នេះជារឿងថ្មីប្លែកទៀតហើយ ដែលកំពុងផ្ទុះការចាប់អារម្មណ៍យ៉ាងខ្លាំង នៅលើបណ្តាញសង្គមក្នុងប្រទេសថៃ ខណៈបានឃើញវិធីថ្មីមួយរបស់ព្រះសង្ឃចំណាស់មួយអង្គ ដែលបានអះអាងយកព្រះសារីរិកធាតុ ដាក់ក្នុងភ្នែក ជឿថានឹងធ្វើឲ្យចម្រើនមង្គលគ្រួសារ និងមានលាភសំណាង។
ជាក់ស្តែង តាមរយៈវីដេអូចែករំលែកពីគណនី TikTok មួយ បានបង្ហាញឲ្យដឹងឃើញព្រះសង្ឃមួយអង្គជាគ្រូ បានយកប្រើគ្រាប់ពណ៌សដូចថ្ម ដោយអះអាងថាជា ព្រះសារីរិកធាតុរបស់ព្រះសម្មាសម្ពុទ្ធ ដាក់ចូលក្នុងភ្នែកបុរសម្នាក់រយៈពេល ៣-៤ នាទី មុនពេលយកចេញពីភ្នែកវិញ។
សំឡេងក្នុងឃ្លីប ក៏ត្រូវបានលឺបញ្ជាក់ថា បើវាជាវត្ថុធាតុដើមពិតប្រាកដ បើយកទៅដាក់ក្នុងភ្នែក នោះនឹងមិនមានការប៉ះពាល់ដល់ភ្នែកឡើយ ហើយក៏មិនធ្វើឲ្យភ្នែកក្រហាយ និងទឹកភ្នែកក៏មិនហូរចេញដែរ ដែលគេជឿថាជាអព្ភូតហេតុនៃព្រះសារីរិកធាតុ។ តែទោះជាយ៉ាងណា មនុស្សជាច្រើនក៏ផ្ទុះការរិះគន់ ចំពោះទង្វើមិនគួរធ្វើបែបនេះ ព្រោះវាអាចមានគ្រោះថ្នាក់ដល់ភ្នែក, នេះបើតាមការប្រើចំណេះដឹង និងហេតុផល។
ក្រោយរឿងរ៉ាវនេះផ្ទុះឡើង អ្នកសារព័ត៌មាន Amarin TV ក៏បានធ្វើដំណើរទៅកាន់វត្ត Thao Yai ស្ថិតក្នុងភូមិ Moo 9 ឃុំ Nong Irun ស្រុក Ban Bueng ខេត្ត Chonburi ដើម្បីជួបព្រះគ្រូវិមុលធម្មាភិរក្ស Achan Kiang ព្រះជន្ម ៦៩ វស្សា ជាព្រះចៅអធិការវត្ត Thao Yai ។
ព្រះតេជគុណ វិមលធម្មាភិរក្ស បានបង្ហើបប្រាប់ក្រុមអ្នកសារព័ត៌មានថា មានព្រឹត្តិការណ៍បែបនេះកើតឡើងក្នុងឃ្លីបនោះរួចហើយ។ វាជាការសាកល្បងមើលថា តើសារីរិកធាតុទាំងនោះពិតជារបស់ព្រះអរហន្តឬក៏អត់។ ម្នាលភិក្ខុទាំងឡាយ កាលពីដើម បើភិក្ខុបានប្រតិបត្តិដោយប្រពៃរហូតបានដល់បរិនិព្វាន នោះក្រោយពីសោយទិវង្គត ឆ្អឹងនឹងត្រូវដុតចោលទៅជាសារីរិកធាតុ។
ព្រះចៅអធិការបន្តថា គ្មាននរណាម្នាក់នៅក្នុងសម័យបច្ចុប្បន្ននេះ ធ្លាប់បានឃើញនូវអ្វីដែលបានកើតក្នុងសម័យព្រះពុទ្ធទេ គ្មាននរណាដឹងថា ព្រះសារីរិកធាតុពិតឬមិនពិតនោះទេ ព្រោះសព្វថ្ងៃនេះមានសារីរិកធាតុនៅគ្រប់ទីកន្លែង ដូច្នេះនេះជាវិធីមួយដើម្បីបញ្ជាក់ ព្រោះសារីរិកធាតុពិតប្រាកដមិនរំខានភ្នែក ចំណែកសារីរិកធាតុនៃព្រះអរហន្តនោះ សេចក្តីប្រាថ្នាបានរលត់។ មូលហេតុនៃការប្រើលើភ្នែក ព្រោះវាផ្នែកដែលខ្សោយបំផុតក្នុងខ្លួនមនុស្ស។ ព្រះអង្គយល់ថា ព្រឹត្តិការណ៍នេះប្រហែលជាមានមនុស្សដែលសង្ស័យថា តើវាពិតជាអាចបញ្ជាក់បានឬទេ? ឬវាជាវត្ថុបុរាណពិតប្រាកដ?។
