គេហទំព័រ Mirror Media នៅថ្ងៃទី២ ខែធ្នូ ឆ្នាំ ២០២២ បានរាយការណ៍ថា ស្ត្រីម្នាក់នៅទីក្រុង Tainan (តៃវ៉ាន់) ត្រូវបានថតដោយកាមេរ៉ាឃ្លាំមើលផ្សារទំនើប ខណៈកំពុងលួចការ៉េមពីទូរទឹកកក ដែលឃើញហើយពិតជាគួរឲ្យហួសចិត្តខ្លាំងតែម្តង។ ពិតណាស់ បើតាមការពិនិត្យមើលឲ្យល្អិតល្អន់ ស្រ្តីរូបនេះគឺសាច់ឈាមលំដាប់អ្នកមានទ្រព្យស្តុកស្តុម ព្រោះថាតាមរយៈការស្លៀកពាក់ និងរបស់ប្រើប្រាស់សុទ្ធតែកាបូបយីហោម៉ាកល្បីមានតម្លៃជាង ១០០,០០០ ដុល្លារតៃវ៉ាន់ (ប្រហែលជាង ៣,០០០ ដុល្លារអាមេរិក) ឯណោះ។ ប៉ុន្តែ គ្រាន់តែការ៉េម និងអាហារសម្រន់ មិនគួរណាមានគំនិតដ៏មិនថ្លៃថ្នូរបែបនេះសោះ។
វីដេអូ CCTV បានបង្ហាញឲ្យឃើញស្រ្តីនោះ មានសក់វែង ស្លៀកសំពត់ខ្លីពណ៌ខ្មៅ ពាក់ស្បែកជើងកែងខ្ពស់ ដើរទៅកន្លែងបង្កកការ៉េម រួចបើកទូយកការ៉េម Haagen-Daz ចំនួន 4 ពែង ហើយដាក់ចូលក្នុងថង់ក្រដាសដែលកំពុងកាន់។ បន្ទាប់មក ស្រ្តីរូបនេះបានទៅយកការ៉េមពីកន្លែងលក់មួយផ្សេងទៀត ដែលរួមទាំងអាហារសម្រន់ និងសូកូឡាជាច្រើនមុខ មុននឹងចាកចេញដោយមិនបង់ប្រាក់សម្រាប់មុខទំនិញទាំងនោះ។
ទោះជាយ៉ាងណា ក្រោយផ្សារទំនើប ដាក់រាយការណ៍ករណីនេះប្តឹងទៅប៉ូលិសចុះមកពិនិត្យ ប៉ូលិសបានរកឃើញថា ស្រ្តីរូបនោះមានឈ្មោះ Chen អាយុប្រហែល ៤០ ឆ្នាំ។ ស្ត្រីរូបនេះបានមកប៉ុស្តិ៍ប៉ូលិសជាមួយការ៉េម Haagen-Dazs និងអាហារផ្សេងទៀត ហើយបានសុំយកត្រឡប់ទៅសងហាងវិញ។ ជាមួយគ្នានេះដែរ ស្រ្តីរូបនេះក៏អះអាងដោះសារថា នាងចូលចិត្តការ៉េម Haagen-Dazs នេះខ្លាំងណាស់ ហើយក៏ទប់ចិត្តយកពុំបាន។
តែបន្ទាប់ស្ដាប់សម្ដីសារភាពហើយ ប៉ូលិសពិតជាស្រឡាំងកាំង ពេលដឹងថា តម្លៃនៃការ៉េមចំនួន ៤ ដុំ សូកូឡា បង្អែម និងទំនិញផ្សេងទៀតដែលលួចទាំងនោះ គឺមានតម្លៃជាង ២,០០០ ដុល្លារតៃវ៉ាន់ (ប្រហែលជាង ៦០ ដុល្លារ)។ ទោះជាយ៉ាងណា បន្ទាប់ពីការស៊ើបអង្កេត Chen នឹងត្រូវបានចោទប្រកាន់ពីបទលួច៕ រក្សាសិទ្ធិដោយ៖ លឹម ហុង
