ព្រះសង្ឃមួយអង្គ បានត្រឹមហួសចិត្ត បន្ទាប់ពីត្រូវបានចាញ់បោកគេ អស់បច្ច័យចំនួន ៨ ម៉ឺនរៀល ទាំងព្រឹក ស្ទើរតែមិនគួរឲ្យជឿ ដោយសារតែមនុស្សស្រីម្នាក់ មិនដឹងថាជាចោរពិត ឬមិនមែន បានមកស្រោចទឹករំដោះគ្រោះ ដោយបានយកលុយដុល្លារក្រដាស 50 ក្លែងក្លាយ មកដោះដូរ ជាថ្នូរធ្វើជាចូលបច្ច័យកសាងខ្លះ ថ្លៃស្រោចទឹកខ្លះ និងសល់ប៉ុន្មានឲ្យអាប់យកលុយខ្មែរវិញ។
បើតាមស្តាប់ដំណើររឿងបោកថ្មីនេះ គឺស្រ្តីម្នាក់បានមកស្រោចទឹក ហើយនៅពេលស្រោចរួចរាល់ ក៏បានប្រាប់លោកថា អត់មានលុយរាយទេ គឺមានតែលុយដុល្លារក្រដាស 50 ប៉ុន្តែ ចង់ប្រគេនបច្ច័យ 20$ ចូលកសាងសាលាឆាន់ 10$ ប្រគេនថ្លៃស្រោចទឹក និងសល់ 20$ សុំឲ្យលោកអាប់ជាលុយខ្មែរវិញ។ ប៉ុន្តែ អ្វីដែលហួសចិត្តខ្លាំងនោះ គឺនៅពេលស្រ្តីនោះចាកចេញបាត់ លោកក៏ពិនិត្យលុយចុះឡើងៗ ទើបដឹងថាក្រដាស 50 នោះជាលុយដុល្លារក្លែងក្លាយ។
នេះបើតាមព្រះសង្ឃមួយអង្គ ដែលមានគណនីហ្វេសប៊ុកព្រះនាម Penh Kimhong បានបង្ហោះករណីដ៏ហួសចិត្តនេះឲ្យញាតិញោមបានដឹងយ៉ាងដូច្នេះថា៖ «ប្រគេនបច្ច័យក្លែងក្លាយដល់ព្រះសង្ឃ មានញោមម្នាក់មកស្រោចទឹក កាន់បច្ច័យ៥០ដុល្លារ ដោយប្រាប់លោកថាគ្មានលុយរាយ គាត់បានចូលកសាង ២០ ដុល្លារ ប្រគេនលោក ១០ ដុល្លារ សល់ ២០ ដុល្លារ សុំឱ្យលោកអាប់ជូនគាត់វិញ។ ប៉ុន្តែអកុសល លុយក្លែងក្លាយ តើជាការបោកប្រាស់ ឬមិនមែនទេ? ទោះយ៉ាងណាក៏ដោយ សូមព្រះករុណាគុណម្ចាស់ ញាតិប្រុងប្រយ័ត្នផង កុំឱ្យជួបរឿងបែបនេះ»។
ទោះយ៉ាងណា មនុស្សមួយចំនួន បានយល់ឃើញថា មិនអាចហ៊ានសន្និដ្ឋានថានេះជាករណីបោកប្រាស់ទេ ឬ អាចថាស្រ្តីមកស្រោចទឹកនោះ ជាជនរងគ្រោះដោយសារគេបោកបន្លំដែរ ឬយ៉ាងណានោះទេ។ ប៉ុន្តែ បើតាមព្រះសង្ឃមួយអង្គ បានចូលមកខមិនប្រាប់ឲ្យដឹងថា លោកក៏ធ្លាប់ជួបស្តាយល៍បោកប្រាស់ដូចគ្នានេះដែរ ប៉ុន្តែ បោកលោកអត់បានទេ៕ រក្សាសិទ្ធិដោយ៖ លឹម ហុង
