នៅថ្ងៃទី១ ខែធ្នូ ឆ្នាំ ២០២២ គេហទំព័រ South China Morning Post បានចុះផ្សាយពីរឿងរ៉ាវដ៏មិននឹកស្មានដល់មួយ ដែលបុរសអាយុ ២៥ ឆ្នាំម្នាក់ឈ្មោះ Hou មកពីខេត្ត Henan ភាគកណ្តាលនៃប្រទេសចិន ត្រូវចំណាយលុយខ្លួនឯង និងសូម្បីខ្ចីប្រាក់គេយ៉ាងច្រើន សម្រាប់ពិធីមង្គលការដ៏ប្រណិត ដែលមានតម្លៃ 510,000 យន់ (ប្រហែលជាង 70,000 ដុល្លារ) ប៉ុន្តែរៀបការបានពេលត្រឹមតែ ៣៣ ថ្ងៃប៉ុណ្ណោះ ក៏បែកបាក់គ្នា ហើយរូបគេជាកូនកំលោះ មិនសុខចិត្តទាមទារសំណងពីកូនក្រមុំវិញ ដែលកំពុងបង្កការវែកញែកក្តៅគគុក នៅលើសង្គមចិនដីគោក។
តាមរយៈការណែនាំពីអ្នកផ្គូរផ្គង នៅក្នុងឆ្នាំ ២០២២ គូស្នេហ៍មួយគូនេះមានអារម្មណ៍ល្អចំពោះគ្នាទៅវិញទៅមក ហើយបានសម្រេចចិត្តភ្ជាប់ពាក្យ ៣ ថ្ងៃក្រោយមក។ របាយការណ៍បានបង្ហាញថា ពិធីរៀបការរបស់ពួកគេគឺអធិកអធមបំផុត។
លុយដែលប្រើសម្រាប់រៀបអាពាហ៍ពិពាហ៍ដ៏ថ្លៃថ្នូរបស់គូស្នេហ៍នេះ បានមកពី Hou និងឪពុកម្តាយរបស់គាត់។ ចំណែកលុយខ្លះបានខ្ចីពីសាច់ញាតិផ្សេងទៀត។ Hou ត្រូវខ្ចីប្រាក់ 150,000 យន់ទៀត (ប្រហែលជាង 20,000 ដុល្លារអាមេរិក) ពីសាច់ញាតិ ដើម្បីចំណាយលើការចំណាយផ្សេងៗ រួមទាំងរថយន្ត ពិធីភ្ជាប់ពាក្យ ពិធីមង្គលការទាំងមូល និងថ្លៃបណ្ណាការ។
ប៉ុន្តែអ្នកណាទៅគិតថា ជីវិតអាពាហ៍ពិពាហ៍របស់គូស្នេហ៍នេះ នឹងត្រូវបញ្ចប់យ៉ាងលឿនដូច្នេះ? បន្ទាប់ពីរៀបការបានតែ ៣៣ ថ្ងៃ។ លោក Hou បានបង្ហើបថា ប្រពន្ធរបស់គាត់ឈ្មោះ Li បានវេចបង្វិចខោអាវ ហើយបានរើចេញពីផ្ទះរបស់ពួកគេ បន្ទាប់ពីមានការឈ្លោះប្រកែកគ្នា ដោយសារតែគាត់បានដេកលក់នៅផ្ទះ ហើយរូបនាងត្រូវបានចាក់សោរនៅក្រៅផ្ទះ បន្ទាប់ពីចេញការងារពេលយប់។
