គេហទំព័រ saostar នៅថ្ងៃទី២១ ខែធ្នូ ឆ្នាំ ២០២២ បានរាយការណ៍ថា វីដេអូឃ្លីបបង្ហាញក្មេងប្រុសអាយុ ២ ឆ្នាំម្នាក់ យំមិនឈប់ ពេលឃើញមុខកូនក្រមុំ ដែលត្រូវជាម្តាយបង្កើត ព្រោះមើលមិនស្គាល់មុខ ពេលម្តាយតុបតែងខ្លួនយ៉ាងស្រស់ស្អាតខុសពីធម្មតា បានក្លាយជាឃ្លីបកំពុងទទួលការចាប់ និងផ្ទុះសំណើចគ្រប់ៗគ្នា ពីសំណាក់អ្នកលេងអ៊ីនធឺណិតវៀតណាម។
តាមវីដេអូឃ្លីប បានបង្ហាញក្មេងប្រុសតូច នៅក្នុងដៃឪពុកជាកូនកំលោះ ខណៈកូនក្រមុំ ដែលឈរនៅចំពោះមុខពួកគេទាំងពីរ គឺជាម្តាយបង្កើតរបស់ក្មេងប្រុសតូចនោះ។ ប៉ុន្តែដោយស្ថានភាព នាងស្លៀកឈុតមង្គលការដ៏ស្រស់ស្អាត និងការតុបតែងខ្លួន ផាត់មុខ ធ្វើសក់យ៉ាងប្លែក ដែលជាហេតុធ្វើឱ្យកូនប្រុសតូចមើលមិនស្គាល់ម្តាយរបស់ខ្លួន ហើយក៏ស្រែកយំខ្លាំងៗ ពេលម្តាយចូលមកយកពីដៃឪពុក។
កូនក្រមុំ បាននិយាយថា នាងសម្រាលបានកូនពីរនាក់ មុនពេលរៀបការ។ ប៉ុន្តែ អ្វីដែលអស់សំណើចខ្លាំងនោះ គឺកូនប្រុសរបស់នាង ស្រាប់តែមិនស្គាល់នាងទេ បន្ទាប់ពីនាងតុបតែងខ្លួនរួច។ ជាក់ស្តែង នៅពេលនាងចូលទៅជិត ស្រាប់តែត្រូវបានកូនប្រុសរបស់នាងស្រែកថា «មនុស្សបិសាច ចេញពីទីនេះទៅ!»។
ចំណែកអ្នកលេងបណ្តាញសង្គម បានបញ្ចេញមតិលេងសើចថា៖ «តើអ្នកជានរណា ឆាប់ថយចេញទៅ តើអ្នកចង់ប្លន់ឪពុកខ្ញុំមែន?, សូមណែនាំ ស្រីៗយើងត្រូវតែស្អាតជានិច្ច បើមិនដូច្នេះទេ នឹងធ្វើឲ្យកូនៗខ្លាចហើយណ៎ា!, ធម្មតា ម្តាយធ្លាប់តែស្លៀកពាក់សាមញ្ញ ដល់ពេលតុបតែងគ្រងឈុតអ៊ីចឹង រឿងអីកូនមិនភ្ញាក់ផ្អើល!,…»៕ រក្សាសិទ្ធិដោយ៖ លឹម ហុង
