ថ្មីៗនេះ បុរសជាជនជាតិឥណ្ឌូនេស៊ីម្នាក់ ដែលបានបង្ហោះសារបង្ហាញការមិនពេញចិត្តយ៉ាងខ្លាំង បន្ទាប់ពីជួបបទពិសោធន៍ផ្ទាល់ ត្រូវបានមន្រ្តីអន្តោប្រវេសន៍ នៅព្រលានយន្តហោះក្នុងប្រទេសវៀតណាម បានទាមទារលុយ Tip ប្រមាណ ២០ ដុល្លារ ជាថ្នូរប្រគល់លិខិតឆ្លងដែន ឲ្យឡើងយន្តហោះ បានធ្វើឲ្យអ្នកលេងបណ្តាញសង្គមជាជនបរទេសជាច្រើន ចូលខមិនសម្តែងការរហួសចិត្ត និងផ្ទុះការវែកញែកព្រោងព្រាត។
នេះបើតាមគណនីហ្វេសប៊ុកឈ្មោះ Kugan Pillai នៅថ្ងៃទី២ ខែមករា ឆ្នាំ២០២៣ ម្សិលមិញនេះ បានបង្ហោះសាររៀបរាប់ឲ្យដឹងថា «ខ្ញុំនៅឯព្រលានយន្តហោះហាណូយ ខណៈត្រៀមចេញដំណើរទៅប្រទេសសិង្ហបុរីថ្ងៃនេះ ហើយនៅពេលនោះមន្ត្រីអន្តោប្រវេសន៍ម្នាក់នេះបានសរសេរ “Tip” នៅលើសំបុត្រយន្តហោះរបស់ខ្ញុំ។
ម្ចាស់គណនីខាងលើបន្តថា «គាត់កាន់លិខិតឆ្លងដែនរបស់ខ្ញុំ ហើយសុំ Tip។ ខ្ញុំបានសួរគាត់ថា ដើម្បីអ្វីដែរ? ប៉ុន្តែ គាត់គ្រាន់តែបន្តចង្អុលទៅលើអ្វីដែលគាត់បានសរសេរ។ ខ្ញុំមិនដឹងថាត្រូវធ្វើអ្វី ឬសុំជំនួយពីអ្នកណាទេ ព្រោះខ្ញុំក៏ប្រញាប់ឡើងជើងយន្តហោះរបស់ខ្ញុំដែរ។ តែនៅទីបញ្ចប់ ខ្ញុំបានផ្តល់ប្រាក់ដល់គាត់ចំនួន 500000 ដុង។
ជនបរទេសរូបនេះ ក៏បានបញ្ជាក់ឲ្យដឹងថា «ខ្ញុំបានជូនដំណឹងទៅ MFA របស់សិង្ហបុរីរួចហើយអំពីរឿងនេះហើយ។ ខ្ញុំដឹងថានេះអាចជារឿងធម្មតានៅក្នុងប្រទេសដទៃ ប៉ុន្តែខ្ញុំមានអារម្មណ៍ថា ខ្ញុំត្រូវបានគេចាប់ធ្វើជាចំណាប់ខ្មាំង ប្រសិនបើខ្ញុំមិនបានឱ្យលុយទេ ខ្ញុំនឹងមិនអាចទទួលបានលិខិតឆ្លងដែនរបស់ខ្ញុំវិញទេ….»។
ពិតណាស់ គ្រាន់តែលឺ Tip 20$ ជនបរទេសដទៃដែលធ្លាប់ជួបបទពិសោធន៍ដ៏ហួសចិត្តនេះ បានចូលខប្រាប់ថា៖ «ជារឿងធម្មតាទៅហើយ នៅកម្ពុជា និងវៀតណាម លើកក្រោយ គ្រាន់តែដកប្រាក់ដោយស្វ័យប្រវត្តិនៅក្នុងលិខិតឆ្លងដែនរបស់អ្នក ដូចជាតម្លៃ 10 ដុល្លារ នោះអ្វីៗនឹងរលូន»។ រីឯអ្នកខ្លះទៀត ក៏បានផ្តល់យោបល់ថា៖ «គួរតែរាយការណ៍ប្តឹងទៅ Cpib ដើម្បីទប់ស្កាត់អំពើពុករលួយនេះ,…»៕ រក្សាសិទ្ធិដោយ៖ លឹម ហុង
