បើតាមអ្នកធ្លាប់ញ៉ាំរបស់ហឹរ នោះនឹងដឹងហើយថាវាអាចធ្វើឲ្យក្អកបន្តិច។ ប៉ុន្តែ អ្វីដែលគ្រប់គ្នាពុំធ្លាប់ដឹង និងស្ទើរតែមិនគួរឲ្យជឿនោះ គឺថាករណីក្អកបណ្តាលមកពីអាហារហឹរនេះ បែរជាធ្ងន់ធ្ងរដែលអាចបណ្តាលឱ្យបាក់ឆ្អឹងបាន។ ជាក់ស្តែង ករណីស្ត្រីជនជាតិចិនម្នាក់មកពីទីក្រុងសៀងហៃ ដែលស្គមស្គាំងពេក និងមានសាច់ដុំលូតលាស់ខ្សោយ បានបាក់ឆ្អឹងជំនីរមិនតិចជាងបួនកន្លែងនោះទេ ខណៈក្អកដោយសារអាហារហឹរ។
នារីម្នាក់ដែលមានឈ្មោះថា Huang នៅក្នុងទីក្រុងសៀងហៃ បានប្រាប់គ្រូពេទ្យថា នាងបានញ៉ាំអាហារហឹរ ហើយបន្ទាប់មកនាងក៏ចាប់ផ្តើមក្អក។ ក្នុងអំឡុងពេលក្អកខ្លាំង នារីវ័យក្មេងនេះបានអះអាងថា នាងបានឮស្នូរប្រិបៗ (ដូចបាក់) ចេញពីតំបន់ដើមទ្រូងរបស់នាង ហើយភ្លាមៗនោះចាប់ផ្តើមមានការឈឺចាប់តែម្តង នៅពេលដកដង្ហើម និងព្យាយាមនិយាយ។
Huang បាននិយាយថា «ដំបូងឡើយ ខ្ញុំគិតថា វាជាជំងឺដាច់សរសៃឈាមខួរក្បាល ឬជាអ្វីមួយ ប៉ុន្តែខ្ញុំមិននឹកស្មានថា វានឹងធ្វើឱ្យឈឺចាប់យ៉ាងនេះទេ ខ្ញុំក៏មិនអាចដើរបានដែរ»។
Huang បានទៅកាន់មន្ទីរពេទ្យក្នុងតំបន់ ហើយតាមរយៈការស្កែន CT បានបង្ហាញថា ឆ្អឹងជំនីររបស់នាងចំនួនបួនបានបាក់។ ក្រោយពីបានឮអ្នកជំងឺរូបនេះរៀបរាប់អំពីការក្អក គ្រូពេទ្យក៏បានធ្វើតេស្តមើលដង់ស៊ីតេឆ្អឹង គឺចេញមកធម្មតាទេ។ ប៉ុន្តែ ពេលពិនិត្យ និងធ្វើតេស្ដបន្ថែម គ្រូពេទ្យវះកាត់ឆ្អឹងបានសន្និដ្ឋានថា ការបាក់ឆ្អឹងនេះបណ្តាលមកពីសាច់ដុំរបស់នាងខ្សោយខ្លាំង។
វេជ្ជបណ្ឌិតបានប្រាប់ Huang ថា៖ «ឆ្អឹងជំនីររបស់អ្នក អាចមើលឃើញយ៉ាងច្បាស់នៅក្រោមស្បែករបស់អ្នក។ មិនមានសាច់ដុំសម្រាប់ទ្រទ្រង់ឆ្អឹងទេ ដូច្នេះវាងាយស្រួលសម្រាប់ឆ្អឹងជំនីររបស់អ្នកក្នុងការបាក់ នៅពេលក្អក»។ វេជ្ជបណ្ឌិតក៏បានប្រាប់បន្ថែមថា៖ «ដរាបណានាងនៅតែបណ្តែតបណ្តោយចំពោះរឿងនេះ នោះនាងអាចនឹងទទួលរងការបាក់ឆ្អឹងស្រដៀងគ្នានេះទៀត នាពេលអនាគត»។
ជាក់ស្តែង នារីវ័យក្មេងរូបនេះ បាននិយាយថា នាងមានកម្ពស់ ១.៧១ ម៉ែត្រ និងមានទម្ងន់ត្រឹមតែ ៥៧ គីឡូក្រាម ហើយបានសារភាពថា រាងកាយផ្នែកខាងលើស្គមខ្លាំង។ ពេលនេះនាងត្រូវសម្រាក និងចំណាយពេលមួយខែ ជាមួយនឹង corset (គ្រឿងពាក់រឹប) រុំជុំវិញខ្លួនរបស់នាង ប៉ុន្តែបន្ទាប់ពីនោះ នាងមានគម្រោងនឹងបង្កើនទម្ងន់ ដើម្បីពង្រឹងដុំសាច់ដុំរឹងមាំ៕ រក្សាសិទ្ធិដោយ៖ លឹម ហុង