ចំណែកឯមូលហេតុដែលត្រូវបញ្ជាក់ក្នុងពេលនេះ ក៏ព្រោះតែប្រទេសជួបការលំបាកដោយសារជំងឺរាតត្បាត ខាតបង់សេដ្ឋកិច្ច រដ្ឋាភិបាលបរាជ័យក្នុងការគ្រប់គ្រងក្រុងជួបបញ្ហា ដូច្នេះហើយទើបព្រះពុទ្ធបរមសារីរិកធាតុរបស់ព្រះសម្មាសម្ពុទ្ធ ទ្រង់ត្រាស់ហៅប្រជាពលរដ្ឋមកចាក់ទឹកធ្វើសក្ការៈ ហើយប្រោះព្រំលើផ្ទះ លើក្បាល និងផឹកដើម្បីលាភសំណាង ព្រោះឥឡូវនេះគ្មានទីពឹងណាល្អជាងព្រះត្រៃបិដកទេ វាជាប្រភពនៃភស្តុតាង។
ទាក់ទងរឿងដ៏មិនគួរឲ្យជឿនេះ សាក្សីម្នាក់ដែលបានសាកល្បងរួច បានប្រាប់ថា «ខ្លួនខ្ញុំផ្ទាល់ក៏ធ្លាប់ដាក់សារីរិកធាតុក្នុងភ្នែកដែរ។ ខ្ញុំបានឃើញផ្ទាល់ភ្នែកថាវាជាការពិត ខ្ញុំអត់កុហកទេ។ មិនថាអ្នកជឿ ឬមិនជឿទេ ព្រោះកាលណាយកព្រះសារីរិកធាតុមកដាក់ក្នុងកែវភ្នែក នោះគ្រួសារមិនមានបញ្ហាការរកាំរកូសនោះទេ។ ម្យ៉ាងវិញទៀត វាក៏មិនធ្វើឲ្យហូរទឹកភ្នែក ឬឈឺភ្នែកទាល់តែសោះ។ បុរសនោះក៏បានបញ្ជាក់ថា ឃ្លីបនេះគឺជាឃ្លីបពិត មិនមានការកែសម្រួលអ្វីទាំងអស់»។
លោក Chalermpol Deechai អាយុ ៥៧ ឆ្នាំ ជាកូនសិស្សរបស់លោក ក៏បានលាតត្រដាងថា គាត់គឺជាមនុស្សម្នាក់ក្នុងចំណោមមនុស្សដែលបានធ្វើពិសោធន៏ព្រះសារីរិកធាតុ ដាក់ក្នុងភ្នែកដែរ។ លើកដំបូង គឺគាត់បានធ្វើវានៅក្នុងខែវិច្ឆិកា ២០២២ ដែលរាល់ពិធីត្រូវធ្វើនៅក្នុង Ubosot ។ នៅពេលនោះ ព្រះអង្គមិនដឹងជាមុនថា តើព្រះសារីរិកធាតុរបស់ព្រះអរហន្តមួយណា នឹងត្រូវដាក់ក្នុងភ្នែក ដោយដាក់ទាំងសងខាងភ្នែកតែម្តង ហើយនៅពេលព្រះសារីរិកធាតុនោះដែលមានទំហំប្រហែលកន្លះគ្រាប់ពោត ត្រូវបានដាក់បញ្ចូលក្នុងភ្នែក គាត់ទទួលស្គាល់ថា ពេលគាត់បិទភ្នែក វានៅតែមានអារម្មណ៍ថាមានអ្វីមួយកំពុងវិលចូលភ្នែកគាត់ ប៉ុន្តែមិនមានសញ្ញានៃការឈឺចាប់អ្វីនោះទេ។ មិនធ្វើឲ្យក្រហាយ ហូរទឹកភ្នែកឈឺចាប់ទាល់តែសោះ និងផ្ទុយទៅវិញ គឺវាមែនតែធ្វើឲ្យត្រជាក់ភ្នែកប៉ុណ្ណោះ៕ រក្សាសិទ្ធិដោយ៖ លឹម ហុង
