ដូចដែលបងប្អូនមហាជន បានទទួលជ្រាបរួចហើយ ចំពោះហេតុការណ៍ដ៏ភ្ញាក់ផ្អើលមួយ រថយន្ត Land Cruiser ពាក់ស្លាកលេខ ភ្នំពេញ 2BR-7172 បើកបុកនិងរុញ រថយន្តស៊េរីទំនើបមួយគ្រឿងទៀតម៉ាក ssangyong tivoli ដែលឃើញហើយពិតជាគួរឲ្យហួសចិត្តខ្លាំងបំផុត។ តែយ៉ាងណា ករណីនេះ ត្រូវបានគេស្តីបន្ទោស គឺមកពីខាង ឡង់គ្រីស័រ បើកឈ្លើយ បំពានគេទាំងស្រុងតែម្តង ព្រោះថារថយន្ត tivoli បើកនៅលើគន្លងផ្លូវរបស់គេប៉ុណ្ណោះ។
ជាក់ស្តែង បើតាមអ្នកដែលបានឃើញហេតុការណ៍នេះផ្ទាល់ ត្រូវបានលឺនិយាយក្នុងវីដេអូថា «សាហាវមែន ឡង់គ្រីស័រ សាហាវមែន! គេនៅលើគន្លងផ្លូវគេសោះ!» និងក៏បានលឺបុរសម្នាក់ទៀតនិយាយដែរថា «ឡានមុនគេចផុត តែឡាននេះគេចអត់រួច»។ នេះសបញ្ជាក់ឲ្យឃើញច្បាស់ថា អ្នកបើកឡានឡង់គ្រីស័រ ជាមនុស្សទំនើង ឬអាងអំណាចតែម្តង។
ពិតណាស់ តាមរយៈវីដេអូចែករំលែកកាលពីម្សិលមិញ នោះមហាជនជាច្រើនពុំបានដឹងថា ហេតុការណ៍ដ៏មហាហួសចិត្តនេះ កើតឡើងនៅម្តុំណានោះទេ ដោយម្នាក់ៗបានត្រឹមព្រលះភាគី ឡង់គ្រីស័រ ចាស់ៗដៃប៉ុណ្ណោះ។ ទោះយ៉ាងណា តាមប្រភពចែករំលែកនៅលើបណ្តាញសង្គមហ្វេសប៊ុកថ្មីៗនេះ (ថ្ងៃទី១៧ ខែមករា ឆ្នាំ២០២៣) បានប្រាប់ឲ្យដឹងថា ហេតុការណ៍នេះបានកើតឡើង កាលពីវេលាម៉ោងប្រមាណ ៨ ព្រឹកថ្ងៃទី១៦ ខែមករា ឆ្នាំ២០២៣ នៅតាមបណ្តោយ ផ្លូវព្រះមុនីវង្ស ក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ។
ជាលទ្ធផល ឃើញថារថយន្តទំនើបទាំងពីរ បានរងការខូចខាតផ្នែកខាងមុខរៀងៗខ្លួន ហើយសមត្ថកិច្ចក៏បាននាំយក ទៅដោះស្រាយគ្នានៅប៉ុស្តិ៍ផងដែរ បន្ទាប់ពីធ្វើការវាស់វែងតាមជំនាញថាតើអ្នកណាបំពានអ្នកណា!!៕ រក្សាសិទ្ធិដោយ៖ លឹម ហុង
