ស្ដ្រីរងគ្រោះឈ្មោះ អ៊ឹង ជុងហ្គិច ជាកុងស៊ី (ទទួលបញ្ជាំ) ក្នុងនៅកាស៊ីណូណាហ្គាលវើលទី១ ត្រូវបានជនមិនស្គាល់មុខប្លន់សម្លាប់យកទ្រព្យសម្បត្តិ ប្រមាណជាង ៦០ ម៉ឺនដុល្លារ ដោយអារ.ក និងចាក់សម្លាប់ជាច្រើនកាំបិត បណ្តាលឲ្យស្លាប់យ៉ាងអាណោចអាធម នៅក្នុងបន្ទប់ទឹកជាន់ទី១ កាលពីវេលាម៉ោងជាង ១០ យប់ ថ្ងៃទី១៦ ខែមករា ឆ្នាំ២០២៣ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ទោះជាយ៉ាងណា ក្រោយករណីអំពើឃាតកម្មប្លន់សម្លាប់ដ៏សាហាវនេះ បានកើតឡើង ជនសង្ស័យក៏ត្រូវបានកំណត់បានភិនភាគយ៉ាងច្បាស់ តាមរយៈកាមេរ៉ាសុវត្ថិភាព ហើយមកទល់ពេលនេះ ជនសង្ស័យរូបនេះបាននិងកំពុងគេចខ្លួនដោយសុវត្ថិភាពនៅឡើយ ខណៈសមត្ថកិច្ចក៏កំពុងដុតដៃដុតជើងតាមប្រមាញ់ផងដែរ។
គួរបញ្ជាក់ថា ស្រ្តីរងគ្រោះខាងលើ មានកូនប្រុសស្រីចំនួន ៣ នាក់ ហើយរូបនាងក៏ត្រូវបានដឹងថា បានបែកបាក់គ្នាជាមួយអតីតស្វាមីដែលគេស្គាល់ថាជាលោកឧត្តមសេនីយ៍ត្រី ចាន់ សួរ អនុប្រធាននាយកដ្ឋានប្រឆាំងបទល្មើសល្បែងពាណិជ្ជកម្ម មានរយៈពេល ៦-៧ ឆ្នាំ មកហើយ។
អ្វីដែលកាន់តែគួរឲ្យសង្វេគចិត្តខ្លាំងនោះ គឺថ្មីៗនេះ គេក៏បានឃើញតាមរយៈវីដេអូ Live របស់គ្រូ ឆុង ស្រីណែត បានបង្ហាញលោក ចាន់ សួរ ជាអតីតស្វាមី បានទ្រហ៊ោយំស្ទើរសម្លាប់ខ្លួនតាម ខណៈវិញាណប្រពន្ធចូលសន្ឋិតកូនស្រីរបស់ខ្លួន ដោយផ្តាំផ្ញើជាពិសេសឲ្យជួយមើលថែកូនៗប្រុសស្រីទាំងបីនាក់ផង។
តែទន្ទឹមនឹងនេះផងដែរ នៅថ្ងៃទី៣០ ខែមករា ឆ្នាំ២០២៣ ម្សិលមិញនេះ អតីតស្វាមីស្រ្តីរងគ្រោះខាងលើ ក៏បានបង្ហោះប្រកាសជូនសារគុណដល់អ្នកផ្តល់ព័ត៌មានទីតាំងលាក់ខ្លួន ឬប្រទះឃើញជនសង្ស័យ យ៉ាងដូច្នេះថា៖ «នេះជាលើកទី១ហើយជាការឈឺចាប់បំផុតសម្រាប់ជីវិតខ្ញុំ ពេលនេះសមត្ថិកិច្ចក៏បានខំដុតដៃដុតជើងដែរ ដើម្បីតាមចាប់ឃាតករមកផ្ដន្ទាទោសតាមច្បាប់ដែរ ដោយឡែកខ្ញុំសុំបងប្អូនប្រជាជនយើងបើសិនបានឃើញឃាតករក្នុងរូបនេះ សូមជួយផ្ដល់ពត៌មានដល់សមត្ថកិច្ចដែលនៅជិតបំផុត ឬផ្ដល់ព័ត៌មានមកដល់ខ្ញុំតាមរយៈលេខទូរស័ព្ទ 070666777 ខ្ញុំនឹងជូនសារគុណនៅពេលចាប់បានជននេះ មកទទួលទោសតាមច្បាប់។ សូមអូនទៅកាន់សុខគតិភពចុះ ការងារដែលសេសសល់ទុកអោយសមត្ថិកិច្ច និងច្បាប់ដោះស្រាយចុះ សូមព្រលឹងអូនកុំនៅវិលវ៉ុលទៀតអី! ខ្ញុំសូមអរគុណថ្នាក់ដឹកនាំដែលបានយកចិត្តទុកដាក់ និងជំរុញស្មារតីកងកំលាំងក្នុងការស្វែងរកយុត្តិធម៏អោយគ្រួសារខ្ញុំ»៕ រក្សាសិទ្ធិដោយ៖ លឹម ហុង
