នៅលើបណ្តាញសង្គម កាលពីពេលថ្មីៗនេះ បានចែករំលែកព្រោងព្រាត ពីវីដេអូបង្ហាញក្រុមចោរដៃស្អិត និងជំនាញ បានធ្វើសកម្មភាពឆក់ទូរស័ព្ទ ស្រីស្អាតម្នាក់ ដែលកំពុងជិះក្នុងកង់បី (PassApp) ដោយយកបានសម្រេចដោយសុវត្ថិភាព។
ករណីចោរឆក់ទូរស័ព្ទនេះ កើតឡើងនៅវេលាម៉ោង ៤ និង១៨នាទី រសៀលថ្ងៃទី៣ ខែកុម្ភៈ ឆ្នាំ២០២៣ ស្ថិតតាមបណ្តោយផ្លូវ ២១៥ (ពីស្តុបអាងទឹកអូឡាំពិក ទៅស្តុបផ្សារដេប៉ូ) ក្នុងសង្កាត់វាលវង ខណ្ឌ៧មករា រាជធានីភ្នំពេញ។ នេះបើតាមម្ចាស់រថយន្ត មានគណនីហ្វេសប៊ុកឈ្មោះ Hea Khy Hsk ដែលថតបានសកម្មភាពឆក់នេះស្តែងៗ បានបង្ហោះសរសេរប្រាប់ឲ្យដឹងថា៖ «សកម្មភាពចោរឆក់ទូរស័ព្ទមុខឡានខ្ញុំច្បាស់ៗហ្មង ស្លាកលេខក៏ច្បាស់»។
ចំណែកស្រីស្អាតជាម្ចាស់ទូរស័ព្ទរងគ្រោះ ដែលមានគណនីហ្វេសប៊ុកឈ្មោះ Ni MariNaii ក៏បានស៊ែរផុសវីដេអូម្ចាស់ឡានខាងលើ ប្រាប់ឲ្យដឹងថា «អាពីរអ្នកហ្នឹងហើយ ឆក់ខ្ញុំនៅផ្សារដេប៉ូ»។
តាមរយៈវីដេអូ បានបង្ហាញឲ្យឃើញកង់បី (PassApp) ១គ្រឿង កំពុងបើកស្របនឹងរបាំងចែកទ្រូងផ្លូវ ហើយរំពេចនោះ ក៏ស្រាប់តែ១ម៉ូតូចោរស្ទាវ១គ្រឿងពាក់ស្លាកលេខ ភ្នំពេញ 1JX-2213 ជិះឌុបគ្នាពីរនាក់ បានបើកទៅអែបខាងឆ្វេង PassApp រួចធ្វើសកម្មភាពឆក់យ៉ាងរហ័សតែម្តង។ ភ្លាមៗនោះ ក៏បានឃើញនារីរងគ្រោះអើតខ្លួនចេញពី PassApp ស្រែកចោរៗ ប៉ុន្តែ បានត្រឹមស្រែកប៉ុណ្ណោះ ព្រោះថា ពួកវាជំនាញទាំងឆក់ ជំនាញទាំងជិះគេចខ្លួន និងព្រមទាំងមានគ្នីគ្នា៣នាក់ទៀត ជិះម៉ូតូ Scoopy ២គ្រឿង ចាំបិទគូទទៀតផង។
ទោះជាយ៉ាងណា សូមបងប្អូនប្រជាពលរដ្ឋដែលធ្វើដំណើរតាមដងផ្លូវ ត្រូវមានការប្រុងប្រយ័ត្នទ្រព្យសម្បត្តិផ្ទាល់ខ្លួនផង ព្រោះថា ទោះយើងជិះក្នុងកងបីក៏ដោយ ក៏ក្រុមចោរដៃស្អិត អាចកាបូប ឬ ទូរស័ព្ទដែលយើងកំពុងនិយាយភ្លេចខ្លួន បានសម្រេចដោយសុវត្ថិភាពជារឿយៗ៕ រក្សាសិទ្ធិដោយ៖ លឹម ហុង
