ភ្នំពេញ៖ មន្ត្រីជាន់ខ្ពស់ក្រុងភ្នំពេញ បានអះអាងថា មានក្រុមមនុស្សមួយចំនួន ដែលមាននិន្នាការប្រឆាំងនឹងរាជរដ្ឋាភិបាលបច្ចុប្បន្ននេះ បាននិយាយថាលទ្ធិប្រជាធិបតេយ្យ នៅកម្ពុជា ខ្សោយមិនមានតម្លាភាព ពីព្រោះតែកម្ពុជា ទើបតែមានសុខសន្តិភាពមានរយៈពេល១៩ឆ្នាំប៉ុណ្ណោះ ហើយយកកម្ពុជាទៅប្រៀបជាមួយនឹងអាមេរិក ដែលមានលទ្ធិប្រជាធិបតេយ្យជាង២៥០ឆ្នាំមកហើយ ។
ក្នុងពិធីបើកការដ្ឋានដាក់លូនៅអមសងខាងផ្លូវ១៩៦២ ស្ថិតក្នុងខណ្ឌសែនសុខ កាលពីព្រឹកថ្ងៃទី១៣វិច្ឆិកានេះ លោកឃួង ស្រេង អភិបាលរាជធានីភ្នំពេញ មានប្រសាសន៍ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានស្វែងរកសន្តិភាព ជូនប្រជាជនកម្ពុជា ហើយប្រទេសកម្ពុជា មានសន្តិភាពពេញលេញនៅត្រឹមឆ្នាំ២០០៨ រហូតមកដល់ថ្ងៃនេះ មានរយៈពេល១៩ឆ្នាំហើយ។ លោក បានបញ្ជាក់ថា “មានក្រុមមនុស្សមួយចំនួន ចេះតែនិយាយថាលទ្ធិប្រជាធិបតេយ្យ នៅកម្ពុជា ខ្សោយណាស់ បើមិនខ្សោយ ពីព្រោះតែកម្ពុជាទើបតែមានសុខសន្តិភាពមានរយៈពេល១៩ឆ្នាំប៉ុណ្ណោះ ហើយយកកម្ពុជាទៅប្រៀបជាមួយនឹងអាមេរិក ដែលមានលទ្ធិប្រជាធិបតេយ្យជាង២៥០ឆ្នាំមកហើយ ។ លោកអភិបាល បានបន្តថា សហរដ្ឋអាមេរិក ប្រជាធិបតេយ្យប្រទេសគេ បានពួនជ្រំ២៥០ឆ្នាំមកហើយ ហើយពួកគេបានប្រជាធិបតេយ្យមួយផ្ទាំងរបស់សហរដ្ឋអាមេរិក មកឲ្យកម្ពុជាធ្វើតាមគេភ្លាម ធ្វើវាអត់បានភ្លាមទេ វាមិនដែលយកកូនក្មេង ទៅរៀនភ្លាម ហើយឲ្យប្រឡងបាក់ឌុបនោះទេ ដូច្នេះត្រូវតែរៀនចាប់ពីថ្នាក់ទី១ឡើងទៅ ។ នៅលើលោកនៅ មិនដែលមាននរណា យកប្រជាធិបតេយ្យ មកដាក់ចាប់ហែកចែកគ្នាបែបនេះទេ ហើយយើងត្រូវមានមោទនភាពជាតិរបស់យើង ដែលមានដូចសព្វថ្ងៃនេះ ហើយគ្មាននរណានឹកឃើញថាប្រទេសកម្ពុជា មានសុខសន្តិភាពដូចសព្វថ្ងៃនេះទេ ។ យើងត្រូវរួមគ្នាការពារសុខសន្តិភាពនេះឲ្យបានជារៀងរហូត ដើម្បីទទួលបាននូវការអភិវឌ្ឍ”។
លោកបានថ្លែងថា នៅខ្មែរយើងសម្បូរអ្នកប្រាជ្ញាច្រើនណាស់ ហើយនៅពេលដែលអ្នកប្រាជ្ញាកំពុងជាប់ពិភាក្សាគ្នា គឺមិនមើលមុខស្តេចនោះទេ ហើយស្តេចបានប្រាប់ស្នំថាកុំប្រកាន់អ្នកប្រាជ្ញាអី ព្រោះប្រាជ្ញាគេជជែកគ្នាតែអីចឹង។ ប៉ុន្តែអ្នកប្រាជ្ញាសុទ្ធតែអន់ទាំងអស់នោះទេ ហើយអ្នកប្រាជ្ញាមួយចំនួនបើតាមធម៌ព្រះបានបញ្ជាក់ថាបែកកម្មឋាន ហើយអ្នកប្រាជ្ញាដែលមិនបែកកម្មឋានគឺបានទៅរកផ្លូវល្អ ។ លោកបញ្ជាក់ថា “អ្នកប្រាជ្ញាទាំងអស់កុំខឹងខ្ញុំ ពីព្រោះអ្នកប្រាជ្ញាល្អបានគិតត្រឹមត្រូវ គិតពីប្រយោជន៍ជាតិ ដែលខុសពីអ្នកប្រាជ្ញាមួយចំនួនតូច គិតតែមួយជ្រុងតូច”។ លោកឃួង ស្រេង បានលើកឡើងថា សម្តេចបានមានប្រសាសន៍ថាសមិទ្ធផលដែលក្មួយបាននាពេលនេះ អត់មានបាតដៃបក្សប្រឆាំងណាមួយមកជួយទេ បច្ចុប្បន្ននេះ ថ្ងៃនេះ គ្មានបាតដៃបក្សប្រឆាំងមកជួយអភិវឌ្ឍន៍ទេ ប៉ុន្តែមានបងប្អូនមួយចំនួនមានការយល់ច្រឡំ នៅពេលដែលឃើញគេនិយាយល្អ ក៏បោះឆ្នោតឲ្យគេ ។ អ្នកដែលចាំតែនិយាយ គឺសុទ្ធតែល្អ ប៉ុន្តែអ្នកធ្វើ គឺមានខុស មានត្រូវ មានឆកល្វែង ។ អ្នកដែលល្អបំផុត គឺអ្នកមិនដែលធ្វើ និយាយអ្វីក៏ត្រូវ ព្រោះមានអណ្តាលចាំតែគ្រលាស់ ។
លោកអភិបាលរាជធានីភ្នំពេញ បានបន្ថែមថា មន្ត្រីរាជការទាំងអស់ចាប់ពីឆ្នាំភូមិឡើងទៅ ក្លាយខ្លួនជាអ្នកបម្រើប្រជាពលរដ្ឋ យ៉ាងពិតប្រាកដ ប៉ុន្តែនៅមានការប្រទាំងប្រទើសខ្លះ នៅថ្នាក់ភូមិ ថ្នាក់សង្កាត់ រហូតដល់ថ្នាក់ក្រោមជាតិ នឹងធ្វើការកែសម្រួលបន្តទៅទៀត ហើយជាពិសេស ត្រូវតែមានវិធានការ ចំពោះជនខិលខូច ដែលមិនបានយកចិត្តទុកដាក់ បម្រើប្រជាពលរដ្ឋ ដោយស្មោះត្រង់ ដោយត្រូវធ្វើការកែលម្អទៅមុខទៀត ៕ ដោយ៖កូឡាប