ភាពស្មោះត្រង់ និងការធ្វើល្អ ចំពោះអ្នកដទៃ ជាពិសេសចំពោះមនុស្សដែលខ្លួនរស់នៅជាមួយ នោះនៅពេលចាកចេញទៅវិញ នឹងប្រាកដធ្វើឲ្យម្ចាស់របស់អ្នក និងក្រុមគ្រួសាររបស់ពួកគេ ពិបាកនឹងកាត់ចិត្តណាស់ ព្រោះតែនឹកដល់នូវទង្វើដ៏ល្អៗរបស់អ្នក និងការរស់នៅរួមសុខទុក្ខជាមួយគ្នា ប្រៀបដូចគ្រួសារតែមួយ។
តួយ៉ាង ដូចរឿងពិតនេះ បានធ្វើឲ្យអ្នកលេងអ៊ីនធើរណែតជាច្រើន រំជួលចិត្តយ៉ាងខ្លាំង ក្រោយពីបានឃើញស្រ្តីម្ចាស់ផ្ទះជនជាតិម៉ាឡេស៊ីឈ្មោះ Mengli Tan បានបង្ហោះនៅលើហ្វេសប៊ុករបស់នាង ដើម្បីបង្ហាញពីការលាគ្នាដ៏ឈឺចាប់របស់អ្នកជួយការងារផ្ទះ (ឈ្នួល) ដែលបាននៅជាមួយនាង និងគ្រួសារអស់រយៈពេល ៦ ឆ្នាំ។
នាងបានសរសេរថា៖ «អរគុណដែលបានខិតខំ ដើម្បីគ្រួសារមួយនេះរយៈពេល៦ឆ្នាំ។ ឥឡូវនេះ អ្នកនឹងស្វែងរកសុភមង្គលផ្ទាល់ខ្លួនរបស់អ្នកហើយ។ ខ្ញុំសូមជូនពរអ្នកឱ្យជួបតែសំណាងល្អបំផុត នាពេលអនាគត។ ខ្ញុំពិតជាស្ទាក់ស្ទើរណាស់ ដែល (អនុញ្ញាតឱ្យអ្នកចាកចេញ)»។
នាងសរសេរបន្តថា៖ «អ្នកបានមើលថែកូនស្រីរបស់ខ្ញុំតាំងពីនាងកើតមក រហូតដល់នាងចូលរៀនថ្នាក់បឋមសិក្សានៅឆ្នាំនេះ។ អរគុណដែលចាត់ទុកកូនរបស់ខ្ញុំដូចកូនខ្លួនឯង។ អរគុណដែលបានជួយចិញ្ចឹមពួកយើង ឲ្យពួកគេបានធំធាត់ ក្នុងរយៈពេល៦ឆ្នាំកន្លងមក និងធ្វើម្ហូបឆ្ងាញ់ៗជាច្រើនមុខ»។
នៅក្នុងវីដេអូដែលនាងបានចែករំលែក បានបង្ហាញក្រុមគ្រួសារទាំងមូលរួមមាន ម្តាយរបស់នាង និងកូនៗ អាចត្រូវបានគេឃើញយំចេញពីបេះដូង ខណៈដែលពួកគេទាំងអស់គ្នាបានឱ្យស្រ្តីជាឈ្នួលឱបខ្លាឃ្មុំ ហើយគាត់ក៏ជូតទឹកភ្នែកដែរ។
ដោយយល់ឃើញថា ស្រ្តីអ្នកបម្រើនោះ បានចាកចេញដោយចៃដន្យ ក្នុងថ្ងៃខួបកំណើតរបស់ Mengli, នាងក៏បាននិយាយបែបលេងសើចថា «ស្អប់ខ្លាំងណាស់ ដែលជ្រើសរើសចាកចេញពីពួកយើង នៅថ្ងៃខួបកំណើតរបស់ខ្ញុំ»។
ជាចុងក្រោយ ស្រ្តីនោះបានថើបថ្ពាល់ និងថ្ងាសកូនៗទាំង ៣ របស់ម្ចាស់ផ្ទះ មុនពេលដើរចេញពីទ្វារផ្ទះទាំងបង្ខំ ដែលឃើញហើយពិតជារំជួលចិត្ត និងស្រក់ទឹកភ្នែកតាមតែម្តង៕ រក្សាសិទ្ធិដោយ៖ លឹម ហុង
