អាជ្ញាធរឥណ្ឌូណេស៊ី បាននិយាយថា ក្រពើមួយក្បាលបានជួយក្នុងការស្វែងរកក្មេងប្រុសដែលបាត់ខ្លួន ដែលគួរឲ្យសោកស្ដាយ បានស្លាប់បាត់បង់ជីវិតទៅហើយ នៅពេលត្រូវបានរកឃើញ។
វីដេអូដែលបានថតកាលពីថ្ងៃសុក្រ សប្តាហ៍មុន ចេញពីមាត់ទន្លេ Jawa ក្នុងទីក្រុង Kutai Kartanegara ភាគខាងកើត Kalimantan បានបង្ហាញពីក្រពើដ៏ធំមួយក្បាល កំពុងហែលក្នុងទឹក ខណៈពេលដែលមានរូបរាងដូចរាងកាយមនុស្សនៅក្នុងមាត់របស់វា។ តែភ្លាមៗនោះ គេបានជឿជាក់ថា ប្រាកដជាសាកសពជារបស់ក្មេងប្រុសអាយុ៤ឆ្នាំ ឈ្មោះ Muhammad Ziyad Wijaya ដែលបានបាត់ខ្លួននៅជុំវិញមាត់ទន្លេនេះ កាលពី២ថ្ងៃមុន។
ភ្នាក់ងារស្វែងរក និងជួយសង្គ្រោះក្នុងតំបន់ បន្ទាប់មកបានយកសាកសពរបស់ Muhammad មកវិញ បន្ទាប់ពីក្រពើនោះបាន «ប្រគល់» នៅជិតមាត់ទន្លេ មុនពេលវាហែលចាកចេញទៅឆ្ងាយ។
លោក Melkanius Kotta ប្រធានទីភ្នាក់ងារស្វែងរក និងសង្គ្រោះ Kalimantan ភាគខាងកើត បាននិយាយថា «តាមរយៈលទ្ធផលពិនិត្យ បានបង្ហាញថា ពុំមានស្នាមខាំនៅលើដងខ្លួនរបស់ Muhammad ពោលគឺសាកសពនៅស្អាតដដែល «គ្មានអ្វីត្រូវបានបាត់» នោះទេ។ យើងគិតថា ក្រពើពិតជាបានជួយក្នុងការស្វែងរកក្មេងប្រុសរងគ្រោះនោះមែន»។
វាមិនច្បាស់ទេថា អ្វីទៅដែលបណ្តាលឱ្យ Muhammad លង់ទឹក ហើយថាតើក្រពើនៅមាត់ទន្លេ មានអ្វីពាក់ព័ន្ធនឹងការស្លាប់របស់ក្មេងប្រុសនេះតាំងពីដំបូងនោះដែរ។
អាជ្ញាធរបានកត់សម្គាល់ថា ករណីស្រដៀងគ្នានេះ គឺបានកើតឡើងកាលពីឆ្នាំ ២០១៧ ដែលបុរសអាយុ ៤០ ឆ្នាំម្នាក់ កំពុងងូតទឹកមាត់ទន្លេ ហើយពេលនោះ គាត់ត្រូវក្រពើចាប់អូសចូលទៅក្នុងទឹក។
បន្ទាប់មក អ្នកស្រុកបានស្វែងរកជំនួយពីគ្រូមន្តអាគម ដែលអាចនិយាយបញ្ចុះបញ្ចូលក្រពើនោះ ឱ្យប្រគល់សាកសពជនរងគ្រោះទៅគ្រួសារគាត់វិញ៕ រក្សាសិទ្ធិដោយ៖ លឹម ហុង