តាមការកត់សំគាល់ នោះជាទំនៀមទម្លាប់តំបន់ស្រុកស្រែ គឺព្រះសង្ឃមានសិទ្ធិបិណ្ឌបាត តែក្នុងមូលដ្ឋានប្រជាពលរដ្ឋចំណុះជើងវត្តប៉ុណ្ណោះ ហើយក៏មិនអាចនិមន្តបិណ្ឌបាតជ្រៀតចូលក្នុងមូលដ្ឋានវត្តផ្សេងបានឡើយ។ លើសពីនេះ ប្រជាពលរដ្ឋជាពុទ្ធបរិសទ ក៏ស្គាល់ព្រះសង្ឃនៅក្នុងវត្តរបស់ខ្លួនគោរពប្រតិបត្តិយ៉ាងច្បាស់ផងដែរ ហេតុនេះ មិនអាចមានលោកសង្ឃក្លែងក្លាយណា មកបន្លំភ្នែកពួកគាត់បាននោះទេ។
ទោះជាយ៉ាងណា ដោយសារតែនៅក្នុងទីក្រុងភ្នំពេញ ជាទីកន្លែងប្រមូលផ្តុំមនុស្សរស់នៅ និងមករកស៊ីស្នាក់នៅកកកុញ ជាហេតុធ្វើឲ្យកើតមានលោកសង្ឃក្លែងក្លាយ មកបន្លំបិណ្ឌបាតជារឿយៗ ឬរាល់ថ្ងៃក៏មិនដឹងដែរ។ ពិតណាស់ ប្រជាពលរដ្ឋ ជាពុទ្ធបរិសទខ្លះ បានដាក់បាតទាំងបង្ខំចិត្ត បន្ទាប់ពីបានឃើញសង្ឃប្លែកៗមុខ មកបិណ្ឌបាត ខណៈតែងឃើញលោកសង្ឃខ្លះដោយមិនដឹងថា ជាសង្ឃក្លែងក្លាយ ឬ ត្រឹមត្រូវនោះ បានចុះពីរ៉ឺម៉កកង់បី ឬ PassApp កណ្តាលផ្លូវ រួចចាកចេញដើរបិណ្ឌតាមផ្ទះប្រជាពលរដ្ឋតែម្តង។
ដូចគិតក្នុងចិត្តមិនខុសមែន ដោយថ្មីៗនេះ សង្ឃក្លែងក្លាយចំនួន ៧ នាក់ ត្រូវបានសមត្ថកិច្ចក្របួចបានទាំងសំបុកតែម្តង បន្ទាប់ពីគេបានប្រទះឃើញកំពុងផ្លាស់ប្តូរសម្លៀកបំពាក់ដោះស្បង់ចីរវ ស្លៀកខោអាវ នៅក្នុងឡាន កាលពីវេលាម៉ោង ១០ ព្រឹក ថ្ងៃទី១៣ ខែមករា ឆ្នាំ២០២៣ ស្ថិតនៅតាមផ្លូវលេខ១ (ហៅផ្លូវតាកន) កែងផ្លូវសហព័ន្ធរុស្ស៊ី ខាងត្បូងវត្តទួលសុភាឃួន ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។ ជនក្លែងជាសង្ឃទាំង៧នាក់នេះ ត្រូវបានដឹងថា បានដើរបិណ្ឌបាតបច្ច័យតាមផ្សារ និងផ្ទះប្រជាពលរដ្ឋ នៅក្នុងខណ្ឌចំនួន៣ គឺ៖ទឹកដីខណ្ឌដង្កោ, ខណ្ឌកំបូល និងខណ្ឌពោធិ៍សែនជ័យ។
ក្នុងប្រតិបត្តិការបង្ក្រាបនេះ សមត្ថកិច្ចបានដកហូតវត្ថុតាងរួមមាន៖ រថយន្តចំនួន ១គ្រឿង, បាត្រសម្រាប់ដាក់បាយចំនួន ៧គ្រឿង, ឆ័ត្របាំងថ្ងៃចំនួន៧, ស្បង់ជីវមួយចំនួន និងសម្ភារមួយចំនួនទៀត។
ជនសង្ស័យទាំង ៨ នាក់ (រួមទាំងអ្នកបើកបរ) ត្រូវកម្លាំងនគរបាលនៃអធិការដ្ឋាននគរបាលខណ្ឌពោធិ៍សែនជ័យ ឃាត់ខ្លួន និងកសាងសំណុំរឿងបញ្ជូនទៅតុលាការ ចាត់ការតាមច្បាប់ផងដែរ៕ រក្សាសិទ្ធិដោយ៖ លឹម ហុង
