ស្វាយរៀង ៖ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង នៅព្រឹកថ្ងៃទី១៥ ខែមិថុនា ឆ្នាំ២០១៨នេះ បានអញ្ជើញជាអធីបតីភាពនៅ ក្នុងពិធីសម្ពោធដាក់អោយប្រើប្រាស់ជាផ្លូវការនូវ អគារថ្មីរួមនិងសមិទ្ធផលនានា របស់មូលដ្ឋានកងរាជអាវុធហត្ថ ស្រុកចន្ទ្រា ក្នុងពិធីនេះដែរ ក៏មានការអញ្ជើញចូលរួមពីសំណាក់អាជ្ញាធរដែនដីរួមនិងស្ថាប័ន ដែលមានការពាក់ព័ន្ធជាច្រើនកុះករផងដែរ ។
លោកបានមានប្រសាសន៍ថា ៖ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានធ្វើឲ្យប្រទេសមានសុខុដុមនីយកម្មគ្រប់បែបយ៉ាង មានសុខសន្តិភាព មានការអភិវឌ្ឍលើគ្រប់វិស័យ ដែលជាហេតុធ្វើឲ្យប្រជាពលរដ្ឋគ្រប់ៗរូប មានជីវភាពធូធារ មានការងារធ្វើ មានរោងចក្រ សហគ្រាស មានកម្មកររាប់ម៉ឺននាក់ ។
លោកក៏បានមានប្រសាន៍ដោយបាន ជំរុញដល់មន្ត្រីក្រោមឱវាទត្រូវខិតខំបំពេញតួនាទី និងភារកិច្ចរបស់ខ្លួន ឲ្យសមស្របតាមឋានន្តរសក្តិ និងបម្រើប្រជាពល ការពារសន្តិសុខ សណ្តាប់ឆ្នាប់ ជូនប្រជាពលរដ្ឋ ហើយជៀសចេញឲ្យឆ្ងាយពីគ្រឿងញៀន ព្រោះយើងជាមន្ត្រីត្រូវគោរពច្បាប់ការងារ និងធ្វើជាគំរូដល់ពលរដ្ឋ និងសង្គម ហើយក្រុមការងារត្រូវចុះមូលដ្ឋានឲ្យបានញឹកញប់ និងចូលរួមដោះស្រាយរាល់បញ្ហាប្រឈមនានាដែលកើតមាននៅតាមមូលដ្ឋានរបស់ខ្លួន ដើម្បីប្រជាពលរដ្ឋ ។
លោកបានបញ្ជាក់ថា ការសម្ពោធដាក់ឲ្យប្រើប្រាស់នូវអគារថ្មី របស់មូលដ្ឋានកងរាជអាវុធហត្ថស្រុកចន្ទ្រានាពេលនេះ គឺដើម្បីឲ្យកងកម្លាំងរបស់យើង ទទួលបាននៅកន្លែងធ្វើការសាកសមហើយសមិទ្ធផលដែលមានហើយត្រូវចេះជួយថែរក្សាឲ្យបានគង់វង្សយូរអង្វែង ដល់អ្នកជំនាន់ក្រោយៗទៀត ។
លោក សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង ក៏បានថ្លែងទៀតថា មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ ត្រូវចូលរួមទៅបោះឆ្នោត នៅថ្ងៃទី២៩ កក្កដា ឆ្នាំ២០១៨ ខាងមុខនេះ តាមការរៀបចំរបស់ គ.ជ.ប និងចូលរួមថែរក្សាសន្តិភាពទាំងអស់គ្នា៕ វ៉ៃកូ
