុងមួយសប្តាហ៍ ចាប់ពីម៉ោង ៨:៣០ ព្រឹក ដល់ ៥ ល្ងាច ជារៀងរាល់ថ្ងៃ ជាមួយនឹងការសម្រាក២ម៉ោង សម្រាប់អាហារថ្ងៃត្រង់។
ឆ្លើយតបទៅនឹងមតិលើកឡើងថា ធ្វើការនៅទីកន្លែងនេះ នាំឲ្យសំណាងមិនល្អ, Tan ដែលបានសិក្សាផ្នែកគ្រប់គ្រងបញ្ចុះសព និងទីបញ្ចុះសព នៅសាកលវិទ្យាល័យ បាននិយាយថា នេះជាការងារធម្មជាតិសម្រាប់នាង ហើយអ្វីដែលនាងកំពុងធ្វើ គឺនាងយល់ឃើញថាធម្មតាប៉ុណ្ណោះ។ នាងក៏បាននិយាយថា «ខ្ញុំពេញចិត្តនឹងជីវិតរបស់ខ្ញុំនៅពេលនេះ ហើយខ្ញុំនឹងនៅជាប់នឹងការងារនេះរហូត»។
គួរបញ្ជាក់ថា ទីផ្សារសេវាពិធីបុណ្យសពរបស់ប្រទេសចិន បានកំពុងរីកយ៉ាងខ្លាំង ក្នុងរយៈពេលប៉ុន្មានឆ្នាំចុងក្រោយនេះ ដោយសារចំនួនប្រជាជនកាន់តែចាស់៕ រក្សាសិទ្ធិដោយ៖ លឹម ហុង
