ភោជនីយដ្ឋានមួយក្នុងទីក្រុង Kuala Lumpur – ប្រទេសម៉ាឡេស៊ី ត្រូវបិទរយៈពេល ១៤ ថ្ងៃ បន្ទាប់ពីវីដេអូមួយត្រូវបានបញ្ចេញដែលបង្ហាញឲ្យឃើញសត្វកណ្តុរ១ក្បាល កំពុងស៊ីភ្លៅមាន់បំពង នៅលើថាសដាក់លក់។
កាសែត The Straits Times កាលពីថ្ងៃទី ២៥ ខែធ្នូ បានរាយការណ៍ថា ភោជនីយដ្ឋាននេះមានទីតាំងនៅទីក្រុង Pandan Indah ។
យ៉ាងណាមិញ វីដេអូរយៈពេល ១៥ វិនាទី បង្ហាញសត្វកណ្ដុរមួយក្បាល កំពុងស៊ីអាហារក្នុងភោជនីយដ្ឋាននេះផងដែរ បានរីករាលដាលនៅលើប្រព័ន្ធផ្សព្វផ្សាយសង្គម ដោយទទួលបានអ្នកចូលមើលច្រើនជាង ១.៥ លានដង ចាប់តាំងពីត្រូវបានបង្ហោះតាមអ៊ីនធឺណិត កាលពីថ្ងៃទី២៣ ខែធ្នូ។
អគ្គនាយកក្រសួងសុខាភិបាលម៉ាឡេស៊ី លោក Noor Hisham Abdullah បាននិយាយថា ពួកគេកំពុងស៊ើបអង្កេតករណីនេះ ហើយបានបញ្ជាឱ្យបិទភោជនីយដ្ឋានរយៈពេល ១៤ ថ្ងៃ ដោយសារតែការរំលោភលើផ្នែកទី១១ នៃច្បាប់អាហាររបស់ប្រទេសម៉ាឡេស៊ីឆ្នាំ១៩៨៣។
ភោជនីយដ្ឋាននេះ ក៏ត្រូវបានចោទប្រកាន់ពីបទរំលោភលើសុវត្ថិភាពអាហារ និងអនាម័យ ក្រោមបទប្បញ្ញត្តិអនាម័យអាហារឆ្នាំ ២០០៩ ផងដែរ។
គួរបញ្ជាក់ថា កន្លងមក មន្ត្រីសុខាភិបាល ត្រូវបានបញ្ជូនទៅពិនិត្យកាលនៅថ្ងៃទី២៤ ខែធ្នូ បន្ទាប់ពីមានអតិថិជនបានរាយការណ៍ ព្រោះតែដោយមិនពេញចិត្តនឹងកម្រិតអនាម័យនៅកន្លែងនេះ។
លោក Noor Hisham បានសង្កត់ធ្ងន់ថា ក្រសួងសុខាភិបាលម៉ាឡេស៊ី យកចិត្តទុកដាក់យ៉ាងខ្លាំងចំពោះអនាម័យ និងសុវត្ថិភាពចំណីអាហារ។
លោកក៏បានមានប្រសាសន៍ថា «យើងសូមអំពាវនាវដល់ប្រជាពលរដ្ឋ ជាពិសេសអ្នកកែច្នៃអាហារ និងម្ចាស់អាជីវកម្ម ទទួលខុសត្រូវក្នុងការធានាសុវត្ថិភាព និងអនាម័យចំណីអាហារ ដើម្បីជៀសវាងការពុល និងជំងឺដែលបណ្តាលមកពីអាហារ»៕ រក្សាសិទ្ធិដោយ៖ លឹម ហុង
