ក្លាយជារឿងមួយ ដែលកំពុងទទួលបានការចាប់អារម្មណ៍ជាខ្លាំង ដែលនៅក្នុងឱកាសចូលឆ្នាំថ្មី និងស្វាគមន៍ឆ្នាំថ្មី ម្ចាស់ហាងទុរេនដ៏ល្បីមួយកន្លែង នៅក្នុងខេត្ត រ៉ាយ៉ង ប្រទេសថៃ បានផ្តល់ប្រាក់រង្វាន់លើកទឹកចិត្ត ដល់បុគ្គលិករយៈពេល ៥ ខែ បូករួមប្រាក់បន្ថែម ៥ ម៉ឺនបាត។
សារព័ត៌មាន Channel One NewsNai Dam កាលពីថ្ងៃទី ២២ ខែធ្នូ ឆ្នាំ ២០២២ បានបញ្ចេញឲ្យដឹងថា ម្ចាស់ហាងទុរេន Nai Dam ដែលមានទីតាំងនៅស្រុក Pluak Daeng ខេត្ត Rayong បានប្រកាសផ្តល់ប្រាក់រង្វាន់ដល់បុគ្គលិកទាំងអស់ក្នុងហាងចំនួន ៥ ខែក្នុងម្នាក់ៗ បូករួមទាំងប្រាក់បន្ថែមចំនួន ៥ ម៉ឺនបាត (ស្មើនឹងជាង ១៤០០ ដុល្លារ) ដោយសារការលក់ក្នុងឆ្នាំនេះទាំងពី online និងនៅកន្លែងហាងផ្ទាល់ លើសពីគោលដៅដែលបានកំណត់។
លោក Songsak Chanklai និងលោកស្រី Apichayaporn Phromnet ម្ចាស់ហាងលក់ទុរេន បានបង្ហើបថា ឆ្នាំនេះលោកបានផ្តល់ប្រាក់លើកទឹកចិត្តដល់បុគ្គលិក សម្រាប់រយៈពេល ៥ ខែ បូកបន្ថែមប្រាក់ចំនួន ៥០,០០០ បាត ដោយសារពួកគេខិតខំធ្វើការនឿយហត់ពេញមួយឆ្នាំ។
លោក Songsak ក៏បានឲ្យដឹងថា មនុស្សមួយចំនួនប្រហែលជាគិតថាការធ្វើការក្នុងហាងទុរេនប្រហែលជាមិនបានប្រាក់ច្រើនទេ ហេតុនេះ លោកចង់អោយមនុស្សជាច្រើនមើលឃើញថា មិនចាំបាច់ទៅធ្វើការនៅក្រុមហ៊ុនធំទេ ទោះបីមានប្រាក់រង្វាន់ក៏ដោយ តែហាងតូចដូចហាងរបស់ពួកគាត់ ក៏អាចផ្តល់ប្រាក់រង្វាន់ដល់កម្មករបុគ្គលិករបស់គាត់ផងដែរ។ លោក Songsak ក៏បានបញ្ជាក់ថា លោកបានផ្តល់អោយប្រាក់រង្វាន់លើកទឹកចិត្តរាល់តែឆ្នាំហ្នឹង ព្រោះថាឆ្នាំមុន ៥ ខែ បូកបន្ថែម ៣០,០០០ បាត។
យ៉ាងណាមិញ បន្ទាប់ព័ត៌មានេះកំពុងទទួលការចាប់អារម្មណ៍ខ្លាំង ធ្វើឱ្យអ្នកនិយមលេងអ៊ីនធឺណិត ចង់ដាក់ពាក្យចូលធ្វើការជាបន្ទាន់ នៅពេលដឹងថាហាងទុរេននេះ មិនមែនទើបតែផ្តល់ប្រាក់រង្វាន់ជាលើកដំបូងក្នុងឆ្នាំនេះទេ ប៉ុន្តែកាលពីឆ្នាំមុន ម្ចាស់នៅតែផ្តល់ប្រាក់លើកទឹកចិត្តដល់បុគ្គលិកសម្រាប់ចំនួន ៥ ខែ បូកបន្ថែមប្រាក់ ៣ ម៉ឺនបាតទៀត៕ រក្សាសិទ្ធិដោយ៖ លឹម ហុង
