ដូចដែលប្រិយមិត្តជាអ្នកតាមដានជីវិតឯកជនរបស់អ្នកសិល្បៈ បានជ្រាបរួចមកហើយថា ដំណឹងក្តៅៗក្រៅផ្លូវការនៃការចែកផ្លូវគ្នាតារាសម្តែង និងបង្ហាញម៉ូដមេម៉ាយកូនមួយ អ្នកនាង សេង សុឃីម និងនាយចឺម បានលេចចេញជាច្រើនសប្តាហ៍មកហើយ ខណៈមហាជនជាច្រើនគិតថា អាចអ្នកទាំងពីរគ្រាន់តែបង្កើតរឿងឲ្យអ្នកគាំទ្រកាន់តែចាប់អារម្មណ៍ប៉ុណ្ណោះ។ ទោះជាយ៉ាងណា នៅពេលនេះ បានដឹងការពិតហើយ ដោយថ្មីៗនេះ ភាគីខាងស្រីអ្នកនាង សេង សុឃីម បានប្រកាសអំពីចំណងស្នេហ៍របស់ខ្លួន បានដើរដល់ផ្លូវបំបែកហើយ ខណៈនាយ ចឺម ដែលត្រូវបានចាត់ទុកជាកម្លោះសម្បូរស្នេហ៍ និងដូរដៃគូច្រើនជាងគេ ក៏ត្រូវបានលេចលឺមានអ្នកថ្មីទៀតផងដែរ។
ពិតណាស់ ក្រោយបែកពីអ្នកមេម៉ាយកូនមួយរូបស្រស់ នាយ ចឺម ក៏បានធ្វើឲ្យមហាជនចាប់ផ្តើមដាក់ការសង្ស័យថា រូបគេកំពុងមានទំនាក់ទំនងស្នេហាថ្មីជាមួយតារាចម្រៀងស្រីស្អាត មាស នីតា ព្រោះគេបានឃើញតាមរយៈវីដេអូ TikTok មាស នីតា បានហុចថ្ពាល់ឲ្យនាយ ចឺម ថើប យ៉ាងស្រួលប្រៀបដូចគូស្នេហ៍អ៊ីចឹង។ ហើយបន្ទាប់មក នីតា ក៏ឆ្លើយថា៖ «រឿងនេះខ្ញុំទុកឱ្យមហាជនជាអ្នកយល់ឃើញទៅ ថាទំនាក់ទំនងខ្ញុំជាមួយបង ចឺម គឺបែបម៉េចទៅចុះ»។
ប៉ុន្តែ មិនដឹងជាអ្នកនាង សេង សុឃីម ឲ្យអ្នកណាទៅចូលឆ្លើយតបផ្លែផ្កាដាក់ខ្លួន ឬយ៉ាងណាទេ ស្រាប់តែថ្មីៗនេះ តារាស្រីវ័យក្មេងនាង មាស នីតា បានប្រើប្រាស់ពាក្យសំដីអសុរសមួយចំនួន ជាមួយនឹងការជេរប្រមាថមកលើរូបនាងយ៉ាងធ្ងន់ៗតែម្តង នៅក្នុងគ្រុបអ្នកគាំទ្ររបស់ខ្លួន។
ក្រោយពីបានលឺបែបនេះ អ្នកនាង សេង សុឃីម ដែលបានអះអាងថា រូបនាងមិនដែលស្គាល់ មិនដែលប្រឡាក់មាត់ជាមួយ បានផ្ទុះកំហឹងយ៉ាងខ្លាំង និងបង្ហោះសារនឹងចាត់វិធានការតាមផ្លូវច្បាប់ ទៅលើតារាចម្រៀងជើងថ្មីរូបនេះ ដោយគ្មានការលើកលែកឲ្យដាច់ខាត។
