អតីតារាកំប្លែង ដែលវិវត្តន៍ខ្លួនក្លាយជាតារាចម្រៀងដ៏ល្បីឈ្មោះ លោក សុខ មេសា (ហៅ ចឺម) ថ្មីៗនេះ បានធ្វើឲ្យមហាជនមានការភ្ញាក់ផ្អើលយ៉ាងខ្លាំង ព្រោះថាស្ងាត់ៗ ស្រាប់តែត្រូវបានព្រះមហាក្សត្រប្រោសប្រទានគ្រឿងឥស្សរិយយស ព្រះរាជាណាចក្រកម្ពុជា ថ្នាក់ «ធិបឌិន្ទ» ក្នុងចំណោមគ្រឿងឥស្សរិយយសតាមលំដាប់ថ្នាក់ ដល់សប្បុរសជន ៧០ រូប។
នេះបើតាមគណនីហ្វេសប៊ុកឈ្មោះ Ly Samedy កាលពីថ្ងៃទី១៤ ខែមេសា ឆ្នាំ២០២៣ បានបង្ហោះព្រះរាជក្រឹត្រប្រោសប្រទាន និងភ្ជាប់សារអបអរសាទរថា៖ «អបអរសាទរប្អូន ចឺម ដែលត្រូវបានត្រូវបានព្រះមហាក្សត្រប្រោសប្រទានគ្រឿងឥស្សរិយយស ព្រះរាជាណាចក្រកម្ពុជាថ្នាក់ ធិបឌិន្ទ»។ ហើយទន្ទឹមនឹងការបង្ហោះនេះ ឃើញថាមានការសាទរយ៉ាងច្រើនពីសំណាក់មហាជនផងដែរ។
ទោះយ៉ាងណា ក្រោយឃើញនាយ ចឺម ត្រូវបានព្រះមហាក្សត្រប្រទានគ្រឿងឥស្សរិយយសមួយនេះ ក៏ស្រាប់តែឃើញមន្រ្តីយោធាម្នាក់ បានបញ្ចេញមតិហាក់សម្តែងការហួសចិត្តរៀបរាប់តាមរយៈខមិនថា៖ «ខ្ញុំបោះតង់ដេកក្នុងព្រៃរាប់ឆ្នាំដើម្បីបម្រើជាតិ ការពារព្រំដែន មិនទាន់បានមេដាយ រឺប័ណ្ណសរសើរមួយផង អាប្អូននេះដើរតែច្រៀងយកលុយដាក់ហោប៉ៅខ្លួនឯងសោះ បានគ្រឿងឥស្សរិយយសខ្ពស់ដល់ថ្នាក់ហ្នឹង បងសុំសរសើរហើយ»។
តែទន្ទឹមនឹងមន្រ្តីយោធារូបនោះ បានបង្ហាញអារម្មណ៍មិនពេញចិត្ត ក្នុងនោះ ក៏មានអ្នកមានប្រាប់ឲ្យដឹងថា នាយ ធ្លាប់មានស្នាដៃធ្វើផ្លូវ១ខ្សែនៅកំពង់ស្ពឺ ផងដែរ។
ពិតណាស់ កាលពី២០២១ ឆ្នាំកន្លងទៅនេះ នាយ ចឺម បានជួយធ្វើផ្លូវអ្នកភូមិ នៅស្រុកកំណើតរបស់ខ្លួន ស្ថិតក្នុងឃុំមហាឬស្សី ស្រុកគងពិសី ខេត្តកំពង់ស្ពឺ។ ហើយការជួយធ្វើផ្លូវនេះ ចាយ ចឺម ក៏បានបង្ហោះសារបញ្ជាក់កាលពីថ្ងៃទី៣១ ខែមីនា ឆ្នាំ២០២២ ថា «ធ្វើបុណ្យទាន់រកបាន ជួយធ្វើផ្លូវជូនឃុំមហាឫស្សីយើង អរគុណដល់មេភូមិ អរគុណមេឃុំ ដែលបានជួយ ស្រុកភូមិយើង ហេងៗ»៕ រក្សាសិទ្ធិដោយ៖ លឹម ហុង
