ថ្មីៗនេះ បុរសអាយុ ២៦ ឆ្នាំម្នាក់ នៅក្នុងប្រទេសអូស្រ្តាលី ត្រូវបានចោទប្រកាន់ពីបទក្លែងបន្លំ និងបំពានពាណិជ្ជសញ្ញា បន្ទាប់ពីគេបានរកឃើញថា រថយន្ត Ferrari F430 ពណ៌ក្រហមរបស់គាត់ តាមពិតត្រូវបានកែប្រែពីរថយន្ត Toyota MR Coupé ប៉ុណ្ណោះ។
Ferrari F430 ពណ៌ក្រហមនេះ ដែលត្រូវបានរឹបអូសដោយភ្ញាក់ងារអនុវត្តច្បាប់អ៊ីតាលី Guardia di Finanza គឺមានរូបរាងដូចរបស់ដើម (Original) ស្ទើរទាំងស្រុង ចាប់ពីស្លាកសញ្ញាសេះហោះ ដៃចង្កូត យ៉ាន់ស្ព័រ ហ្វ្រាំងកាលីប័រ កញ្ចក់សងខាង និងចង្កៀងមុខម៉ាក Ferrari។
ដំបូងឡើយ គេមិនច្បាស់ថា តើម្ចាស់វ័យ ២៦ ឆ្នាំរូបនេះមានឯកសារដែលបញ្ជាក់ថា គាត់ជាម្ចាស់រថយន្ត Ferrari F430 ពិតប្រាកដដែរឬទេ។ ប៉ុន្តែប៉ូលីសបានហៅអ្នកជំនាញមកបញ្ជាក់ឱ្យប្រាកដ រហូតដល់គេបានរកឃើញថា រថយន្តនេះគឺជា Toyota MR Coupé ដែលបានប្តូរទៅជារបស់ដើមតែម្តង។
បើទោះនេះមិនមែនជាលើកទីមួយ ដែលនរណាម្នាក់បានប្រែក្លាយរថយន្តស្ព័រធម្មតាទៅជារថយន្តទំនើបក៏ដោយ ប៉ុន្តែនេះគឺជាករណីពិសេស បោកប្រាស់កម្រិតខ្ពស់។ ហើយអ្នកដែលកែរថយន្តនេះច្បាស់ជាមានជំនាញមិនគួរឱ្យជឿ។
ជាធម្មតា យើងអាចឃើញការប្រើប្រាស់ស៊ុមកាបូនសាមញ្ញជារូបរាង និងនិមិត្តសញ្ញាក្លែងក្លាយ។ ប៉ុន្តែបុរសម្នាក់នេះបានជ្រើសរើសផ្លាស់ប្តូរផ្នែកខាងក្រៅ និងខាងក្នុងឱ្យមើលទៅដូច Ferrari F430 ដែលត្រូវបានផលិតឡើងនៅចន្លោះឆ្នាំ ២០០៤ និង ២០០៩ ដោយផ្នែកខ្លះបានមកពី Ferraris ពិតប្រាកដ។ នេះធ្វើឱ្យពិបាកក្នុងការមើលស្គាល់ថា រថយន្តនេះគឺជារថយន្តតូយ៉ូតា។
ទោះយ៉ាងណា ប្រព័ន្ធផ្សព្វផ្សាយអ៊ីតាលី បានរាយការណ៍ថា រថយន្តនេះត្រូវបានរឹបអូស រួមទាំងម្ចាស់ខ្លួនផ្ទាល់ ក៏ត្រូវបានប្តឹងពីបទប្រើប្រាស់ពាណិជ្ជសញ្ញាដែលបានចុះបញ្ជី ដោយគ្មានការអនុញ្ញាត។ ប៉ុន្តែ គេក៏នៅមិនទាន់ប្រាកដថា ម្ចាស់រថយន្តនោះនឹងប្រឈមមុខនឹងការចោទប្រកាន់នេះ ឬយ៉ាងណានោះទេ៕ រក្សាសិទ្ធិដោយ៖ លឹម ហុង