ភ្នំពេញ៖ អាជ្ញាធររាជធានី ពិនិត្យស្ថានភាពផ្លូវជាក់ស្តែងមុននៃការបើកការដ្ឋានស្ថាបនាជូនពួកគាត់ចំនួន២ខ្សែ ក្រោយពីមានសំណូមពរនិងការស្នើសុំពីប្រជាពលរដ្ឋនៅសង្កាត់ឱឡោក ខណ្ឌពោធិសែនជ័យ នៅព្រឹកថ្ងៃអាទិត្យទី១២ វិច្ឆិកានេះ។
បើតាមការឱ្យដឹងពីលោកចៅសង្កាត់ឱឡោកថា ផ្លូវចំនួន២ខ្សែដែលប្រជាពលរដ្ឋស្នើសុំ ហើយត្រូវបានលោកឃួង ស្រេង អភិបាលរាជធានីភ្នំពេញឯកភាពផ្តល់ជូននេះ ខ្សែទី១ ផ្លូវទួលលាភ ក្នុងភូមិសាស្ត្រភូមិត្រពាំងត្នោត ភូមិត្រពាំងអារក្ស ដោយចាប់ពីរង្វង់មូលលោកតា ក្រម ង៉ុយ ទៅដល់ភូមិត្រពាំត្នោយ ឃុំទួលព្រិច ស្រុកអង្គស្នួល ខេត្តកណ្តាល ជាប្រភេទផ្លូវបេតុងមានប្រវែងជាង២៥០០ម៉ែត្រ ទទឹង៥ម៉ែត្រ ។ចំណែកផ្លូវ១ខ្សែទៀតក៏ចេញពីរង្វង់មូលលោកតា ក្រម ង៉ុយដែរ ឆ្ពោះទៅវត្តអង្គស្តុប ជាប់ព្រំប្រទល់ផ្លូវលេខ៤២ មានប្រវែង១០០០ម៉ែត្រ ដោយនឹត្រូវសាងសង់ជាប្រភេទផ្លូវបេតុងមានទទឹង៥ម៉ែត្រ ដូចគ្នា។
ចំពោះផ្លូវទាំង២ខ្សែនេះគ្រោងនឹងបើកការដ្ឋានស្ថាបនាឡើងនាពេលដ៏ខ្លីខាងមុខនេះ ដើម្បីដាក់ជូនប្រជាពលរដ្ឋបាន ប្រើប្រាស់ខណៈផ្លូវទាំង២ខ្សែនេះ នៅរដូវប្រាំងហុយខ្លាំងនិងនៅរដូវវស្សាមានភក់ពិបាកក្នុងការធ្វើដំណើរ។ ដោយមើលឃើញពីស្ថានភាពពិបាកក្នុងការធ្វើដំណើរ និងក្រោយពីមានការស្នើសុំពីប្រជាពលរដ្ឋតាមរយៈអាជ្ញាធរ សង្លាត់ឱឡោក ខណ្ឌពោធិសែនជ័យ ទើបរដ្ឋបាលរាជធានីភ្នំពេញ ក្រោមការដឹកនាំរបស់លោកឃួង ស្រេង ជាអភិបាលរាជធានីភ្នំពេញនិងលោកស្រីជាភរិយាចុះមកពិនិត្យមើលស្ថានភាពផ្លូវជាក់ស្តែងនិងគល់ជូនតែម្តង។
លោកឃួង ស្រេង អភិបាលរាជធានីភ្នំពេញ ក្នុងឱកាសនោះបានមានប្រសាសន៍ថា ការសម្រេចអោយមានការស្ថាបនាផ្លូវទាំង២ខ្សែនេះ គឺដោយមើលឃើញពីប្រជាពលរដ្ឋនៅក្នុងសង្កាត់នេះជានិច្ចជាការតែងគាំទ្រគោលនយោបាយអភិវឌ្ឍន៍របស់រាជរដ្ឋាភិបាល ក្រោយការដឹកនាំរបស់ សម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រី នៅគ្រប់អាណត្តិនៃការបោះឆ្នោតកន្លងមក។ នេះបានបង្ហាញអោយឃើញពីការគិតគូរពីសុខ ទុក្ខប្រជាពលរដ្ឋរបស់លោកឃួង ស្រេងអភិបាលរាជធានីភ្នំពេញ ពោលគឺបើកន្លែងណាមានការលំបាក ក្នុងនាមអាជ្ញាធរ ដែលជាអាណាព្យាបាល ជាម៉ែ ជាឳរបស់ប្រជាពលរដ្ឋ តែងជួយប្រជាពលរដ្ឋជានិច្ច៕ ដោយ៖កូឡាប