Hou បានព្យាយាមដាក់ពាក្យសុំលែងលះបន្ទាប់ពីនោះ។ ប៉ុន្តែត្រូវបានតុលាការច្រានចោល ខណៈនាង Li ជាប្រពន្ធបានអះអាងថា អាពាហ៍ពិពាហ៍របស់ពួកគេមានសុភមង្គល។ ទោះបីជាគាត់ព្យាយាមប្តឹងឧទ្ធរណ៍ក៏ដោយ ប៉ុន្តែវាមិនទាន់ដល់ពេលសម្រាប់ការជំនុំជម្រះនៅឡើយទេ។ ហេតុដូច្នេះហើយ ចាប់តាំងពីខែវិច្ឆិកាឆ្នាំមុនមក Hou បានព្យាយាមរកវិធីដើម្បីទាមទារទ្រព្យសម្បត្តិ 140,000 យន់ (20,000 ដុល្លារ) ពីប្រពន្ធ ដោយគាត់បានចាប់ផ្តើមយុទ្ធនាការសងប្រាក់វិញរបស់គាត់ ដោយព្យួរផ្ទាំងបដានៅលើឡានរបស់គាត់ និងប្រើឧបករណ៍បំពងសម្លេង ដើម្បីទាមទារសំណងរបស់គាត់នៅខាងក្រៅផ្ទះដែលប្រពន្ធរបស់គាត់ ដែលរស់នៅជាមួយឪពុកម្តាយរបស់នាងនៅក្នុងស្រុក Biyang ខេត្ត Henan ។
លោក Hou បាននិយាយថា៖ «យើងចង់បានគ្រឿងអលង្ការដែលយើងបានទិញឲ្យនាងត្រឡប់មកវិញ ដែលមានតម្លៃជាង ៤០០០០ យន់ និងសាច់ប្រាក់ ១០ ម៉ឺនយន់»។
គួរបញ្ជាក់ថា តម្លៃនៃពិធីរៀបអាពាហ៍ពិពាហ៍របស់គូស្នេហ៍មួយគូនេះ គឺថ្លៃកប់ពពកតាមស្តង់ដារនៃខេត្ត Henan ដែលប្រាក់ចំណូលប្រចាំឆ្នាំជាមធ្យម មានត្រឹមតែ ២២,០០០ យន់ កាលពីឆ្នាំមុន។
រឿងរ៉ាវនៃការបែកបាក់អាពាហ៍ពិពាហ៍របស់គូស្នេហ៍មួយគូនេះ បានបង្កឱ្យមានការពិភាក្សាតាមប្រព័ន្ធអ៊ីនធឺណែតដ៏ក្តៅគគុកនៅក្នុងប្រទេសចិនដីគោក ដែលការឡើងថ្លៃអាពាហ៍ពិពាហ៍ ជាពិសេសនៅតាមទីក្រុងតូចៗ និងតំបន់ជនបទ គឺជាបន្ទុកផ្នែកហិរញ្ញវត្ថុកាន់តែធំសម្រាប់គ្រួសារជាច្រើន។
អ្នកប្រើប្រាស់ Weibo ម្នាក់បានបញ្ចេញមតិថា «ករណីនេះគួរត្រូវបានផ្សព្វផ្សាយជាសាធារណៈ។ នៅខេត្ត Henan តម្លៃកូនក្រមុំគឺលើសពី 100,000 យ័ន។ វាជារឿងធម្មតាសម្រាប់ឪពុកម្តាយក្នុងការខ្ចីលុយគេ នៅពេលដែលកូនប្រុសរបស់ពួកគេភ្ជាប់ពាក្យ»។
រដ្ឋាភិបាលចិនបានដាក់ចេញនូវការណែនាំដែលមានគោលបំណងកែទម្រង់ប្រពៃណីអាពាហ៍ពិពាហ៍ និងលើកទឹកចិត្តដល់ការចំណាយសន្សំសំចៃបន្ថែមទៀត ទៅលើការជូនជាកាដូ និងពិធីមង្គលការក្នុងប៉ុន្មានឆ្នាំថ្មីៗនេះ ប៉ុន្តែទោះបីជាកិច្ចខិតខំប្រឹងប្រែងទាំងនេះក្តី ក៏តម្លៃកូនក្រមុំបានបន្តកើនឡើង ដែលជារឿយៗខាងប្រុសត្រូវចំណាយអស់រាប់រយពាន់យ័ន៕ រក្សាសិទ្ធិដោយ៖ លឹម ហុង
