បុរសបានទទួលនូវការកោតសរសើរយ៉ាងខ្លាំង បន្ទាប់ពីបានលោតចូលក្នុងទឹកបឹង ដោយមិនគិតពីគ្រោះថ្នាក់ខ្លួនឯង ដើម្បីជួយសង្គ្រោះមនុស្សប្រុសស្រីចំនួន ៣ នាក់ បន្ទាប់ពីរថយន្ត Perodua Myvi របស់ពួកគេ បានរអិលធ្លាក់ចូលក្នុងទឹកបឹង នៅ Jalan Bukit Pasir រដ្ឋ Johor ប្រទេសម៉ាឡេស៊ី។
នៅក្នុងបទសម្ភាសន៍ជាមួយ Berita Harian លោក Suzaini Mohd Sadali បាននិយាយថា គាត់កំពុងបើកឡានជុំវិញតំបន់ Tasik Merdeka ហើយនៅពេលនោះគាត់ក៏បានឃើញរថយន្តនៅពីមុខគាត់ រអិលធ្លាក់ចូលទៅក្នុងបឹងតែម្តង។
លោកបានបន្តថា៖ «បន្ទាប់មក ខ្ញុំបានឈប់រថយន្ត ហើយឃើញស្ត្រី២នាក់នៅក្នុងរថយន្ត ម្នាក់នៅក្បែរកៅអីអ្នកបើកបរ និងម្នាក់ទៀតនៅកៅអីក្រោយ បានតោងជាប់នឹងតួរថយន្ត ខណៈកំពុងយំ។ អ្នកបើកបររថយន្តជាបុរស ហើយគាត់បានឃើញខ្ញុំ គាត់ស្រែកឲ្យជួយផង ខ្ញុំក៏ស្ទុះទៅដោយមិនស្ទាក់ស្ទើរ ព្រោះខ្ញុំមិនអាចទុកពួកគេនៅទីនោះបែបនេះបានទេ»។
Suzaini បាននិយាយថា គាត់អាចនាំយកបុរសរងគ្រោះទៅមាត់បឹង មុនពេលបុរស ២ នាក់ផ្សេងទៀត មកជួយសង្រ្គោះនារី ២ នាក់ ដោយទាញពួកគេទៅច្រាំងបឹងដោយសុវត្ថិភាព។
គាត់បានសម្តែងក្តីរំភើបថា «ខ្ញុំពិតជាត្រេកអរណាស់ ដែលជនរងគ្រោះទាំងអស់ ត្រូវបានសង្គ្រោះពីការលង់ទឹក។ នេះជាបទពិសោធន៍ដ៏មានតម្លៃសម្រាប់ខ្ញុំ។ ខ្ញុំចេះហែលទឹក ប៉ុន្តែខ្ញុំមិននឹកស្មានថាបឹងនេះជ្រៅខ្លាំងទេ ហើយប្រសិនបើជនរងគ្រោះមិនត្រូវបានជួយសង្គ្រោះទាន់ពេលទេ ពួកគេប្រហែលជាលង់ទឹកស្លាប់ហើយ»។
ជាមួយគ្នានេះ លោក Ismail Dollah អធិការនគរបាលស្រុក Batu Pahat បាននិយាយថា ហេតុការណ៍នេះ លោកទទួលបានសេចក្តីរាយការណ៍ពីសាធារណជន នៅម៉ោង ១ និង ៣០ នាទី រសៀល។
លោក Dollah និយាយថា ការស៊ើបអង្កេតបឋម បានរកឃើញថា បុរសម្នាក់ និងមិត្តស្រី២នាក់ បានធ្វើដំណើរតាមរថយន្ត ចាកចេញពី Tongkang Pechah ទៅកាន់ Batu Pahat។
លោក Dollah ក៏បានបញ្ជាក់ឲ្យដឹងថា បុរសអ្នកបើកបរបានបាត់បង់ម្ចាស់ការ ហើយរថយន្តក៏បានរអិលធ្លាក់ចូលបឹងខាងស្តាំផ្លូវ ប៉ុន្តែដោយមានការជួយពីប្រជាពលរដ្ឋ ទើបជនរងគ្រោះទាំង៣នាក់ រួចផុតពីគ្រោះថ្នាក់ មុនពេលរថយន្តបានលិច។ ជនរងគ្រោះទាំងអស់មានអាយុចន្លោះពី ២៥ ទៅ ២៨ ឆ្នាំ មិនមានអ្នកណាម្នាក់រងរបួសអ្វីនោះទេ៕ រក្សាសិទ្ធិដោយ៖ លឹម ហុង
