ប៉ូលិសនៅក្នុងប្រទេសម៉ិកស៊ិកូ កាលពីពេលកន្លងទៅថ្មីៗនេះ (ថ្ងៃទី៣ ខែធ្នូ ឆ្នាំ២០២២) បានរឹបអូសថ្នាំញៀនប្រភេទគ្រាប់ “fentanyl” ទម្ងន់ ៣០០ គីឡូក្រាម បង្កប់ក្នុងផ្លែដូង ដឹកតាមឡានដឹកទំនិញ១គ្រឿង ដែលកំពុងធ្វើដំណើរលើផ្លូវហាយវេក្នុងរដ្ឋ Sonora ភាគខាងជើង ក្បែរព្រំដែនជាប់អាមេរិក។
តាមរយៈវីដេអូ បានបង្ហាញឲ្យឃើញជាក់ស្តែងថា សំបកដូងត្រូវបានគេអារបំបែកជាពីរ ដើម្បីបង្កប់ថង់ផ្លាស្ទិចនៃគ្រាប់ថ្នាំ fentanyl នៅខាងក្នុង រួចហើយត្រូវបានបិទភ្ជិតយ៉ាងស្អាត។ ប៉ូលីសសហព័ន្ធបានចាប់ខ្លួនមនុស្សពីរនាក់ ដែលកំពុងដឹកជញ្ជូនសារធាតុគ្រឿងញៀននេះ ហើយការស៊ើបអង្កេតកំពុងបន្ត។
បើតាមប្រភពបានបញ្ចេញឲ្យដឹងថា ម៉ិកស៊ិកបានផលិត fentanyl ភាគច្រើន ដែលទៅដល់សហរដ្ឋអាមេរិក ដោយប្រើសារធាតុគីមីដែលនាំចូលពីប្រទេសចិន និងកន្លែងផ្សេងៗទៀត។
Fentanyl ក៏ត្រូវបានគេស្តីបន្ទោសថា ជាសារធាតុគ្រឿងញៀនបណ្តាលឲ្យស្លាប់ ដោយសារការប្រើថ្នាំជ្រុលរបស់ពលរដ្ឋអាមេរិក រាប់ម៉ឺននាក់ក្នុងមួយឆ្នាំៗ ពីព្រោះថ្នាំអាភៀនសំយោគដ៏មានឥទ្ធិពលបំផុតនេះ ត្រូវបានដាក់ចូលទៅក្នុងថ្នាំក្លែងក្លាយដែលធ្វើមើលទៅដូចជា Xanax, oxycodone ឬ Percocet អ៊ីចឹង។ ហេតុនេះ មនុស្សជាច្រើនដែលប្រើថ្នាំទាំងនេះមិនដឹងថា ពួកគេកំពុងតែលេបថ្នាំ fentanyl នោះទេ៕ រក្សាសិទ្ធិដោយ៖ លឹម ហុង
