ពិតណាស់ បើទោះជាមានការហាមប្រាមយ៉ាងណា ក៏ប្រជាពលដ្ឋខ្មែររស់នៅឥតរបៀបមួយចំនួនតូច នៅតែបោះចោលសំរាមពាសវាលពាសកាលដដែល ជាពិសេសនៅតាមទីកន្លែងតំបន់ទេសចរតែម្តង ដោយមិនខ្វល់ពីផលប៉ះពាល់ដល់បរិស្ថានសោះឡើយ។
ដោយឡែក ក្រឡេកមើលរូបភាពទាំងនេះវិញ ពិតជាហួសចិត្ត និងគួរឲ្យស្អប់ខ្លាំងតែម្តង ចំពោះទង្វើបោះចោលសំរាមនៅលើឆ្នេរសមុទ្រក្រុងព្រះសីហនុ ពីសំណាក់ក្រុមអ្នកដើរលេងមួយក្តាប់តូច ក្នុងថ្ងៃចូលឆ្នាំចិន។ ឆ្លើយតបទៅនឹងទង្វើគ្មានគិតពីផលប៉ះពាល់ដល់បរិស្ថាននេះ អភិបាលខេត្តព្រះសីហនុ ឯកឧត្តម គួច ចំរើន បានដាក់បណ្តាសាធ្ងន់ៗយ៉ាងដូច្នេះថា៖ «ស៊ីបោះ របៀបនេះ សូមអោយ ក្រ ១០០ជាតិ។ ថ្ងៃសែនចូលឆ្នាំចិន»។
ក្រោយពីបានឃើញបែបនេះ បងប្អូនប្រជាពលរដ្ឋខ្មែរជាអ្នកប្រើប្រាស់បណ្តាញសង្គម បានមានមតិដាក់ឲ្យធ្ងន់ៗបន្ថែមថា៖ «នេះមិនហៅថាស៊ីទេ គេហៅថាច្រំគ្មានរបៀបតែម្ដង ចូលឆ្នាំចិនមក ធ្វើចរឹកចឹង ឲ្យជាប់បណ្ដាសាចឹងចុះ, សូមថែម២០០ជាតិទៀត បានត្រូវ, និយាយមិនស្តាប់ មានតែដាក់បណ្តាសា ខ្ញុំគាំទ្រ100%លោកពូ,…»។
តែជាមួយទង្វើរបស់មនុស្សគ្មានមាយាទនេះ អ្នកលេងដទៃ ក៏បានជួយផ្តល់ជាយោបល់មួយនេះថា៖ «ត្រូវសរសេរបំរាមដាក់អោយមើលឃើញ បើអង្គុយលេងតាមឆ្នេរហើយទុកសំរាមចោល ត្រូវផាកពិនយ័ចំនួយ ១លានរៀល (ឃើញបំរាមចឹងប្រហែលជាញញើតហើយ), គួរដាក់កាមេរ៉ា ព្រោះពលរដ្ឋមួយក្តាប់តូច ខ្វះសីលធម៌ក្នុងខ្លួនណាស់ អាងមានលុយ ស៊ីចុកបោះចោលគ្មានរបៀប អត់ស្គាល់អ្វីជាបរិស្ថានទេ ហើយបើរកមុខឃើញ គួរផាកពិន័យជាប្រាក់ ឬដាក់ពិន័យអោយដើរសំអាតឆ្នេរ៣ថ្ងៃ បានសមមុខ»៕ រក្សាសិទ្ធិដោយ៖ លឹម ហុង