ជាក់ស្តែង តារាសម្តែងមេម៉ាយកូន១សាច់សខ្ចីនាង សេង សុឃីម បានបង្ហោះវីដេអូសារសំឡេង មាស នីតា ជេរប្រមាថខ្លួន និងភ្ជាប់សំណេរព្រមានចាត់វិធានការយ៉ាងដូច្នេះថា៖ ដោយសារតែមានមហាជនខ្លះគាត់ថា អាចជាវិឌីអូកាត់តឬជាសារសម្លេងកាត់ តែលើកនេះខ្ញុំផ្ញើរជូនដល់មហាជនស្តាប់មើលទៅទាំងអស់គ្នានេះ ដែលជាភស្តុតាងដែលខ្ញុំទទួលបាន។ សូមមហាជនមើលនិងស្តាប់នៃការពិតរឿងនេះ ដែលទាំងខ្ញុំមិនដែលស្គាល់គាត់ និងមិនដែលធ្លាប់បញ្ហាអ្វីនឹងគាត់ទាល់សោះ។
នាងបន្តថា៖ ខ្ញុំមិនងាយយំទេ តែស្តាប់ខ្ញុំហើយឈឺចិត្តណាស់ ព្រោះអ្នកឯងបានប្រមាថខ្ញុំមិនអស់ចិត្តហើយ មកប្រមាថម្តាយខ្ញុំដែលព្រះរបស់ខ្ញុំទៀត។ ថាតើគ្រួសារខ្ញុំបានប៉ះពាល់អ្វីដល់អ្នក? សម្រាប់រឿងប្រុសវិញ ខ្ញុំមិនដែលពាក់ព័ន្ធនឹងគ្នាតាំងពីបែកបញ្ចប់ដោយសន្តិវិធី ខ្ញុំរក្សាភាពជាស្រ្តីខ្មែរនិងក្នុងនាមជាម្តាយម្នាក់ មិនយកខ្លួនទៅដណ្តើមរបស់អ្នកណាឡើយ។ ទាំងខ្ញុំនិងម្តាយខ្ញុំ រងភាពប្រមាថនិងអយុត្តិធម៌យ៉ាងធ្ងន់ធ្ងរក្នុងឆាកជីវិតខ្ញុំបើគិតមកដល់នេះ ព្រោះមិនធ្លាប់ជួបរឿងបែបនេះពីមុនឡើយ។ ខ្ញុំសូមប្រកាសជាផ្លូវការ ខ្ញុំចាត់ការដោយផ្លូវច្បាប់ ដើម្បីរកភាពយុត្តិធម៌សម្រាប់ ខ្ញុំនិងគ្រួសារខ្ញុំ។ កូនស្រីសុំទោស ម៉ាក់ រឿងអតីតរបស់កូនបែរជាធ្វើឱ្យម៉ាក់ មករងភាពអាម៉ាស់បែបនេះ។
អ្នកនាង សេង សុឃីម បន្ថែមថា «រាល់សារសម្លេង រាល់សម្លេងរបស់អ្នក ខ្ញុំនឹងឲ្យអ្នកច្បាប់ចាត់ការ ថ្ងៃស្អែកខ្ញុំមិនទទួលការលើកដៃសុំទោសទេ វប្បធម៌ដៀលជេរបស់អ្នកមួយចំនួន គឺជេរហើយ ចាលើកដៃឡាយសូមទោស មានអ្នកអន្តរាគមន៍គឺរួចខ្លួន ខ្ញុំស្តាប់ហើយមិនហូរទឹកភ្នែកទេ ហើយរឿងដណ្តើមប្រុសនេះ ខ្ញុំអត់ទម្លាប់ទេសូមទោស តែខ្ញុំរក្សាមារយាទជាស្រី ដែលមិនប្រើភាសាជេរតាមហ្វេសប៊ុក ឬតិកតុក (ហាមសូមទោសតាម Live ជួបគ្នានៅតុលាការ»។
ជាការកត់សម្គាល់ គឺបន្ទាប់ពីបង្ហោះសារព្រមានចាត់វិធានការផ្លូវច្បាប់រួច អ្នកនាង សេង សុឃីម ក៏បានលាតត្រដាងឲ្យដឹងថា មាស នីតា ព្យាយាមឆាតមកសុំសម្រុះសម្រួលជាមួយនាង ដើម្បីបញ្ចប់រឿង។ ប៉ុន្តែ ត្រូវបាននាងឆ្លើយតបទៅវិញ មិនអាចទទួលយក និងសូម្បីម្រាមដៃ១០សុំទោសបានឡើយ ដោយនាងនៅតែប្រកាន់ចំហរនឹងប្រើប្រាស់វិធានការតាមផ្លូវច្បាប់៕ រក្សាសិទ្ធិដោយ៖ លឹម ហុង