អ្នកគ្រូពេទ្យចិត្តធម៌ រៀបចំច្រកថ្នាំដូចថង់សណ្តែកដីព្យួរលក់តាមតូប ដល់អ្នកជំងឺវ័យចំណាស់ ដោយសារបារម្ភរឿងមួយនេះ…

January 23, 2023

ថ្មីៗនេះ អ្នកលេង TikTok មួយឈ្មោះ tunnipapun ដែលបានបង្ហោះវីដេអូឃ្លីបបង្ហាញស្រ្តីចំណាស់ម្នាក់ លើកបង្ហាញកញ្ចប់ថ្នាំពេទ្យជាខ្សែដ៏ចម្លែក ប្រៀបដូចជាថង់សណ្តែកដី ឬ គ្រឿងផ្សំ ដែលព្យួរនៅតូបលក់ដូរ បានទទួលការចាប់អារម្មណ៍យ៉ាងខ្លាំង ពីសំណាក់អ្នកនិយមលេងអ៊ីនធើរណែត។ ដំបូង គេមានការងឿងឆ្ងល់ថា តើគ្រូពេទ្យធ្វើបែបនេះ ដើម្បីអ្វី ប៉ុន្តែ ក្រោយដឹងរឿងពិត ខណៈចំណងជើងវីដេអូសរសេរថា៖ «អូន ខ្លាចយាយលេបថ្នាំច្រឡំ!» ធ្វើឲ្យម្នាក់ៗសម្តែងការកោតសរសើរទៅដល់គ្រូពេទ្យយ៉ាងខ្លាំង។

តាមបើអ្នកកាសែត Sanook បានប្រាប់ឲ្យដឹងថា អ្នកគ្រូពេទ្យនៅមន្ទីរពេទ្យ Si Satchanalai ខេត្ត Sukhothai ប្រទេសថៃ បានរៀបចំថ្នាំទៅតាមវេជ្ជបញ្ជា ប៉ុន្តែ ពុំបានដាក់ថ្នាំទាំងនោះចូលក្នុងថង់តែមួយទេ ដោយសារតែឃើញអ្នកជំងឺមានវ័យចំណាស់ទៅហើយ។ អ្នកគ្រូពេទ្យចិត្តល្អនៅទីនោះ ក៏បានពន្យល់ថា ប្រសិនបើដាក់លាយបញ្ចូលគ្នា នោះគាត់នឹងលេបច្រឡំគ្រាប់ថ្នាំ ហេតុនេះ ក៏បានចំណាយពេលបែងចែកវេចខ្ចប់ថ្នាំដាក់ជាកញ្ចប់ៗ និងកឹបភ្ជាប់ខ្សែជាបន្តបន្ទាប់គ្នា ដើម្បីឲ្យអ្នកជំងឺចំណាស់នោះងាយស្រួលក្នុងការលេបម្តង១ថង់ មិនមានការភ័ន្តច្រឡំ។

អ្នកគ្រូពេទ្យឈ្មោះ Panyaporn Ketkram និង Piriya Nuchkham បានប្រាប់ឲ្យដឹងថា លោកយាយរូបនេះបានមកជួបគ្រូពេទ្យរៀងរាល់ ២ ខែម្តង ដោយគាត់មានជំងឺពីកំណើតទាក់ទងនឹងជំងឺបេះដូងមិនប្រក្រតី ត្រូវមកទទួលថ្នាំប្រឆាំងការកកឈាមដែលថ្នាំមានផលរំខាន ដូច្នេះត្រូវរៀបចំជាថង់តូចៗ ហើយដេរតាមលំដាប់កាលបរិច្ឆេទ ដើម្បីកុំឱ្យមានការភ័ន្តច្រឡំ និងលេបថ្នាំក្នុងកម្រិតត្រឹមត្រូវជារៀងរាល់ថ្ងៃ។ ការផ្តល់ថ្នាំដល់ជីដូនរូបនេះ ជាថង់បែបនេះ គឺមានរយៈពេល ៤-៥ឆ្នាំ មកហើយ រួមទាំងករណីអ្នកជំងឺមួយចំនួនផងដែរ។ ហើយដោយសារឃើញចម្លែក ក៏មានគេថតរូបបង្ហោះលើ TikTok តែម្តងទៅ។

លោកវេជ្ជបណ្ឌិត Saksit Bor Kaew ប្រធានមន្ទីរពេទ្យ Si Satchanalai បានមានប្រសាសន៍ថា លោកសូមថ្លែងអំណរគុណចំពោះក្រុមគ្រូពេទ្យ និងឱសថការីរបស់មន្ទីរពេទ្យ ដែលបានយកចិត្តទុកដាក់ដល់អ្នកជំងឺ រួមគ្នារកវិធីជួយសម្រួលដល់អ្នកជំងឺ ជាពិសេសមនុស្សចាស់ភ្នែកខ្សោយ សតិមិនគ្រប់ ទទួលលេបថ្នាំបានត្រឹមត្រូវ។ ការធ្វើបែបនេះនឹងមានឥទ្ធិពលវិជ្ជមានលើការព្យាបាលអ្នកជំងឺ។

ចំណែកលោកយាយអ្នកជំងឺ អាយុ ៧៦ ឆ្នាំ ដែលស្ថិតក្នុងឃ្លីបនោះ បាននិយាយថា រៀងរាល់២ខែម្តង គាត់ត្រូវទៅទទួលថ្នាំនៅមន្ទីរពេទ្យ Si Satchanalai ។ ដោយសារជំងឺពីកំណើត បុគ្គលិកពេទ្យបានដេរថង់កញ្ចប់ថ្នាំពណ៌ត្នោតរៀបចំដូចនេះ។ ពីមុន ថ្នាំត្រូវដាក់ក្នុងថង់រួមបញ្ចូលគ្នា ដែលធ្វើឲ្យគាត់មានការច្របូកច្របល់ ដោយមិនដឹងថាគ្រាប់ថ្នាំមួយណាដែលត្រូវលេប និងពេលណា? ព្រោះគាត់មិនចេះអានអក្សរ។ ពេលថង់ថ្នាំត្រូវបានចាក់ចេញ វាត្រូវបានលាយបញ្ចូលគ្នាទាំងអស់ ធ្វើអោយគាត់លេបថ្នាំខុសញឹកញាប់ រហូតគ្រូពេទ្យដឹងថាគាត់លេបថ្នាំខុស។

លោកយាយរូបនេះ បន្តថា ដោយងាយស្រួល ក្នុងការលេបលែងភ័ន្តច្រឡំទៀត ធ្វើឲ្យជំងឺរបស់គាត់មិនធ្ងន់ធ្ងរ អាចរស់បានធម្មតាដូចសព្វថ្ងៃនេះ អរគុណគ្រូពេទ្យ និងឱសថការី ដែលបានជួយរៀបចំថ្នាំឲ្យ យ៉ាងយកចិត្តទុកដាក់៕ រក្សាសិទ្ធិដោយ៖ លឹម ហុង