កូនក្រមុំចេញពីរថយន្ត ដែលពីដើមជាប្រពៃណីសម្រាប់ភាពរុងរឿង ប៉ុន្តែបច្ចុប្បន្ន ពិធីចុះពីលើរថយន្តបានវិវត្តន៍ទៅជាជំនួញបណ្តើរៗហើយ។ ជាក់ស្តែង កាលពីពេលថ្មីៗនេះ កូនក្រមុំនៅទីក្រុង Shangrao ខេត្ត Jiangxi ប្រទេសចិន បានបដិសេធមិនព្រមចុះពីឡាន ដោយនៅតែអង្គុយក្នុងនោះ បំណងចាំទទួលអំណោយពីសាច់ញាតិ គ្រួសារខាងកូនកំលោះ ទើបចុះ ដែលបង្កឲ្យមានការរិះគន់ និងហួសចិត្តយ៉ាងខ្លាំង ពីសំណាក់អ្នកប្រើប្រាស់អ៊ីនធើរណែត។
យោងតាមរបាយការណ៍របស់ NetEase អ្នកនិយមលេងអ៊ីនធឺណិតមួយចំនួនបានទម្លាយព័ត៌មានថា រថយន្តមង្គលការបានមកដល់មាត់ទ្វារផ្ទះរួចហើយ ប៉ុន្តែកូនក្រមុំនៅតែអង្គុយញញឹមយ៉ាងផ្អែមល្ហែមមិនព្រមចុះពីឡាននោះទេ ហើយប្រាកដណាស់គ្រួសារខាងកូនកំលោះ ក៏បានដឹងថានាងចង់សុំកាដូតាមទម្លាប់ផងដែរ។ ក្រោយរង់ចាំកូនក្រមុំពីចុះឡានមួយសន្ទុះធំ សាច់ញាតិរបស់គ្រួសារកូនកំលោះ ក៏បានយកភួងផ្កា និងប្រាក់មកឱ្យនាងភ្លាមៗ។ កូនក្រមុំរូបនេះ សូម្បីមិនបានមើលថា តើភាគីម្ខាងទៀតដែលហុចលុយឲ្យជានរណាផង ដោយនាងគ្រាន់តែប្រញាប់យកលុយទាំងអស់ ហើយចាប់ផ្តើម «រាប់» នៅចំពោះមុខមនុស្សគ្រប់គ្នាប៉ុណ្ណោះ។
ក្រោយពីបានឃើញសកម្មភាពដ៏ហួសចិត្តនេះ សាច់ញាតិខាងកូនកំលោះដាស់តឿននាងថា «ឈប់រាប់ ឈប់រាប់ វាមិនអីទេ»។ ទោះយ៉ាងណាក៏ដោយ កូនក្រមុំមិនបានយកចិត្តទុកដាក់ស្តាប់ទេ ដោយនាងនៅតែបន្តរាប់លុយនៅក្នុងដៃ និងហាក់មានការព្រួយបារម្ភ យកចិត្តទុកដាក់ជាពិសេសលើលុយ។ ក្រមុំរូបនេះថែមទាំងខ្លាចថា គ្រួសារប្តីឲ្យលុយនាងតិចតួចទៀតផង ដោយមិនខ្វល់ពីភាពអាម៉ាស់ និងតម្លៃសេចក្តីថ្លៃថ្នូរផ្ទាល់ខ្លួនសោះឡើយ។
ទាក់ទងរឿងដ៏ហួសចិត្តនេះ គេក៏បានលើកឡើងថា អាពាហ៍ពិពាហ៍ដ៏កក់ក្តៅ មិនគួរណាក្លាយជា «ប្រតិបត្តិការរូបិយវត្ថុ» បែបនេះទាល់តែសោះ។ ទំនាក់ទំនងរវាងប្តីប្រពន្ធក្រោយរៀបការ មិនត្រូវបានវាស់វែងជាប្រាក់ឡើយ ប៉ុន្តែយុវជនសម័យនេះតែងប្រើលុយដើម្បីវាស់វែងគ្នា។ អាពាហ៍ពិពាហ៍អាស្រ័យលើទំនាក់ទំនងរវាងភាគីទាំងពីរ ប៉ុន្តែ ឥឡូវនេះវាបានវិវត្តទៅជាប្រភេទនៃ «ប្រតិបត្តិការលុយ» ទៅវិញ៕ រក្សាសិទ្ធិដោយ៖ លឹម ហុង
