Monday, November 28, 2022

មកមើល ខុនដូ គេផង…

spot_img

ពិភពលោកអនឡាញ បានកំពុងចែករំលែកយ៉ាងផុសផុល ពីរូបភាពដ៏ចាប់អារម្មណ៍ បង្ហាញទិដ្ឋភាពសត្វឆ្កែជាច្រើនក្បាល កំពុងរស់នៅក្នុងរូង នៃពំនូកខ្សាច់ដ៏ធំ ដែលមនុស្សជាច្រើន ចាត់ទុកដូច «ខុនដូ» ដ៏ប្រណីតអ៊ីចឹង។

យ៉ាងណាមិញ រូបភាពដ៏អស់ទាស់ទាំងនេះ ត្រូវបានបង្ហោះដោយគណនីហ្វេសប៊ុកឈ្មោះ JoyceJoyce Joyce ដែលបានភ្ជាប់សំណេរទាំងអស់សំណើចយ៉ាងដូច្នេះថា៖ «បិទការកក់ហើយ ពេលនេះខុនដូប្រណីត ៣០ ជាន់ នៅកណ្តាលទីក្រុងពេញហើយ ជិតផ្សារ សាលារៀន មន្ទីពេទ្យ ប៉ុស្តិ៍ប៉ូលីស សំខាន់នៅជិតវត្តអារាមទៀតណ៎ា!»។

តាមរយៈរូបភាព បានបង្ហាញសត្វឆ្កែទាំងនោះ កាយធ្វើរូងសម្រាប់ខ្លួនពួកវា តាមលំដាប់លេខរៀង នៃគំនរខ្សាច់ដ៏ធំ ដែលមើលទៅស្រដៀងទៅនឹងរចនាបទនៃបន្ទប់ខុនដូអ៊ីចឹង។ ហើយវា​ក្លាយ​ជា​រូបភាព​គួរ​ឱ្យ​ស្រលាញ់ និង​នាំ​មកនូវស្នាម​ញញឹម​ដល់​អ្នក​ទស្សនាគ្រប់ៗគ្នា។

យ៉ាងណាមិញ នៅពេលមានអ្នក​លេង​អ៊ីនធឺណិត​មួយ​ចំនួន បាន​សួរ​ថា តើ​រូប​នោះ​កើត​ឡើង​នៅ​ឯណា? ដើម្បី​ទៅ​មើលលេង អ្នកបង្ហោះបាន​​ឆ្លើយប្រាប់​ថា ទីតាំង​នៅ​ជាប់​វត្ត ​Pho Ngam ខេត្ត​ Lopburi ។ នាង​ក៏បានឲ្យដឹងទៀតថា ពួកវាគឺជា​ឆ្កែ​អនាថា​ដែល​រស់​នៅ​ក្នុង​តំបន់​ ដែល​ក្រុមហ៊ុន​ជួល​កន្លែង​ស្តុក​ទុក​សម្រាប់​ការ​សាងសង់ ដែលបានចាក់គំនរខ្សាច់សម្រាប់ពួកវា។ ដូច្នេះ ពួកវាក៏នាំគ្នា​ឡើង​ទៅ​កាយ​រណ្តៅ ហើយ​ដេកនៅក្នុងនោះ ​ដើម្បី​ជ្រក​ពី​ព្រះអាទិត្យ និង​ភ្លៀង៕ រក្សាសិទ្ធិដោយ៖ លឹម ហុង