មហាជនពិតជាមានការហួសចិត្ត ស្ទើរថ្លែងពុំចេញ បន្ទាប់ពីបានឃើញរថយន្តស៊េរីទំនើប២គ្រឿង បើកជល់គ្នាដូចគោក្របី ហាក់គ្មានតម្លៃសីលធម៌សោះឡើយ ជាពិសេសអ្នកបើកបំពានគេ ដែលសមនឹងមាត់មហាជនថាមិនខុស «ឡានថ្លៃ តែម្ចាស់ថោក» មែន!។
បើតាមរយៈវីដេអូ គឺដំបូងឡើយ គេបានឃើញរថយន្តឡង់គ្រីស័រ ពណ៌ស១គ្រឿង និងរថយន្តទំនើប១គ្រឿងទៀតម៉ាក ssangyong tivoli កំពុងជល់ក្បាលគ្នា។ ប៉ុន្តែ បន្ទាប់មក ក៏ស្រាប់តែរថយន្តឡង់គ្រីស័រ បើករុញរថយន្តទំនើបតូចនោះ ឲ្យថយក្រោយជាច្រើនម៉ែត្រតែម្តង។
ទោះយ៉ាងណា បើតាមសង្កេតមើលក្នុងវីដេអូ នោះរថយន្តស៊េរីទំនើប tivoli ពណ៌សំបកឪឡឹក ស្ថិតក្នុងគន្លងស្របទិស ប៉ុន្តែ មិនដឹងជាយ៉ាងម៉េច ស្រាប់តែខាងឡានឡង់គ្រីស័រ បើកបំបុកគេបែបនេះ។ ជាក់ស្តែង បើតាមសាក្សីនៅកន្លែងកើតហេតុ ក៏ត្រូវបានលឺនិយាយថា ឡង់គ្រីស័រ ឈ្លើយ សាហាវមែន ព្រោះឡាន tivoli ស្ថិតនៅក្នុងគន្លងផ្លូវរបស់គេសោះ។
ក្រោយពីបានឃើញបែបនេះ បងប្អូនមហាជនបានសម្តែងការហួសចិត្តថា៖ «ឡានថ្លៃតែម្ចាស់ថោក, សីលធម៌ជាមនុស្សរបស់ខ្មែរយើង បាត់ទៅណាអស់ហើយ!, ឡានធំខុសហើយនៅធ្វើចរិតប្រហើន ឈ្លើយទៀត។ ខ្មែរសម័យបច្ចុប្បន្ន ធ្វើអ្វីអាងលុយ អំណាច បក្សពួក លែងគិតពីសុជីវធម៌អស់ហើយ អ្នកមានលុយគិតថាខ្លួនធ្វើអ្វីក៏ត្រូវដែរ..ឃើញជាក់ស្ដែងស្រាប់។
ទាក់ទងនឹងទង្វើដ៏អសិលធម៌នេះផងដែរ ក៏មានមតិលើកឡើងថា៖ «ខ្ញុំបើកបររាល់ថ្ងៃជួបច្រើនណាស់ មានតែការយល់យោគយល់គ្នាទេ ដែលនាំឲ្យជីវិតស្ងប់សុខ..រឿងដែលអត់បាន អត់ធ្មត់ទៅ ស្ងប់សុខរាងខ្លួន…»៕ រក្សាសិទ្ធិដោយ៖ លឹម ហុង
