ក្តីស្រឡាញ់របស់ម្តាយគ្រប់រូបចំពោះកូនៗគឺធំធេងបំផុត មិនអាចវាស់បាន។ ម្តាយគ្រប់រូបហ៊ានលះបង់ជីវិត ដើម្បីឲ្យកូនៗបានសេចក្តីសុខ។ ចំនែកសត្វក៏មិនខុសពីមនុស្សប៉ុន្មានដែរ គឺស្រឡាញ់កូនៗរបស់ពួកគេដូចគ្នា។ រឿងនេះបានកើតឡើងចំពោះឆ្កែអាឡឺម៉ងមួយក្បាល នៅក្នុងប្រទេសឈីលី។
ឆ្កែមេមួយក្បាលបានប្រថុយជីវិតជាច្រើនដង ចូលទៅក្នុងផ្ទះដែលកំពុងឆេះ ដើម្បីជួយសង្គ្រោះកូនតូចៗ។ ឆ្កែអាឡឺម៉ងមួយក្បាលនោះឈ្មោះ Amanda។ វាបានរត់កាត់ភ្លើងទៅវិញទៅមកៗ ដើម្បីពាំកូនរបស់វាម្តងមួយៗ ពីផ្ទះដែលកំពុងត្រូវភ្លើងលេបត្របាក់ ទៅកាន់កន្លែងមានសុវត្ថិភាព។
អគ្គិភ័យ កើតឡើងនៅក្នុងតំបន់ Santa Rosa de Temuco ក្រោយពេលមានគ្រាប់បែកមួយគ្រាប់ផ្ទុះ បង្កើតបានជាភ្លើងឆាបឆេះផ្ទះយ៉ាងលឿន។ ខណៈភ្លើងកំពុងឆាបឆេះ ឆ្កែនោះបានរត់ចន្លោះផ្ទះ និងឡានទឹក ដើម្បីពាំកូនៗរបស់វាម្តងមួយៗ រហូតដល់អស់ និងបានអង្គុយនៅក្បែរ ដើម្បីការពារកូនរបស់វា។
ឆ្កែនោះ និងកូនៗរបស់វា ត្រូវបានគេនាំយកទៅសង្គ្រោះនៅពេទ្យសត្វ ប៉ុន្តែជាអកុសល កូនឆ្កែមួយក្បាលបានស្លាប់ ដោយសារត្រូវភ្លើងរលាកខ្លាំងពេក ចំនែកកូន ៤ក្បាលទៀតដែលមានរបួសផងដែរនោះ ត្រូវបានជួយសង្គ្រោះ៕ ដោយ ៖ សុភ័ក្ត្រ
