កាលពីថ្ងៃទី១៦ ខែមករា ឆ្នាំ២០២៣ ម្សិលមិញនេះ ម្ចាស់សំអាងការមួយ ដែលមានគណនីហ្វេសប៊ុកឈ្មោះ គង្គា លំអរ មង្គល បានបង្ហោះសារទាំងក្តៅចិត្តថា៖ «ប្រយ័ត្ន អ្នកជិះផ្លូវជាតិលេខ ៤ ប៉ូលីស ខេត្តកំពង់ស្ពឺផាកសាហាវណាស់ ដឹងយើងប្រញ៉ាប់ ផាក 200$ អោយបាញ់ចូលកុងហើយ បន្លំមិនអោយវិក័យប័ត្រទៀត ហើយ ប៉ូលីស ឈ្មោះដូចក្នុង ABA (Khem Sothearith ) បានយកទូរស័ព្ទខ្ញុំលុបរូបចេញទៀត គ្រាន់តែខ្ញុំថតប្រាប់អ្នកផ្ទះថាប៉ូលីសចាប់»។
ក្រោយរឿងនេះបានផ្ទុះឡើង ស្នងការដ្ឋាននគរបាលខេត្តកំពង់ស្ពឺ បានចេញសេចក្តីបំភ្លឺ និងក៏ដូចបញ្ជាក់ឲ្យដឹងពីការដកបញ្ឈរជើងបណ្តោះអាសន្ន ទៅលើនគរបាលចរាចរ ១០ នាក់ ដើម្បីអនុវត្តតាមវិន័យតាមបទបញ្ជាកងកម្លាំងនគរបាលជាតិ។
ស្នងការខេត្តកំពង់ស្ពឺ បានឲ្យដឹងថា កាលពីថ្ងៃទី១៤ ខែមករា ឆ្នាំ២០២៣ សមត្ថកិច្ចនគរបាលចរាចរ បានរឹតបណ្ដឹងច្បាប់ចរាចរណ៍ផ្លូវគោកនៅចំណុចផ្លូវជាតិលេខ៤ គីឡូម៉ែត្រ៧៩-៨០ និងបានឃាត់រថយន្ដកូរ៉េដឹកទំនិញសំពីងសំពោង មួយគ្រឿងស្លាកលេខភ្នំពេញ 2BP-4662 ក្នុងទិសដៅពីខាងកើតទៅទិសខាងលិច (ឆ្ពោះទៅខេត្ដព្រះសីហនុ)។
ក្នុងការហៅឃាត់នោះ សមត្ថកិច្ចបានពិនិត្យរកឃើញអ្នកបើកបរឈ្មោះ នី វ៉ាន់ហេង ភេទប្រុស អាយុ ២២ ឆ្នាំ គ្មានប័ណ្ណបើកបរ និងដឹកទំនិញសំពីងសំពោងល្មើច្បាប់ ហើយបទល្មើទាំងពីរករណីនេះ គឺត្រូវពិន័យ ១,២០០,០០០ រៀល និងពិន័យ ១៥០,០០០ រៀលបន្ថែម ល្មើសទំនិញសំពីងសំពោង។ នៅពេលនោះ អ្នករួមដំណើរ និងជាម្ចាស់សំអាងការបានប្រាប់ថា សុំសំរួល ដោយសុំជូនជាប្រាក់ ២០០ ដុល្លារ តែសុំលេខ ABA ដើម្បីឱ្យអ្នកផ្ទះបាញ់លុយចូល ព្រោះខ្លួនមិនមានប្រាក់ជាប់ខ្លួន។
ទោះជាយ៉ាងណា អ្វីដែលហួសចិត្តខ្លាំងបំផុតនោះ គឺត្រង់ថាបន្ទាប់បាញ់លុយឲ្យ ហើយគ្រាន់តែថតទុកផ្ញើឲ្យអ្នកផ្ទះមើលជាភស្តុតាង បែរជាលោកប៉ូលិសឈ្មោះ ខែម សុធារិទ្ធ អត្ដលេខ ៧៥៧៤៣ តួនាទី នាយផ្នែក ការិយាល័យចរាចរណ៍ផ្លូវគោក បែរជាទាញទូរស័ព្ទដើម្បីលុបរូបចោល ធ្វើដូចជាចោរលួចបន្លំដូចគេថាមិនខុស ហើយថែមទាំងមិនចេញវិក័យប័ត្រឲ្យទៀត ជាហេតុធ្វើឲ្យម្ចាស់ឡានក្តៅក្រហាយ បង្ហោះផ្អើលបានបញ្ឈរជើង១០នាក់បែបនេះតែម្តង៕ រក្សាសិទ្ធិដោយ៖ លឹម ហុង
