ពិតណាស់ ករណីគ្រោះថ្នាក់ចរាចរណ៍សព្វថ្ងៃនេះ ក្រៅពីកើតឡើងដោយឧបទ្ទវហេតុ គឺបង្កឡើងដោយសារមនុស្សបើកបរខ្វះការប្រុងប្រយ័ត្ន បើកបរព្រហើន និងមិនចេះយោគយល់អធ្យាស្រ័យឲ្យគ្នា ពោលគឺចង់ឈ្នះចង់ចាញ់តែម្តង។
ជាក់ស្តែង ដូចករណីនេះ គឺពិតជាគួរឲ្យហួសចិត្តខ្លាំងណាស់ ដែលរថយន្តធុនធំប្រភេទសណ្តោង១គ្រឿង និងរថយន្តម៉ាកព្រុស១គ្រឿង ដោយសារបើកបរខ្វះការប្រុងប្រយ័ត្ន និងចង់ឈ្នះចង់ចាញ់ បានព្រលះគ្នា បង្កឲ្យមានការភ្ញាក់ផ្អើល និងហួសចិត្តខ្លាំងតែម្តង ពីសំណាក់អ្នកដំណើរ។ ហេតុការណ៍គ្រោះថ្នាក់ចរាចរណ៍ «ខ្លាំងប៉ះខ្លាំង» នេះ ត្រូវបានដឹងថា បានកើតឡើងស្ថិតនៅចំណុចស្តុបទួលពង្រ កាលពីរសៀលថ្ងៃទី២៦ ខែមករា ឆ្នាំ២០២៣។
តាមរយៈវីដេអូ ដំបូង គេបានឃើញរថយន្តធុនធំប្រភេទសណ្តោង១គ្រឿង បានបើកស្របទ្រូងផ្លូវខាងធ្វេង ។ បន្ទាប់មក ក៏មានរថយន្តព្រុសពណ៌ត្រីឆ្លូញ១គ្រឿង បើកមកពីខាងក្រោយ ក្នុងគន្លងកណ្តាល ហើយក៏បើកវ៉ាប្រកៀកក្បាលឡានធំ។ ភ្លាមៗនោះ មិនដឹងជាឡានធំមើលធំមិនឃើញ ឬយ៉ាងណា ក៏ស្រាប់តែបើកបុកគៀរជាច្រើនម៉ែត្រ ធ្វើឲ្យឡានព្រុសចាប់ហ្វ្រាំង តែឡានធំ ពុំចាប់ហ្រ្វាំងបន្តបើកបុកពេញទំហឹង បណ្តាលឲ្យឡានព្រុសរ៉េទទឹងផ្លូវ រងការខូចខាតផ្នែកចំហៀងខាងឆ្វេងយ៉ាងដំណំតែម្តង។
ជុំវិញករណីគ្រោះថ្នាក់ចរាចរណ៍ដ៏ហួសចិត្តនេះ បងប្អូនមហាជនអ្នកលេងបណ្តាញសង្គម បានធ្វើការវែកញែកខុស-ត្រូវ តាមការមើលឃើញរៀងៗខ្លួន។ ក្នុងនោះ អ្នកខ្លះថា ឡានធំបុកគេពីក្រោយខុស១០០% រីឯអ្នកខ្លះទៀត ថាមកពីឡានតូចបើកភ្លើ វ៉ាគេខាងស្ដាំ ហើយឆ្លៀតវ៉ាប្រកៀកចូលឆ្វេងទៀត ប៉ះសមមុខហើយ,…៕ រក្សាសិទ្ធិដោយ៖ លឹម ហុង
@soomin_0030 គ្រោះថ្នាក់ចរាចរណ៍នៅស្តុបទួលពង្រ អ្នកណាខុសអ្នកណាត្រូវបងប្អូន (note:យកចេញពីcameraឡានបងទេ) #ស្តុបទួលពង្រ##fyp ♬ Oh No – Kreepa