នេះជារឿងដ៏ភ្ញាក់ផ្អើល និងគួរឲ្យអស់សំណើចយ៉ាងខ្លាំងតែម្តង គ្រាដែលបានឃើញបុរស២នាក់ ត្រូវបានម្ចាស់ផ្សារទំនើបជាជនជាតិចិន ដាក់ទណ្ឌកម្មជំនួសប៉ូលិសចាប់ខ្លួន ឲ្យផឹកស្រា១ដបតម្លៃជិត 400$ ឲ្យអស់១ដប ទើបចេញបាន ក្រោយពីបានធ្វើសកម្មភាពចូលបន្លំលួចអស់ចំនួន ២ ដប។
ហេតុការណ៍នេះ បានកើតឡើងកាលពីយប់ថ្ងៃទី២៩ ខែធ្នូ ឆ្នាំ២០២២ នៅផ្សារទំនើបជនជាតិចិនយីហោ ហុងឈឺ ស្ថិតនៅក្នុងបុរីញូវថោន ភូមិព្រៃទាទី១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បើតាមបុរសម្នាក់ជាអ្នកលួច បានប្រាប់ឲ្យដឹងថា រូបគេបានចូលបន្លំលួចស្រាតម្លៃ 398$ ពីក្នុងផ្សារទំនើបជនជាតិចិនខាងលើ ចំនួន ២ ដប ដើម្បីយកទៅទុកផឹកឆ្លងឆ្នាំ នៅម្តុំ DN ។ ប៉ុន្តែ សំណាងមិនល្អ ក៏ត្រូវបានម្ចាស់ផ្សារទំនើបចិន ចាប់បាន ដាក់ទណ្ឌកម្មឲ្យផឹកឲ្យដាច់១ដប លេបក្លែមទឹកសុទ្ធយ៉ាងវេទនា មុនពេលអនុញ្ញាតឲ្យចាកចេញពីក្នុងផ្សារ។
ក្រោយពីបានឃើញបែបនេះ មហាជនអ្នកលេងបណ្តាញសង្គម បានខមិនទាំងអស់សំណើចថា៖ «ចេញធ្វើចោរលើកដំបូង បរាជ័យ ចាត់ទុកថាជាបទពិសោធន៍ជីវិត រកស៊ីលើកដំបូង នរណាក៏ខាតដែរ, អាហ៊ាយ៉ាប់ដែរហ្នឹង ជ្រុលជាឲ្យស្រាផឹកហើយ គ្រាន់សាច់តែក្លែមមួយចានសោះ ក៏មិនថែមឲ្យគ្នាដែរ, មើលហើយចុកច្អុលពោះវៀនជំនួស ព្រោះថាស្រាហ្នឹងមិនដឹងកំដៅកំរិតណាទេ,…»៕ រក្សាសិទ្ធិដោយ៖ លឹម ហុង
