កាលពីពេលថ្មីៗនេះ បុរសជនជាតិចិនម្នាក់ ត្រូវបានចាប់ខ្លួន បន្ទាប់ពីគេដឹងថា គាត់បានក្លែងខ្លួនធ្វើជា «វរសេនីយឯកជាន់ខ្ពស់» នៅក្នុងជួរកងទ័ពចិន ដើម្បីទាក់ទាញនារីៗ។
ប៉ូលីសនៅក្នុងខេត្ត Jiangxi បាននិយាយថា បុរសដែលត្រូវបានចាប់ខ្លួននោះ បានធ្វើជាវរសេនីយឯកនៅក្នុងអង្គភាពកាំជ្រួចរបស់កងទ័ព អស់រយៈពេលជាង ៤ ឆ្នាំ។ ជាក់ស្តែង បុរសនោះមានឯកសណ្ឋានលេខសម្គាល់ក្លែងក្លាយ និងសញ្ញាសម្គាល់ផ្សេងទៀតផងដែរ។ យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក បុរសជនជាតិចិនម្នាក់ ត្រូវបានឃាត់ខ្លួន នៅពេលដែលគាត់មកធ្វើតេស្ត Covid ស្ថិតក្នុងឯកសណ្ឋាន។
បុរសរូបនេះ បានផ្តល់ឱ្យគ្រូពេទ្យនូវឯកសារក្លែងក្លាយ ហើយនៅពេលដែលគ្រូពេទ្យចាប់ផ្តើមពិនិត្យមើលព័ត៌មាននៅក្នុងទិន្នន័យ (Database) កុំព្យូទ័រ ពួកគេពុំបានរកឃើញឈ្មោះរបស់គាត់នៅក្នុងជួរកងទ័ពចិនទេ ដូច្នេះពួកគេក៏បានទូរស័ព្ទទៅប៉ូលីសតែម្តង។
អ្វីដែលគួរឲ្យហួសចិត្តនោះ គឺនៅពេលសួរចម្លើយ បុរសរូបនោះបានសារភាពថា ខ្លួនមិនមានអ្វីពាក់ព័ន្ធនឹងកងទ័ពទេ ហើយបានទិញឯកសណ្ឋានយោធា តាមអ៊ីនធឺណិត ដើម្បីផ្គាប់ចិត្តនារីៗប៉ុណ្ណោះ។
ទោះជាយ៉ាងណា ឥឡូវនេះ បុរសរូបនេះ កំពុងប្រឈមមុខនឹងការជាប់ពន្ធនាគារ ពីបទក្លែងបន្លំឯកសារ៕ រក្សាសិទ្ធិដោយ៖ លឹម ហុង
